Ci lɛɛkarɛ hɔ kʊ
ZAAN
a ba
Zaan ciro wɔɔ
gasʊʊrɛ
Lɛɛkarɛ kristagʊɔɔ wɔɔ y'a hɩrɛ, ŋ ʊ: ciro kaakʊrɔ nɔɔn duro, Yeezuu Krista karɩndanyɩ deem k'a tɔ m Zaan yɩ ŋ gʊrsɩra ba, a bɩr a mɩŋŋa tɔ hɩm ciro wɔɔ ʊ y, a hɩ a nawʊrɛ a mɩŋŋa ma Gʊaagʊsire ciro wɔɔ nɔ ʊ. Ciro wɔɔ ba a ʊ, a gusimbaa dɔmɩm ʊ. Ɩ ʊ, Efɛɛzɩ Zaan nyɩnta ʊ an ciro wɔɔ ba ʊ.
Ci lɛɛkarɛ hɔ kʊ Zaan a ba bɩ
gasʊʊrɛ
Zaan bɩ, lɛɛkarɛ ci bɩ ba a ʊ, kristagʊɔɔ ma. A lɛ n taa k'a ŋ paŋŋa da ra kʊ ŋ nɩ mɩsɩrbaa ba Woso kan Krista kɩ zɛkʊra nɔ ʊ, kʊ mɩsɩrbaa bɩ do n nyɩnta kʊ ŋʊarɛ zibəə nɔ ʊ. Kʊ ŋ nɩ dundo a zi sɔ kan ŋʊaar hɔdɩndarɛrɔ kɩ, bala, gʊɔɔ ɩ nyɩnta ŋn'ɩ ŋʊaar hɔ dɩndam lɛɛ haay ʊ. Mim k'a n'a hɩrɛ an lɛ da b'ɩ yɩrɛ ɩ ʊ, lemim nyɩnta bɩ sɩra k'a n'a hɩm bɩ bɩr a nʊkʊrɛ y, b'a kʊ yɩm haay.
Ⅰ
Kasɛtɩzaa paan… mindində
Ⅰ Hɔ k'a nyɩnta ʊ a sɩŋŋɩda ʊ, wɔɔ n a ma, wɔɔ n a yɩ, ʊ mɩm m. Wɔɔ n dɩga a sɩɩ…, ʊ ʊ wɔ da ma, an nɩ mɩsɩrbaa Lemim dɩndam bɩ, Ⅱ bala, mɩsɩrbaa bɩ do a hɩnka wɔɔ n a yɩ, ʊ n'a kasɛtɩ karɛ, ʊ nɩ mɩsɩrbaa k'a nyarɛ ba ʊ bɩ mim hɩrɛ awɔɔ m. A ɩ nyɩnta Zɩ zi, an b'a hɩnka wɔɔ m. Ⅲ Hɔ kʊ wɔɔ yɩ, ʊ a ma sɔ bɩ, wɔɔ y'a pa darɛ awɔɔ m sɔ, k'awɔɔ n a da ma, a a zɛ kʊ ra kan wɔɔ kɩ. Bɩ wɔɔ ʊ zɛ kʊ ra kan Zɩ kɩ kan a Nyɩ Yeezuu Krista kɩ. Ⅳ Naa wɔɔ n'a gʊrsɩra barɛ awɔɔ ma, kʊ wɔɔ heernyɔɔ bɩ n yɩ gʊta.
Ʊ ta Woso lɛɛgure nɔ ʊ
Ⅴ Lemim kʊ wɔɔ ma zi, ʊ n'a pa darɛ awɔɔ m bɩ ba n nɩ. Woso bɩ, lɛɛgure m. Monsigə ba zi fɩɩgaa y. Ⅵ Kʊ wɔɔ hɩ, wɔɔ ʊ: «Wɔɔ ʊ zɛ kʊ ra kan kɩ», ʊ bɔkarɛ, ʊ nɩ tam monsigə ʊ, ŋʊaar wɔɔ n'a barɛ, bɩ wɔɔ bɩr sɩra barɛ y. Ⅶ Bɩ, kʊ wɔɔ ɩ tam lɛɛgure ʊ, amba a mɩŋŋa nɩ lɛɛgure nɔ ʊ bɩ nɩ, wɔɔ ʊ zɛ kʊ ra kan ʊ muno kɩ, b'a Nyɩ Yeezuu bɩ ma bɩ nɩ wɔɔ hubɔm wɔɔ mimbʊnyaarɔ haay nɔ ʊ. Ⅷ Bɩ kʊ wɔɔ ʊ: «Mimbʊnyaa ba wɔɔ ma y», bra wɔɔ n'a barɛ ʊ mɩŋŋɔɔ m, sɩra bɩ wɔɔ nɔ ʊ y. Ⅸ Kʊ wɔɔ ʊ mimbʊnyaarɔ bɔ ʊ lɛ ma Woso taa, a wɔɔ mimbʊnyaarɔ sugur kam wɔɔ ʊ, an tɩrgabaawar haay gʊ wɔɔ ma, bala, sɩrazaa m b'a tɩrga sɔ. Ⅹ Kʊ wɔɔ hɩ, wɔɔ ʊ: «Mimbʊnyaabənno bɛɛ m wɔɔ nɩ», a ba wɔɔ ʊ ŋʊaarzaa, b'a meerbaa ba wɔɔ nɔ ʊ y.