Ci kʊ Pol a ba
KOLƆƆSƖ ZANNƆ
ma
Ci kʊ Pol a ba Kolɔɔsɩ zannɔ ma bɩ
gasʊʊrɛ
Pol ɩ ci bɩ ba. A ba a ʊ Efɛɛzɩ zannɔ ci bɩ barɛ dɔmɩm ʊ. Kolɔɔsɩ kʊ bɩ, Pol mɩŋŋa n ta b'ʊ y, a zibəəkɔɔn deem k'a tɔ m Epafras kʊ m, b'ɩ lemim nyɩnta bɩ pa da ʊ sɔ.
Ci bɩ ba Pol ʊ, bɩ ma bɩ, a ɩ lɔnnɔcɛ ʊ Rɔm ʊ. Ci bɩ ba a ʊ, k'a Kolɔɔsɩ gʊɔɔ wɔɔ bɔ zaa ʊ ʊ, kʊ ŋ bɩ zu ŋʊaarhɔdɩndarɛ ʊ y, bala, gʊɔɔ ɩ ba hɩ ŋ nɩ, ŋ ʊ, pakra m kʊ ŋ nɩ fɩr ka a mɩŋŋɔɔ ma ziro ba, kan baŋŋʊgasʊrɛ kɩ, minno vantɔɔ kɩ. Bɩ y'a ka Pol n ci ba k'a hɩ ŋnɩ a ʊ, Yeezuu Krista bala nɩ gʊaa bʊmbɔm fasɩ.
Ci b'ɩ mɩsɩrbaa kʊ kristagʊɔɔ a ga m ŋn'a ba bɩ hɩnkam. Bɩ, Krista wɔɔ ʊ ga m ʊ yo ma, ʊ gɔɔta kan kɩ dɔmɩm haay, an nɩ wɔɔ yɔm lɔmbaa do haay wɔ ʊ.
Ⅰ
Pol ɩ yaa dam Kolɔɔsɩ zannɔ m
Ⅰ Mɔɔ mɩŋŋa Pol, Woso ɩ mɔɔ bɔ ʊ kʊ m yɩ Krista Yeezuu zibəəzaa. Mɔɔ kan wɔɔ danyɩ Timote kɩ m nɩ ci bɩ barɛ awɔɔ ma. Ⅱ Awɔɔ, kʊ wosogʊɔɔ n'a mɩ, an nɩ Kolɔɔsɩ ʊ rɔ wɔɔ, wɔɔ danyɩnɔ n'awɔɔ m Krista nɔ ʊ, awɔɔ ɩ tarɛ a lɛ ra. A yɛ wɔɔ nawʊm kʊ wɔɔ Zɩ Woso n barka kan laafɩɩ kɩ ka awɔɔ ʊ.
Pol ɩ Woso barka dam Kolɔɔsɩ zannɔ tɔ ma
Ⅲ Kʊ wɔɔ ɩ yaa dam Woso m awɔɔ tɔ ma, wɔɔ Zuuba Yeezuu Krista Zɩ bɩ, wɔɔ ɩ yaa dam nɩ barka dɔmɩm haay. Ⅳ Wɔɔ ma denter n n'awɔɔ sɩra ka Krista Yeezuu ʊ mim hɩm, kan ŋʊarɛ k'awɔɔ n ta m wosogʊɔɔ wɔɔ haay tɔ ma bɩ mim kɩ. Ⅴ Awɔɔ ɩ sɩrakarɛ m, a n nɩ ŋʊarɛ m, bala, Woso hɔ cɩnta awɔɔ m arzana ʊ, awɔɔ n a ta a heer lɛ. Bɩ lemim nyɩnta kʊ n y'a pa da awɔɔ m, a m sɩra lemim b'ɩ taaheerlɛ bɩ do ka awɔɔ ʊ. Ⅵ Lemim nyɩnta bɩ do ɩ tam durnya lɛɛ haay ʊ, an nɩ nyɩ dam, an n'a kərgum lɛɛ ra, amb'a a ba awɔɔ zi, Woso barka mim k'awɔɔ ma bɩ dɔmɩm ʊ saa…, a b'a dɔ a ʊ, barka paan… m bɩ. Ⅶ Wɔɔ zibəəkɔɔn Epafras naa do dɩnda awɔɔ m, wɔɔ gʊaasɩba m, Krista zibəənyɩ m, a m taalɛrazaa, zi bɩ ba a nawʊm kan awɔɔ kɩ wɔɔ bɩncɛ ʊ. Ⅷ A ɩ ŋʊarɛ kʊ *Sɛnt-Ɛspri a da awɔɔ heer ʊ bɩ mim hɩ wɔɔ m.
