मत्ती रचित यीशु मसीह का सुसमाचार
मत्ती रचित यीसु मसीह कर संदेस
परचा
मत्ती कर जसना संदेस नबा नियम कर चारठे किताब मसे अक्ठी हबै, जउन यीसु मसीह कर जीवन कर वरनन करथै। उन मसे हर संदेस कहे जथै, जेखर मतलब हबै “संदेस” ऊ यीसु कर मिरतू कर बाद मत्ती, मरकुस, लूका अउ यूहन्ना दवारा लिखे गय रथै, मत्ती कर जसना संदेस कब लिखे गय रथै, एही सटीक तारिख दिमाक बालेन कर नेहको पता हबै, पय हइ मसीह कर जनम के करीबन 60 साल बाद कर टेम रथै।
एखर सिबाय कछो लिखे गय रथै, हइ पता नेहको हबै, पय कइ मनसे अंदाजन लगाथै कि हइ फिलिस्तीन हे अउ सायद यरुसलेम सहर हे लिखे गय रथै। लिखे बाले मत्ती हबै जउन यीसु दवारा अपन चेला बनै कर निता कहै लग पहिलेन अक्ठी जिघा करे बाले रथै। ओही लेवी कर नाम लग जाने जथै, मत्ती बाराठे चेला मसे अक्ठी रथै। अउ ऊ यहूदी पढै के निता लिखे रथै, इके पुरान नियम कर पवितर किताब 60 लग जादा संदरभन के दवारा स्पस्ट रूप लग देखे जाय सकथै। ऊ हइ दिखामै चाहथै कि यीसु मसीहा रथै, भगवान कर चुने हर मुकतिदाता, जेखर बारे आगुन लग गुठे गय रथै। मत्ती भगवान कर राज कर बारे हे बोहत कुछ लिखिस।
यहूदियन कर बिस्वास रथै, कि मसीहा अक्ठी राजनीतिक राज कर राजा बनही। मत्ती भगवान कर आतमिक राज कर वरनन करके ऊ बिस्वास कर चेतन्त देय के निता बोहत सचेत गुठेथै। मत्ती कर जसना संदेस पुरान नियम सगलू संदर्भो के कारन नबा नियम कर सुरू करै के निता अक्ठी निक्खा किताब हबै। हइ दुइ बसीहत नाम जोडथै, दिमाक बालेन के इहो सलाह दय हबै कि मत्ती मूसा कर किताबन के रूप नकल करै के कोसिस करत होही, जउन पुरान नियम कर पहली पांच किताब हबै। डोंगर हे यीसु कर सिक्छा 5—7 कर बरोबरी भगवान दवारा मूसा कर नियम देय लग करे जाय सकथै। बेवस्थाबिबरन 19:3—23:25
रूप रेखा
1. मत्ती हे यीसु मसीह कर जनम अउ ओखर सेबकाई कर सुरुवात के बारे हे गुठे के संदेस के सुरुवात करथै। 1—4
2. आगू मत्ती हे यीसु कर सेबकाई अउ ओखर कइ सिक्छन के वरनन करथै। 5—25
3. मत्ती आखरी के भाग हे यीसु कर मिरतू अउ फेरै लग जिन्दा ओखर सेबकाई कर ऊंचाई के बारे हे हबै। 26—28
1
यीसु मसीह कर पुरखा
(लूका 3:23-38)
1 अब्राहम कर पुरखा, दाऊद कर पुरखा यीसु मसीह कर पुरखा हइ मेर हबै।
2 अब्राहम कर टोरवा इसहाक रथै अउ इसहाक कर टोरवा याकूब होथै, फेर याकूब लग यहूदा अउ ओखर भाई पइदा होथै। 3 यहूदा कर टोरवा रथै पेरेस अउ जोरह उनखर दाय कर नाम तामार रथै, पेरेस, हेस्रोन कर बाफ रथै, हेस्रोन एराम कर बाफ रथै। 4 एराम अम्मीनादाब कर बाफ रथै, अम्मीनादाब लग नहसोन अउ नहसोन लग सलमोन पइदा हुइस। 5 सलमोन लग बोवज पइदा होथै, बोवज कर दाय कर नाम राहाब रथै, बोवज अउ रूत लग ओबेद पइदा होथै अउ ओबेद इसै कर बाफ रथै।
