भगवान कर सच्चा बचन यूहन्ना 1

1 यूहन्ना की चिट्ठी

1 यूहन्ना कर चिट्ठी

परचा

1 यूहन्ना के चिट्ठी प्रेरित यूहन्ना दवारा मसीह के पइदा के 50 लग 100 साल के बीच लिखे गय रथै, यूहन्ना खुद के लिखे बाले के रूप हे नेहको चीनथै, पय पहिले अध्याय दिखाथै कि ऊ यीसु के जीवन अउ जी उठै के प्रतक्छ हबै। 1:1-3 1 यूहन्ना हे लेखक सैली लग बोहत मिलत-जुलत। असना माने जथै कि यूहन्ना इफिसुस हे रथै यूहन्ना अउ तीसर अक्छर 1 यूहन्ना, 2 यूहन्ना अउ 3 यूहन्ना के जसना सुसमाचार लिखे रथै।

यूहन्ना हइ चिट्ठी सगलू मसीहन के असना टेम हे लिखे रथै, जब मंडली के आत्म ग्यानी नाम के मनसेन के अक्ठी समूह लग परेसानी होथै। हइ मनसेन के मानना रथै कि यीसु पूरी तरह लग भगवान रथै पय भुंइ हे रहत ऊ सच हे मांस अउ खून के देह बाले मनसे रथै। हइ कारन लग यूहन्ना यीसु के जीवन के प्रतक्छ होय के बारे लिखथै, अउ हइ कि ओखर अपन हाथ यीसु के छुइस 1:1-3 हइ चिट्ठी के लिखे हे यूहन्ना के मतलब ओखर मगन के पूर करै के रथै। 1 यूहन्ना 2:1 बिस्वासिन के पाप करै लग रुकिन 1 यूहन्ना 2:26 अउ स्वास्थ करना बिस्वासिन के उन बचाय गय हबै। 5:13

रूप रेखा

1. यूहन्ना अपन चिट्ठी के परचा देथै अउ इके लिखे के अक्ठी उदेस्य देथै। 1:1-4

2. फेर ऊ कथै कि भगवान कसना परकास हबै अउ हमके यीसु के जसना जीय चाही। 1:5—3:10

3. एखर बाद ऊ हमके अक दूसर लग माया करै के आदेस के सुरता दिलाथै। 3:11—5:12

4. ऊ अपन चिट्ठी के समापत करथै। 5:13-21

जीवन कर बचन

1 ऊ दुनिया के सुरु लग रथै, हम इके सुने हबन, हम अपन आंखी लग देखे हबन, हम उके धियान लग देखन अउ इके खुदय अपन हाथन लग छुय हबन, हम ऊ बचन के बारे हे गुठेथन जउन जीवन हबै। 2 अउ हइ जीवन परगट करे गइस, हइ उहै जीवन हबै जउन बाफ के इहां रथै अउ हमर हे परगट करे गय रथै, हम इके देखे हबन ओखर बारे हे गवाही देयत अउ तुमही सबरोज के संदेस सुनाथन। 3 हम उके देखे हबन अउ सुने हबन अब तुमो उहै के सिक्छा देथा, ता तुमो हमर संग संगति रखा हमर हइ संगति बाफ अउ ओखर टोरवा यीसु मसीह के संग हबै। 4 अउ हम हइ बातन के तुमही इहैनिता लिखथन कि हमर मगन पूर हुइ जाय।

भगवान उजियार हबै

5 अउ जउन संदेस हम ओखर लग सुने हबन अउ अब तुमो के सुनाथन, भगवान उजियार हबै अउ ओहमा कउनो अंधियार नेहको हबै। 6 अगर हम कथन कि ओखर संग संगति रखथन अउ अंधियार हे चलथन ता हम झूठ बोलथन अउ सच्चाई के जीवन नेहको जीथन। 7 अगर हम उजियार हे चलथन जउन मेर ऊ उजियार हे हबै, ता हमर अक दूसर लग संगति हबै अउ ओखर टोरवा यीसु मसीह के खून हमही सगलू पाप लग सुध्द के देथै✡।

8 अगर हम कथन कि हम कुछु पाप नेहको करे हबन, ता हम अपन खुद के धोखा देथन अउ हमर हे सत्य नेहको हबै। 9 अगर हम अपन पाप के मान लेबो, ता ऊ हमर पाप के छमा करी, अउ हमर सगलू अधरम लग सुध्द करी, काखे ऊ बिस्वास के काबिल अउ धरमी मनसे हबै✡। 10 अगर हम कथन कि पाप नेहको करे हबन, ता उके ठगरा ठहराउथन अउ ओखर बचन हमर हे नेहको हबै।

✡1:7 यसा 2:5

✡1:9 भजन 32:5; नीति 28:13