Ⅸ Bɩ y'a ka, hinni kʊ wɔɔ naa ma ʊ bɩ tɛkka ma, wɔɔ ɩ yaa darɛ awɔɔ tɔ ma dɔmɩm haay. A yɛ wɔɔ nawʊm Woso han, k'an a ka k'awɔɔ n a hɔɔnhɔ dɔ mɩŋŋa, a bɩr Sɛnt-Ɛspri mindɔrɛ m kan a hɔdɔrɛ kɩ m. Ⅹ Maam bɩ, awɔɔ y'a dam ma, a mɩsɩrbaa k'a Zuuba nɔ yɩ bɩ ba, a hɔɔnhɔ barɛ nɔ ʊ. Naa n'a kam awɔɔ n zi mɩŋŋa do haay ba, a ta lɛɛ Woso dɔrɛ nɔ ʊ. Ⅺ Wɔɔ y'a yɛm han sɔ k'an awɔɔ paŋŋa da ra, a mɩŋŋa paŋŋa k'a cem hɔ haay han bɩ m. K'awɔɔ n a da ma a bɩr a tʊntɔŋ ʊ, a bʊr a ma hɔ haay nɔ ʊ. Ⅻ K'a Zɩ Woso barka da kan heernyɔɔ kɩ, a ɩ zaa ka k'awɔɔ n hɔjirle yɩ kan a gʊɔɔ wɔɔ kɩ lɛɛgure nɔ ʊ. ⅩⅢ A wɔɔ yɔ monsigə paŋŋa wɔ ʊ, an ta wɔɔ m a Nyɩ k'a n'a ŋʊam bɩ cirbəə nɔ ʊ. ⅩⅣ A Nyɩ bɩ tɔ ma m, Woso wɔɔ bʊmbɔ, an wɔɔ mimbʊnyaarɔ sugur ka wɔɔ ʊ.
Yeezuu zɛ wɔɔ zɛ kʊ ra kan Woso kɩ
ⅩⅤ Gɔsɩ bɩr Woso yɩrɛ y,
bɩ kʊ gʊaa Yeezuu yɩ,
k'a lʊnlɔ Woso maam.
A m lɛɛkarɛzaa an nɩ hɔ haay
kʊ Woso a da bɩ burə ʊ.
ⅩⅥ Bala, zu Woso ʊ kʊ ʊ kan kɩ
an hɔ haay da,
brama ʊ kan tara burə ʊ kɩ,
hɔɔ kʊ ŋ nɩ yɩm mɩm ʊ
kan hɔɔ kʊ ŋ bɩr yɩm kɩ,
cirbəəro, kan lɛɛsoʊrezannɔ kɩ,
lɛɛzannɔ kɩ, paŋŋazannɔ kɩ.
Zu Woso ʊ kʊ ʊ kan kɩ
an hɔ haay da,
an a ka ʊ, an a so ʊ.
ⅩⅦ A ɩ lɛɛ ka an ta ʊ,
hɔ haay lɛɛ,
a tɔ ma m hɔ haay n gɔɔta an a bɩncɛ ʊ.
ⅩⅧ A mɩŋŋa n a gʊɔɔ wɔɔ sokʊma bɩ minzaa.
A m lɛɛkarɛzaa,
a ɩ lɛɛ ka an a mɩm bɔ ʊ gəəno bire ʊ,
k'a gɔɔta a bɩr hɔ haay lɛɛ,
hɔ haay nɔ ʊ.
ⅩⅨ Bala, Woso mɩŋŋa y'a ŋʊa
k'an yɩ an a mɩŋŋa m jilli.
