याकूब की चिट्ठी
याकूब कर चिट्ठी
परचा
याकूब के किताब याकूब नाम के कउनो मनसे दवारा लिखे गय रथै, हइ यीसु के भाई याकूब रथै, जउन सुरू के मंडली हे अक्ठी अगुवा रथै अउ यरुसलेम के परिसद के हिस्सा रथै, प्रेरितो 15:13 प्रेरित पोलुस उके गलातियों 2:9 हे मंडली के खम्भा कथै, दिमाक बाले के मानै के हबै कि याकूब के किताब यीसु के पइदा के करीबन 50 साल बाद लिखे गय रथै, पय याकूब यरुसलेम के मंडली के अगुवा रथै, ऊ सम्भव उहां रहत किताब लिखे रथै।
याकूब अपन किताब के गैर यहूदी हे फइले हर बाराठे कुर1:1 के संकेत करथै। याकूब के पाठ सगलू मसीहन हे लागू होथै पय बारा कुर सबरोज के निस्तार लग हइ साबित हुइ जथै, कि याकूब सीधा यहूदी मसीही के लिखथै, पय हइ किताब पढै बाले के अक्ठी ब्यापक समूह तक पहुंचै के निता रथै, ई कइठे बिसय के संबोधित करथै, याकूब बिस्वास अउ काम के बीच सबंध हे धियान लगाथै, सही बिस्वास करवाय के दिखाय जही। 2:17 ऊ धन्नड मनसे 2:14 के परति पक्छपात दिखामै के खिलाफ चेतन्त करथै अउ हमके गुठेथै कि हम जउन कथन ओखर लग हुसियार रहा। 3:1-12
रूप रेखा
1. याकूब अपन किताब के पढै बालेन के सोगत करथै। 1:1
2. एखर बाद ऊ मसीही के प्रोत्साहन करथै कि जब ऊ कस्ट सहै के मजबूत बने रहै। 1:2-27
3. फेर ऊ कथै कि करम के दवारा बिस्वास के परगट होमै के कइसन जरूरी हबै? 2:1-26
4. ओखर बाद ऊ कथै कि मुंह लग निकरे सब्द केतका सक्तिसाली हुइ सकथै। 3:1-12
5. तब याकूब हबै कि कइसन भगवान के बुध्दि दुनिया के बुध्दि लग अगले हबै। 3:13—4:10
6. एखर बाद ऊ अपन पढै बाले के घमंड होमै के खिलाफ चेतन्त देथै। 4:11—5:6
7. याकूब कुछ सही निरदेस दइके अपन किताब हे समापत करथै। 5:7-20
1
सोगत
1 हइ चिट्ठी भगवान अउ परभु यीसु मसीह के हरवाह याकूब के पल्ला लग हबै, दुनिया भर हे फइले हर बाराठे कुर के नमस्ते।
बिस्वास कर परिक्छा
2 हे मोर भाई अउ बेहन, जब तुम्हर उप्पर कइन मेर के परिक्छा हे पडा, तब इके बडा खुसी के बात समझिहा। 3 काखे तुम जानत हबा कि तुम्हर बिस्वास के परिक्छा होय के बाद धीरज पइदा होथै। 4 धीर के अपन काम पूर करै देया कि तुम निरदोस अउ सिध्द हुइ जा, अउ तुम हे कउनो मेर के कमी झइ रहै। 5 अगर तुम्हर मसे कउनो के दिमाक के कमी होय ता भगवान लग पराथना करा ता तुमही दिमाक मिलही, काखे भगवान खुले हाथ बाले अउ खुसी लग सब के देथै। 6 पय उके बिस्वास के संग अउ बिना सक के पराथना करै चाही, काखे जउन सक करथै, ऊ समुन्दर के लहरा के जसना हबै, जउन हवा लग इछो-उछो उछलथै। 7 असना मनसे हइ झइ समझै कि मोके परभु लग कुछु मिलही, 8 असना मनसे सक्की मन के बजय लग अपन सगलू आदत हे स्थिर नेहको हबै।
