1 तीमुथियुस के लिए पौलुस की चिट्ठी
1 तीमुथियुस के निता पोलुस कर चिट्ठी
परचा
1 तीमुथियुस के किताब प्रेरित पोलुस दवारा अपन चेला तीमुथियुस के लिखे गय अक्ठी चिट्ठी हबै, 1 तीमुथियुस करीबन मसीह के पइदा के लगभग 62-64 साल बाद लिखे गय रथै, हइ पोलुस के जीवन के आखरी के निकट होथै, पोलुस तीमुथियुस के संग गहरी सबंध रथै, अउ ऊ उके कइ बेर टोरवा के रूप हे सहायता करिस। फिलिप्पियन 2:221 तीमु 1:2; 1:18
हइ पोलुस के चारठे चिट्ठी मसे अक्ठी हबै, जउन अक्ठी मंडली के बजाय अक्ठी मनसे के सम्बोधित करे जथै, तीन चिट्ठी 2 तीमुथियुस तीतुस अउ फिलेमोन हबै। 1 तीमुथियुस हे मंडली के आराधना 2:1-15 मंडली के अगुवन के निता काबिल 3:1-13 अउ ठगरा गुरून के खिलाफ चेतन्त। 1:3-11; 4:1-5; 6:2-5 हइ दरसाथै कि कइसन पोलुस तीमुथियुस के मंडलिन हे अगुवा बनै के निता सिक्छा देत रथै, 1 तीमुथियुस हे कइ सिधान्त हबै जउन हमर दिनन हे मंडली के नेता के घरेलू मंडली के सेबकाई के परबन्ध करै हे मदद के सकथै।
रूप रेखा
1. पोलुस तीमुथियुस के सोगत करत सुरु करथै। 1:1-2
2. तब ऊ तीमुथियुस के ठगरा गुरू के बिरोध चेतन्त देथै। 1:3-11
3. पोलुस हइ गुठेत जारी रखथै कि ऊ यीसु मसीह के निता केतका अभारी हबै। 1:12-19
4. एखर बाद ऊ तीमुथियुस के अराधना अउ मंडली के अगुवन के बारे हे निरदेस देथै। 2—3
5. पोलुस तीमुथियुस के कुछ आखरी निरदेस दइके अपन चिट्ठी समापत करिस। 4—6
1
1 पोलुस के पल्ला लग जउन हमर मुकति करै बाले भगवान अउ हमार आसा मसीह यीसु के आदेस लग मसीह यीसु के चेला बनिस।
2 तीमुथियुस के नाम जउन बिस्वास हे मोर सही टोरवा हबै, भगवान बाफ, अउ हमर परभु यीसु मसीह के तरफ लग, तोके अनुगरह अउ दया, अउ सान्ति मिलत रहै।
भगवान अउ हमर परभु मसीह यीसु के पल्ला लग अनुगरह, अउ दया अउ सान्ति मिलत रहै।
ठगरा गुरून के बिरोध चेतन्त
3 मै मकिदुनिया परदेस छो जात टेम तोके समझाय रहों, कि इफिसुस सहर हे रुक जाव, अउ कुछ बताय हर मनसे के चेतन्त करा कि उन ठगरा सिक्छा झइ दे। 4 अउ उन किस्सन अउ अनन्त बिरादरी हे मन झइ लगाय, जेखर लग झगडा होथै, अउ भगवान के ऊ परबन्ध के ग्यान नेहको मिलथै, जउन बिस्वास हे आसरित हबै। 5 हमर आदेस के उदेस्य हबै, निक्खा सुध्द मन, अउ बढिहा सोंच अउ निस्कपट बिस्वास लग माया पइदा होथै। 6 कुछ असना मनसे हबै, जउन रास्ता लग भटक के बेकार संगति हे फस गय हबै। 7 उन नियम के गुरू होय के दाबा करथै, हइ आदेस के उदेस्य ऊ माया हबै, जउन सुध्द हिरदय, निरदोस अन्त करन अउ निस्कपट बिस्वास लग उत्पन्न होथै।
8 हमके हइ पता हबै कि निक्खा मेर लग नियम के काम लामै, ता नियम बढिहा हबै, अगर एखर निस्तार सही मेर लग करे जाय। 9 हमके सुरता रहै कि हइ नियम धरमी जन के निता निरधारित नेहको होय हबै, बलुक अधरमी, निरंकुसो, भक्तिहीनो, पापिन, अपवितर अउ असुध्द मनसे, दाय दादा के घात करै बाले, या हत्यारों, 10 चाल खराब बाले मनसे, डउका के डउका संग काज करैबाले, अउ मनसे के बेचै बाले, झूठ बोलै बाले अउ झूठी किरिया खाय बाले, अउ इनही छांड के खरा सिक्छा के सब बिरोधियन के निता ठहराय गय हबै।
11 इहै परम धन्य भगवान के महिमा ऊ संदेस के जसना हबै, जउन मोके दय गय हबै।
पोलुस हे भगवान कर अनुगरह
12 मै हमर परभु यीसु मसीह के धन्यबाद करथो, मोके उहै सक्ति दय हबै, ऊ मोके बिस्वास के काबिल समझ के अपन सेबा के काम के निता चुने हबै। 13 मै तो पहिले निन्दा करै बाले, बुराई करे बाले अउ गलत काम करे बाले, अउ अधरमी रथो, पय मोर उप्पर दया करे गय हबै, काखे अबिस्वास के कारन मै हइ नेहको जानत रहों कि मै का करथो। 14 अउ परभु के अनुगरह मोके बोहत मिले हबै, अउ संग हे बिस्वास अउ माया जउन मसीह यीसु हे हबै बहुतायत लग हुइस। 15 हइ बात सही हबै, अउ हर कउ स्वीकार करै का काबिल हबै, कि यीसु मसीह हइ दुनिया हे पापिन के मुकति करै के निता आइस, फेर मै तो सब लग बडा पापी हबो। 16 मोर उप्पर दया इहैनिता करे गय हबै कि मै सबले बडा पापी यीसु मसीह सब लग पहिले मोके अपन पूर सहनसीलता परदरसित करिस, अउ उन मनसेन के निता अक्ठी उदाहरन परस्तुत करिस, जउन सबरोज जीवन पामै के निता बिस्वास करही, उनखर निता मै अक्ठी आदर्स बन। 17 युगन के राजा, कबहुन न मरै बाले, कबहुन न दिखै बाले अउ असीम भगवान के इज्जत अउ महिमा जुगजुग होवत रहै ओसनेन होय।
तीमुथियुस कर आदेस
18 हे मोर टोरवा, तीमुथियुस, मै तोके आदेस तोर बारे हे पहिलेन लग करे गइस आगू कर बात जसना सउपथो, कि उनखर जसना तै निक्खा लडाई के लडत रह। 19 बिस्वास अउ निक्खा सुध्द मन हुइके अच्छाई के लडाई के सकस, कुछ असना हबै, जिनखर अच्छा चेतना अउ बिस्वास रूपी जिहाज बुड गइस। 20 उनखर मसे हुमिनयुस अउ सिकन्दर हबै, जिनके मै भुतवा के हाथ हे सउप दय हबो जेखर लग ऊ हइ ग्यान ले कि भगवान के बुराई करै के झइ सीखय।