गलातियों के लिए पौलुस की चिट्ठी
गलातियों के निता पोलुस कर चिट्ठी
परचा
गलातियों के किताब प्रेरित पोलुस 1:1 दवारा लिखे गय रथै, हइ अक्ठी चिट्ठी रथै, जेही पोलुस गलातियों के मंडलिन के मसीह के पइदा 48-57 साल के बीच कोनो टेम लिखे रथै, गलातिया सायद रोमन परदेस गलातिया हे रहै बाले मनसे रथै। बिदमानन के बिस्वास नेहको हबै, कि जब पोलुस चिट्ठी लिखे रथै, ता ऊ कछो रथै, पय इफिसुस अउ कुरिन्थुस के सहर दुइठे संभावित जिघा हबै।
पोलुस गलातिया के मंडलिन हे, यहूदी अउ गैर यहूदी दुनो मसीहिन के सम्बोधित करै के निता लिखथै, ऊ खास करके अक्ठी झूठी सिक्छा के जसना करै के निता लिखे रथै, जेहमा कहे रथै कि मसीहिन के पुरान नियम के यहूदी कनून के मानै के जरूरी हबै, खास रूप लग सुध्दिकरन। मसीहिन के बीच यहूदी नामक मनसेन के अक्ठी समूह रथै, जेही गैर यहूदी मसीहिन के सुध्दिकरन करामै के जरूरी रथै। जउन पोलुस के प्रेरित हक हे सबाल उठाथै पोलुस अपन कुछ किस्सा 1:11—2:14 गुठेके अपन प्रेरित के बचाव करथै, कि मुकति सिबाय यीसु मसीह 2:16 हे बिस्वास के दवारा मिलथै, हइ ऊ दयालु के परिनाम हबै जउन भगवान दिखाथै न कि मनसे जउन करथै।
रूप रेखा
1. पोलुस अपन चिट्ठी के सुरुवात गलातिया के मंडलिन के नमस्ते लग करथै। 1:1-5
2. ता पोलुस अपन खुद के कुछ परचा के ब्याख्या करै के अपन हक के रक्छा करै के निता अउ हइ दिखामै के निता ऊ नियम के जसना जीय के परयास करथै, पय ऊ काम नेहको करथै। 1:6—2:21
3. आगू ऊ मुकति हे नियम अउ अनुगरह के भूमिका के आगू गुठेथै। 3—4
4. फेर ऊ निक्खा मसीही जीवन के निता कुछ समान्य आदेस देथै। 5:1—6:10
5. पोलुस अपन चिट्ठी के अक्ठी नमस्ते अउ आखरी बिनती के संग हइ सुरता रखै के निता खतम करथै, कि भगवान दवारा अक्ठी नबा मनसे हे बदलै जाय बाहरी नियम लग कहुं जादा खास हबै जसना कि सुध्दिकरन करे जायके। 6:11-18
1
सोगत
1 हइ चिट्ठी पोलुस के पार लग हबै, जउन अक्ठी चेला हबै, जउन न कउनो मनसेन के पार लग अउ न मनसे के दवारा, बलुक खुदय यीसु मसीह अउ भगवान बाफ मोके चेला ठहराय हबै, जउन यीसु के मरे हर मसे फेरै जिन्दा करिस। 2 मै अउ जेतका भाई बेहन मोर संग हबै, गलातिया परदेस के मंडली के सोगत करथन।
3 हमर बाफ भगवान अउ परभु यीसु मसीह तुमही अनुगरह अउ सान्ति दे।
4 मसीह हमर पापन के खातिर अपन खुद के दइ दइस, जेखर लग ऊ हमर बाफ भगवान के इक्छा के जसना हमके बरतमान पापमय युग दुनिया लग हमके छडाबै। 5 ओखर महिमा अउ बडाई सबरोज होवत रहै। ओसनेन होय।
अउ कउनो दूसर संदेस नेहको
6 मोके चकित होथै, कि एतका हरबी तुम यीसु मसीह लग जउन अपन बडे अनुगरह किरपा लग तुमके मुकति दय रथै, तुम मनसेन दूसर के संदेस के स्वीकारथा। 7 पय ऊ दूसर संदेस नेहको हबै, पय बात ई हबै कि केतका असना हबै जउन तुमके तकलीप देथै अउ मसीह के संदेस के बिगाडै चाहथै। 8 पय अगर हम या स्वरग लग कउ स्वरगदूत ऊ संदेस के छांड कउनो दूसर संदेस सुनामै ता ऊ सापित हबै, 9 जसना हम पहिले कहि चुके हवन, उहै दोहराथो जउन सुभ संदेस तोके मिले हबै, अगर कउ ओखर ले अलगे सुभ संदेस तोके सुनाही ता ऊ सापित हबै।
10 अब मै का मनसेन के मानथो या भगवान के? का मै मनसेन के खुस करै चाहथो? अगर मै अब तक मनसेन के खुस करै चाहथो, ता मै मसीह के हरवाह नेहको होतो।
मसीह कर सेबा करै बाले बना
11 पिरिया हे भाई, मै तुम मनसेन के बिस्वास देबाउथों, कि जउन संदेस मै सुनाय हव, ऊ कउनो मनसे के दिमाक के उपज नेहको हबै। 12 मै कउनो मनसे के हाथ लग उके न तो ग्रहन करेव अउ न सिखहों बलुक खुदय यीसु मसीह ओही मोर हे परगट करिस।
13 यहूदी समाज हे जउन पहिले मोर चाल चलन रथै, ओखर बारे हे तुम सुन चुके हबा कि मै भगवान के मंडली के बोहत सताउत अउ बरबाद करत रहों। 14 अपन बोहत बेरादरी बालेन लग जउन मोर उमर के रथै, यहूदी समाज हे बोहत आगू रहन अउ अपन परदादन के रीति रिबाज हे बोहत आगू रथो।
15 पय भगवान के जउन मोर दाय के लादा लग मोके ठहराइस अउ अपन अनुगरह लग बुलाइस✡यसा 49:1-5; इरमि 1:5, 16 जब इक्छा हुइस कि मोर हे अपन टोरवा परगट करिस, कि मै गैर यहूदी के ओखर संदेस सुनाई, ऊ टेम हरबी मै कउनो मनसे लग कउनो मेर के सलाह खून लग नेहको लयो। 17 अउ न मै उन मनसेन के लिघ्घो यरुसलेम गयों, जउन मोर लग पहिले चेला बन गय रथै, बलुक मै अरब इलाका के कढ गयों अउ फेर उहां लग दमिस्क लउट आयों। 18 फेर तीन साल के बाद मै पतरस कैफा लग जानकारी पावै के निता यरुसलेम गयों अउ ओखर लिघ्घो पंदरह रोज तक रहों। 19 पय उहां मै परभु के भाई याकूब के छांडके अउ कउनो दूसर चेला लग नेहको मिलो।
20 जउन बात मै तुमके लिखथो, देखा, भगवान के उपस्थित जानके कथो, कि ऊ झूठ नेहको हबै।
21 एखर बाद मै सीरिया अउ किलिकिया परदेस हे गयों। 22 पय यहूदिया के मंडली जउन मसीह के मानथै, मोके कबहुन नेहको देखे रथै। 23 पय इहै सुनै करत रथै कि जउन हमके पहिले सताय रथै, ऊ अब उहै बिस्वास के संदेस सुनाथै, जउन पहिले नास करै के परयास करथै। 24 अउ मंडली मोर बारे हे भगवान के महिमा करथै।
✡1:15 यसा 49:1-5; इरमि 1:5