गरीबी अउ अमीर
9 तरी पद बाले भाई मसीही मनसे, अपन ऊंच पद हे खुस रहै। 10 जउन धनी मनसे हबै, उनके खुस रहै चाही, काखे ऊ जंगली चारा के फूल मेर नास हुइ जही। 11 जब बेरा निकरथै, अउ घांम तिपै लग चारा मुरझाय जथै अउ फूल झर जथै, अउ ओखर चमक नास हुइ जथै, इहैमेर धनी मनसे अपन रास्ता हे चलत-चलत अउ अपन तरीका लग जिन्दगी बिताउत अक रोज माटी हे मिल जइहिन✡भजन 102:11; यसा 40:7-8।
परिक्छा
12 धन्य हबै ऊ, जउन मनसे परिक्छा हे ठाड रथै काखे परिक्छा हे खरा उतरै हे उके जीवन के ऊ मुकुट मिलही, जेही परभु अपन सेबक के दे के टीमा अपन माया करै बाले लग करे हबै। 13 परिक्छा हे पडे हर कउ हइ झइ कहै, कि भगवान मोके परिक्छा हे डाले हबै, काखे न तो भगवान के कउनो परिक्छा हे डाले जा सकथै, अउ न ऊ खुद कउनो के परिक्छा हे डालथै। 14 पय हर मनसे अपनै अभिलासा हे फसके परिक्छा हे पड जथै 15 फेर अभिलासा गरभबती हुइके पाप के पइदा करथै अउ पाप जब बढ जथै ता मिरतू के पइदा करथै।
16 हे मोर पिरिया भाई अउ बेहन, तुम धोखा झइ खा। 17 काखे हर अक्ठी निक्खा बरदान अउ निरदोस दान बाफ लग हबै, मतलब उजियार के बनामै बाले भगवान के पल्ला लग हबै, जेहमा न तो कउनो बदलाव हबै अउ न अदल-बदल हबै। 18 भगवान अपनै इक्छा लग सही के बचन के दवारा हमके जीवन दय हबै, जेखर लग हम अक मेर लग ओखर बनाय हर पहिला फडुहा बनी।
ओखर बचन सुना अउ ऊ रास्ता हे चला
19 हे मोर पिरिया भाई अउ बेहन, तुम हइ अच्छी तरह लग समझ लेया, हर मनसे सुनै के निता तइयार रहा, पय बोलैका अउ गुस्सा करै हे धीम रहा, 20 काखे मनसे के गुस्सा भगवान के नियाइपन के निरवाह नेहको के सकथै। 21 इहैनिता तुम्हर जिन्दगी हे जउन बुराई अउ गुस्सा हबै, उके दूर करके ऊ संदेस के नमरता लग अपनाउत जा, जउन तुम्हर मन हे बोय जथै, अउ तुम्हर आतमा के मुकति करै हे सक्ति हबै।
22 पय बचन हे चले बाले बना, न कि सुनै बाले, जउन खुद के धोखा देथै। 23 काखे अगर कउ बचन के सिक्छा केबल सुनै बाले हबै अउ पालन नेहको करथै, ऊ उस मनसे के जसना हबै, जउन अपन मुंह अइना हे देखथै। 24 ऊ खुद के देख के कढ जथै, अउ उके सुरता नेहको रथै कि मोर सकल कइसन हबै। 25 पय जउन मनसे भगवान के सिध्द इक्छा के जसना करै के नेहको बिसरथै, ओखर काम के परिनाम धन्य होही।
26 अगर कउ मनसे खुद के भक्त समझथै अउ फेर अपन जीभ हे रोक नेहको लगाथै, ऊ अपन मन के धोखा हे रखथै अउ ओखर महिमा बेकार हबै✡भजन 34:13; 141:3। 27 हमर भगवान अउ बाफ के नजर हे बिलकुन सुध्द अउ निरदोस महिमा हइ हबै, परेसानी हे पडे अनाथ अउ बिधवा के सुधि ले अउ खुद के दुनिया के बेकार काम लग अलगे रखै।