6 अउ इसै लग दाऊद राजा पइदा होथै, उरिय्याह कर बिधवा डउकी दवारा दाऊद लग सुलेमान पइदा होथै। 7 सुलेमान लग रहबाम पइदा होथै, रहबाम कर लरका अबिय्याह लग आसा पइदा होथै। 8 अउ आसा यहोसाफात कर बाफ रथै, यहोसाफात लग योराम पइदा होथै अउ योराम लग उज्जियाह पइदा होथै। 9 उज्जियाह योताम कर बाफ रथै, अउ योताम लग आहाज पइदा होथै, आहाज लग हिजकिय्याह पइदा होथै। 10 हिजकिय्याह लग मनस्सिह पइदा होथै, मनस्सिह आमोन कर बाफ रथै। अउ आमोन लग योसिय्याह पइदा होथै। 11 अउ इस्राएल कर मनसेन कर गुलाम बनाय के बेबीलोन लइ जात टेम योसिय्याह लग यकुन्याह अउ ओखर भाई पइदा होथै।
12 बेबीलोन हे लइ जाय के बाद यकुन्याह कर सालतीयल कर बाफ बनथै अउ फेर सालतीयल लग जरूब्बाबिल पइदा होथै। 13 जरूब्बाबिल लग अबीहूद पइदा होथै अउ अबीहूद लग इल्याकीम अउ इल्याकीम लग अजोर पइदा होथै। 14 अजोर सदोक कर बाफ रथै, सदोक लग अखीम अउ अखीम लग इलीहूद पइदा होथै। 15 इलीहूद इलियाजार कर बाफ रथै अउ इलियाजार लग मत्तान अउ मत्तान लग याकूब पइदा होथै। 16 अउ याकूब लग यूसुफ पइदा होथै, जउन मरियम कर डउका रथै, मरियम लग यीसु पइदा होथै, जउन मसीह कहाथै।
17 इहैमेर अब्राहम लग दाऊद तक चउदाठे पुरखा होथै अउ दाऊद लग लइके गुलाम बनाय के, बेबीलोन पहुंचाय जाय तक के चउदह पुरखा होथै अउ गुलाम बनाय के बाबुल पहुंचाय जाय तक मसीह कर पइदा तक चउदह पुरखा हुइस।
यीसु कर पइदा
(लूका 1:26-38; 2:1-7)
18 यीसु मसीह कर पइदा हइ मेर होथै, जब ओखर दाय मरियम कर ओली फलदान यूसुफ कर संग होथै, पय असना होथै कि काज होय लग पहिलेन मरियम पवितर आतमा कर दवारा देह हे हुइ जथै। 19 यूसुफ धरमी मनसे होय के कारन मरियम कर बेज्जती नेहको करै के चाहथै, पय ओही लुके छुपे उतरवामै के बिचार करथै, 20 जब यूसुफ हइ बातन के बारे हे सोचथै बिचारथै, ता उके सपना हे परभु कर स्वरगदूत आय के कथै, हे यूसुफ दाऊद कर टोरवा, अपन डउकी मरियम के अपन घर छो लाने लग झइ डर काखे जउन ओखर देह हे हबै, ऊ पवितर आतमा के दवारा हबै। 21 ऊ अक्ठी टोरवा पइदा करही, तै ओखर नाम यीसु धरबे काखे ऊ अपन मनसेन कर उनखर पापन लग मुकति करही।
22 हइ सगलू इहैनिता हुइस, कि भगवान कर संदेस जउन बचन परभु ग्यानी मनसे के दवारा कहे रथै, ऊ पूर होय। 23 “देखा, अक्ठी कुमारी देह हे होही अउ अक्ठी टोरवा के पइदा करही। अउ ओखर नाम इम्मानुएल रखे जही,” जेखर मतलब हबै “भगवान हमर संग हबै।”
24 जब यूसुफ नींद लग जागथै, ता परभु के स्वरगदूत कर आदेस के जसना ऊ मरियम लग काज कर लेथै अउ ऊ अपन घर हे लइ आनथै। 25 अउ जब तक मरियम टोरवा के पइदा नेहको करिस, तब तक यूसुफ ओखर लिघ्घो नेहको गइस अउ यूसुफ ओखर नाम यीसु धरथै।