ⅩⅩ Woso a cɩnta,
k'a hɔ haay zɛ kʊ ra kan a kɩ
a Nyɩ bɩ tɔ ma,
hɔɔ kʊ ŋ nɩ brama kan tara burə ʊ kɩ,
ga k'a ʊ gɔdarkʊra ma bɩ tɔ ma.
ⅩⅪ B'awɔɔ, awɔɔ nyɩnta biisi a m laatʊ Woso ma, zibəə bʊnyaarɔ k'awɔɔ n'a hɔɔn darɛ ŋ ma, a nɩ ŋ bam nɔ wɔɔ a ka, awɔɔ n a ba a jɩnnɔ. ⅩⅫ Kɛɛrɛ naa, Woso awɔɔ zɛ kʊ ra kan a kɩ a Nyɩ bɩ k'a ga mɛsim nɔ ʊ bɩ tɔ ma. A ba a ʊ maam, k'awɔɔ n bɩ jɩm a lɛɛ, k'awɔɔ n bɩr mɩŋŋabaa nɔ ʊ, kʊ minsi bɩ nyɩnta awɔɔ gʊr zi y. Kʊ gɔsɩ bɩ mim yɩ k'a hɩ awɔɔ ma y. ⅩⅩⅢ Bɩ, a y'awɔɔ ma k'awɔɔ n gɔɔta a bɩr sɩra kam, a jɩm kɔɔkɔɔ, a b'a to kʊ hɔsɩ n awɔɔ gʊ taaheerlɛ kʊ lemim nyɩnta k'awɔɔ ma b'a ka awɔɔ ʊ bɩ ma y. N lemim nyɩnta bɩ do pa da gʊaa haay m durnya nɔ ʊ, bɩ mɔɔ mɩŋŋa Pol, m ba mɔɔ ʊ a zibəənyɩ.
Zi kʊ Pol n'a bam
ⅩⅩⅣ Kɛɛrɛ naa, mɔɔ yɩ m heer nyɔɔm fɩr kʊ mɔɔ n'a yɩm k'awɔɔ n daahan yɩ a nɔ ʊ bɩ tɔ ma. Bɩ, mɔɔ gɔɔta m nɩ Krista fɩryɩrɛ bɩ yɩrɛ m mɛ ʊ, a mɛ bɩ tɔ ma, naa k'a hɩ a ʊ, a gʊɔɔ wɔɔ so kʊ ma. ⅩⅩⅤ Zibəə kʊ Woso a da mɔɔ wɔ ʊ kʊ m a ba k'awɔɔ n daahan yɩ bɩ tɔ ma m, mɔɔ nɩ m ba kristagʊɔɔ sokʊma bɩ zibəənyɩ, kʊ m Woso lemim bɩ pa da jilli, gʊaa haay m. ⅩⅩⅥ Lemim bɩ do bɩ, hɔ kʊ Woso a nyaakʊm da biisi tee… bɩ m. Bɩ kɛɛrɛ naa, Woso a hɩnka a gʊɔɔ wɔɔ m. ⅩⅩⅦ A ŋʊa a ʊ, k'a gʊɔɔ wɔɔ m hɔ k'a a nyaakʊm da, am gʊta, a gore n ta ʊ, k'a ka do vantɔɔ haay ʊ bɩ dɔ. Hɔ bɩ do ba n nɩ: Krista y'awɔɔ heer ʊ, k'a maam, awɔɔ ɩ taaheerlɛ m, a ʊ, a nyɩntam Woso lɛbɔʊrɛ nɔ ʊ. ⅩⅩⅧ Ncɩnaaʊ nɩ, wɔɔ nɩ Krista pa dam gʊaa haay m. Ʊ nɩ gʊaa biyəə bɔ n zaa ʊ, ʊ nɩ hɔ dɩndam gʊaa biyəə m, mindɔrɛ haay nɔ ʊ. K'a ka kʊ gʊaa biyəə n yɩ amba Woso lɛ n taa bɩ m Krista zɛkʊra nɔ ʊ. ⅩⅩⅨ Naa mɔɔ nɩ m kam ma, bɩ y'a ka mɔɔ nɩ zi bam, m nɩ zoo bam Krista paŋŋa k'a nɩ kan mɔɔ kɩ, an nɩ zi bam mɔɔ mɩsɩrbaa ʊ bɩ m.