Ⅰ Hɔ kʊ mɔɔ cɩnta m heer ʊ bɩ ba n nɩ: Mɔɔ bɩ n bɔrɛ m bʊr awɔɔ zi b'ʊ heerzar nɔ ʊ y. Ⅱ Kʊ mɔɔ awɔɔ heer zaar ba, nka nɩ heernyɔɔ kam mɔɔ ʊ, k'awɔɔ kʊ mɔɔ awɔɔ heer zaar ba rɔ wɔɔ bɛɛ nɩ? Ⅲ Naa tɔ ma m mɔɔ n lɛɛ ka m ci ba awɔɔ ma ncɩnaaʊ, kʊ mɔɔ n a ŋʊa kʊ m bʊr awɔɔ zi k'awɔɔ n mɔɔ da heerzar ma, an bɔkarɛ awɔɔ y'a ga m a mɔɔ heer nyɔɔ bɩ tɔ ma m. Bɩ, mɔɔ dɔ paan… m ʊ, awɔɔ haay, kʊ mɔɔ ɩ heernyɔɔ m, awɔɔ heernyɔɔ m sɔ. Ⅳ Ci bɩ do kʊ mɔɔ ba awɔɔ ma naa, a n yɩ mɔɔ ma naanaa y, a ba mɔɔ ʊ kan heerzar kɩ, m nyi ka. Mɔɔ n a ŋʊa kʊ m awɔɔ heer zar y, ci bɩ ba mɔɔ ʊ k'awɔɔ n a dɔ a ʊ, mɔɔ y'awɔɔ ŋʊam gʊta.

Ⅴ K'awɔɔ gʊaa nyɩnta an bʊr heerzar nɩ, mɔɔ bɛɛ a m heer zar y, awɔɔ haay a a heer zar, gɛɛ awɔɔ gʊɔɔ gɔsɩnnɔ m. Ⅵ A da k'awɔɔ ʊ kʊ ʊ a hʊnhʊr bɩ, a a zaa bɔ. Ⅶ Naa tɔ ma bɩ, k'a sugur ka ʊ, a heer wʊta, k'a heer b'a zar an bɔɔlam ba y. Ⅷ Bɩ y'a ka mɔɔ n'a yɛrɛ awɔɔ han k'a a ŋʊarɛ hɩnka m. Ⅸ Bala, ci bɩ kʊ mɔɔ ba awɔɔ ma bɩ, m ka mɔɔ ʊ ma kʊ m dɩga a k'awɔɔ ɩ mim sim fasɩ-fasɩ gɛ. Ⅹ K'awɔɔ sugur ka gʊaa ʊ, mɔɔ ɩ sugur karɛ a zaa ʊ sɔ. Bɩ kʊ mɔɔ sugur ka gʊaa ʊ, k'a ɩ yɩrɛ ɩ ʊ a ga a ʊ m kʊ m sugur ka ʊ, a ba mɔɔ nawʊm awɔɔ tɔ ma, Krista mɩm m. Ⅺ A ba wɔɔ nawʊrɛ ncɩnaaʊ, k'ʊ bɩ zaa ka Sʊtaana ʊ, k'an wɔɔ ku y. Bala, gɩngarɔ k'an ta m nɔ wɔɔ, wɔɔ ŋ dɔ mɩŋŋa.

Ⅻ Mɔɔ m hʊr m ta Trowas ʊ, kʊ m aa Krista lemim nyɩnta pa da, kʊ mɔɔ yaa lee ku bɩ, mɔɔ yaa dɩga a Zuuba zaa banka gʊta, kʊ m lemim bɩ pa da. ⅩⅢ Bɩ, heerkɔrɛ gʊta mɔɔ nyɩnta a nɔ ʊ, kʊ mɔɔ n wɔɔ danyɩ Tiitɩ yɩ bɩ tɔ ma. A m naa, mɔɔ n zaa yɛ Trowas gʊɔɔ wɔɔ han m m len so ŋ nɩ, m m hʊr, m ta Masedʊan ʊ.

ⅩⅣ Krista a da a jɩnnɔ haay ma, an nɩ ŋ gɩngaatarɛ an nɩ yirbə sire ŋ nɩ. Woso tɔ n lɛbɔʊrɛ yɩ, k'a nɩ wɔɔ gaam Krista da ma naa do nɔ ʊ dɔmɩm haay, an n'a kam gʊɔɔ nɩ Krista dɔm lɛɛ haay ʊ bɩ minto. ⅩⅤ Bala, wɔɔ bɔ kʊ ʊ kan tidəər ji nyɩnta kɩ, Krista n'a kam Woso ʊ, gʊɔɔ kʊ ŋ nɩ bʊmbɔrɛ zaa ra rɔ wɔɔ, kan gʊɔɔ kʊ ŋ n'ɩ nyaanɩm nɔ wɔɔ k'ɩ dɩgam wɔɔ ma tidəər. ⅩⅥ Kʊ gʊɔɔ kʊ ŋ n'ɩ nyaanɩm nɔ wɔɔ nɩ, kan brɔɔ kɩ zɛ wɔɔ nɩ zɛm nɩ, ŋn'ɩ gɩngarɛ, gʊɔɔ kʊ ŋ nɩ bʊmbɔrɛ zaa ra rɔ wɔɔ, kan brɔɔ kɩ, mɩsɩrbaa wɔɔ nɩ zɛm nɩ, ŋn'ɩ mɩsɩrbaa yɩm sɔ. Bɩ, kʊ Woso bɛɛ m, nka ɩ wɔ ʊ, an nɩ zi naa do barɛ? ⅩⅦ Wɔɔ n bɔ kʊ ʊ kan gʊɔɔ kʊ ŋ Woso lemim bɩ sa, ŋn'ɩ ter bam nɩ rɔ wɔɔ kɩ y. Bɩ kʊ Woso mɩŋŋa ɩ wɔɔ nyɔɔ bɩ, a lemim bɩ pa wɔɔ n'a dam kan sɩra kɩ, a mɩm m, kʊ Krista zibəənyɩnɔ m wɔɔ m bɩ tɔ ma.