3 यूहन्ना की चिट्ठी
3 यूहन्ना कर चिट्ठी
परचा
यूहन्ना के चिट्ठी प्रेरित यूहन्ना दवारा मसीह के पइदा के 50 लग 100 साल के बीच लिखे गय रथै। यूहन्ना खुद के लेखक के रूप हे नेहको चीनथै, बलुक खुद के सियान कथै। 1:1 ऊ 2 यूहन्ना 1:1 हे ओसनेन करथै। असना माने जथै कि यूहन्ना इफिसुस हे रथै, यूहन्ना अउ तीसर अक्छर 1 यूहन्ना, 2 यूहन्ना अउ 3 यूहन्ना के जसना संदेस लिखे रथै।
यूहन्ना हइ चिट्ठी गयुस के नाम के अक्ठी बिस्वासी के लिखे रथै। ऊ गयुस के अक्ठी संगी के रूप हे संबोधित करथै, अउ उके मसीही भाई के निता पहुनाई करै के आदेस देथै, जउन उस इलाका हे यातरा करथै।
रूप रेखा
1. यूहन्ना अपन चिट्ठी के परचा देथै। 1:1
2. फेर ऊ गयुस के प्रोत्साहन करथै अउ उके भाई के आसा दिखामै के आदेस देथै। 1:2-8
3. एखर बाद ऊ दुइठे दूसर डउका दियुतिरफेस अउ दिमेतिरयुस के बात करथै। 1:9-12
4. आखरी हे ऊ अपन चिट्ठी समापत करथै। 1:13-14
1
सोगत
1 मुझ सियान के पार लग, पिरिया संगी गयुस के नाम, जेखर लग मै सही माया करथो।
2 हे प्रिजन, मोर हइ पराथना हबै कि जसना तै आतमिक उन्नत करथस, ओसनेन तै सगलू बातन हे उन्नत के अउ ठीक ठाक रहा। 3 काखे जब भाई-बेहन इछो आइन अउ उन तोर सही के बारे हे गवाही दइन अउ बताथै कि कउन मेर तै सही के रास्ता हे चलथस, ता मै बोहत खुस होयों। 4 मोके अउ कउनो बात हे एतका खुसी नेहको हुइस, जेतका हइ बात सुनके कि मोर लरका सही के रास्ता हे चलथै।
गयुस कर परसंसा
5 हे मोर पिरिया भाइयो, जउन तुम अनचिन्हार मनसेन के निता करथा, ऊ सगलू बिस्वास लग करथा, 6 उन इछो के मंडली के आगू तुम्हर माया के गवाही दय हबै, अगर तुम उनखर आगू के यातरा के मदद करिहा, ता अउ निक्खा होही, एखर लग भगवान खुस होही। 7 काखे ऊ मसीह के सेबा के निता यातरा हे ऊ नाम के निता निकरे हबै, अउ गैर यहूदी लग कुछु मदद नेहको लेथै। 8 इहैनिता हमके असना बिस्वासिन के सोगत करै चाही, ताकि सही के फइलामै हे मदद मिलै।
दियुतिरफेस अउ दिमेतिरयुस
9 मै मंडली के अक्ठी चिट्ठी लिखे रहों, पय दियुतिरफेस जउन उहां के नेता बनै चाहथै, हमके अपनामै के निता तइयार नेहको हबै। 10 इहैनिता मोर आमै लग मै ओखर कामन के सुरता देबाहुं जउन ऊ बेकार सब्द लग हमर निदरा करथै, ऊ एतका हे मन नेहको भरथै, ता ऊ अपन भाई के सोगत तक नेहको करथै, अउ न करै बालेन के करै देथै, बलुक उनही मंडली लग बाहिर के देथै।
11 हे पिरिया संगी, बुराई के नेहको पय निक्खा करा, जउन निक्खा करथै, ऊ भगवान के पल्ला लग हबै, जउन बुराई करथै, ऊ भगवान के नेहको देखे हबै।
12 दिमेतिरयुस के सगलू कउ बडाई करथै, अउ हमु ओखर गवाह हबन, तुमही पता हबै कि हमर गवाही सही हबै।
आखरी सोगत
13 तोके लिखे के निता मोर लिघ्घो बोहत बात हबै, पय सियाही अउ कलम लग लिखे के नेहको चाहथो। 14 बलुक मोके आसा हबै कि तोर लग हरबी मुलाकात करिहों, तब हम आमने-सामने बात चीत कर सकब।
15 तोके सान्ति मिलत रहै।
इहां के दोस तोके नमस्ते कथै। उहां के संगिन लग नाम लइ लइके नमस्ते कइहा✡2 यूहन्ना 1:12।
✡1:15 2 यूहन्ना 1:12