Ci kʊ Pol a ba
EFƐƐZƖ ZANNƆ
ma
Ci kʊ Pol a ba Efɛɛzɩ zannɔ ma bɩ
gasʊʊrɛ
Pol ɩ ci bɩ ba. A ba a ʊ Kolɔɔsɩ zannɔ ci bɩ barɛ dɔmɩm ʊ. Bɩ ma bɩ, a ɩ lɔnnɔcɛ ʊ Rɔm ʊ. A ba a ʊ, kristagʊɔɔ sokʊmarɔ ma Efɛɛzɩ ʊ kan a bɔlɛɛmarɔ kɩ ʊ.
Hɔɔ kʊ lemim nyɩnta bɩ n'a hɩnkam wɔɔ m Krista bʊmbɔrɛ k'a bʊrm bɩ zibəə nɔ ʊ b'a n'a dɩndam ci b'ʊ. A n a hɩnkarɛ a ʊ, gʊɔɔ kʊ ŋ nɩ Krista zuure nɔ ʊ rɔ wɔɔ, ŋ bʊmbɔrɛ yɩ, ŋnɩ mɩsɩrbaa paan… m, bala ŋ y'a zɛ kʊ ra kan Woso kɩ. A y'a hɩnkam ci bɩ nɔ ʊ sɔ a ʊ, kristagʊɔɔ haay deem, a n a ga m gʊngʊrɛ n nyɩnta ʊ ŋ gaa ma y. Bala, Krista mɛ n a gʊɔɔ wɔɔ m haay. Zɩɩfʊrɔ kan do vantɔɔ gʊɔɔ kɩ.
A y'a hɩnkarɛ a ʊ, a a ga m kʊ lemim nyɩnta hɔdɩndarɛ bɩ n nyɩnta kristagʊɔɔ mɩsɩrbaa nɔ ʊ. A a dɩnda ci bɩ nɔ ʊ, a ʊ, zoobarɛ kʊ kristagʊɔɔ n ta m bɩ, a ba bɛɛ ŋ nawʊm kan gʊɔɔ kɩ y, a ba ŋ nawʊm kan zinəro kɩ Sʊtaana kɩ.
Ⅰ
Pol ɩ yaa dam Efɛɛzɩ zannɔ m
Ⅰ Mɔɔ mɩŋŋa Pol nɩ ci bɩ barɛ awɔɔ ma. Woso ɩ mɔɔ bɔ ʊ kʊ m yɩ Krista Yeezuu zibəəzaa. Ci bɩ ba mɔɔ nawʊrɛ awɔɔ ma, awɔɔ kʊ wosogʊɔɔ n'a mɩ, [an nɩ Efɛɛzɩ ʊ,] an nɩ yɛm Krista Yeezuu ma, an nɩ zɛkʊra m kan kɩ rɔ wɔɔ. Ⅱ A yɛ mɔɔ nawʊm kʊ wɔɔ Zɩ Woso kan Zuuba Yeezuu Krista kɩ n barka kan laafɩɩ kɩ ka awɔɔ ʊ.
Barka kʊ Woso a ka wɔɔ ʊ
Krista nɔ ʊ
Ⅲ Ʊ Woso barka da, a m Zuuba Yeezuu Krista Zɩ.
A *Sɛnt-Ɛspri barka do haay ka wɔɔ ʊ arzana ʊ, Krista zɛkʊra nɔ ʊ.
Ⅳ Woso lɛɛ ka an wɔɔ bɔ ʊ
Krista zɛkʊra nɔ ʊ,
bɩ ma bɩ, a n durnya da y,
wɔɔ bɔ a ʊ maam k'ʊ yɩ a gʊɔɔ,
kʊ minsi bɩ nyɩnta wɔɔ gʊr zi a mɩm ʊ y.
Ⅴ K'a nɩ wɔɔ ŋʊam bɩ minto bɩ,
a a cɩnta hɔɔ tee…
kʊ wɔɔ n b'ʊ ba a nyɩnɔ
Yeezuu Krista tɔ ma,
naa a lɛ n taa a ŋʊarɛ bɩ tɔ ma.
Ⅵ Ʊ ʊ lɛ bɔ Woso ʊ,
a barka k'an ta lɛbɔʊrɛ m bɩ tɔ ma,
a ka an nawʊm wɔɔ ʊ vam,
kʊ wɔɔ nɩ zɛkʊra m kan a Nyɩ ŋʊarɛzaa bɩ kɩ bɩ tɔ ma.
Ⅶ Bala, Krista ma bɩ tɔ ma bɩ,
Woso wɔɔ bʊmbɔ,
an wɔɔ mimbʊnyaarɔ sugur ka wɔɔ ʊ.
A barka bɩ gʊtabaa tɔ ma m.
Ⅷ A barka bɩ k'a ka wɔɔ ʊ gʊta bɩ minto bɩ,
a a ka wɔɔ nɩ mindɔrɛ m kan hɔɔn kɩ m.
Ⅸ A a ka wɔɔ n a hɔɔnhɔ k'a nyaakʊm da bɩ dɔ,
hɔ k'a cɩnta biisi tee… k'a ba Krista nɔ ʊ bɩ m.
Ⅹ Hɔ kʊ Woso a cɩnta k'a ba a nyambʊr dɔmɩm k'a bɔ ʊ bɩ ma bɩ,
a ɩ yɩrɛ ɩ ʊ, hɔ k'a nɩ brama haay kan hɔ k'a nɩ tara burə ʊ haay kɩ bɩ,
an n'a som kʊ ma kʊ Krista deem taan… n yɩ ŋ soʊrezaa.
Ⅺ Hɔ woo… ba Woso n nawʊm a hɔɔnhɔ ma,
bɩ y'a ka an lɛɛ ka an wɔɔ bɔ ʊ,
amba a lɛ n taa bɩ m,
kʊ wɔɔ n yɩ a gʊɔɔ.
Kʊ wɔɔ nɩ zɛkʊra m kan Yeezuu Krista kɩ bɩ tɔ ma m.
Ncɩnaaʊ nɩ, an wɔɔ hɔjirle ka wɔɔ ʊ.
Ⅻ Naa ba a ʊ, kʊ gʊɔɔ n a lɛ bɔ a gʊtabaa ʊ wɔɔ tɔ ma,
wɔɔ kʊ wɔɔ lɛɛ ka ʊ Krista ta ʊ heer lɛ rɔ wɔɔ.
ⅩⅢ A do n naa sɔ kan awɔɔ kɩ.
Krista nɔ ʊ, awɔɔ sɩra lemim bɩ ma, lemim nyɩnta k'a n'awɔɔ bʊmbɔm bɩ m.
Awɔɔ n sɩra ka Krista ʊ,
a m bɩ Woso n Sɛnt-Ɛspri k'a ler bɔ bɩ ka awɔɔ ʊ.
ⅩⅣ Sɛnt-Ɛspri bɩ ka a ʊ wɔɔ ʊ,
k'a hɩnka a ʊ, a hɔ haay, k'a ler bɔ bɩ kam wɔɔ ʊ,
wɔɔ hɔɔ wɔɔ duro yɩm, dɔmɩm kʊ wɔɔ n bɩ bɔlɛm yɩŋ ʊ fasɩ b'ʊ.
Naa tɔ ma bɩ, ʊ ʊ lɛ bɔ Woso gʊtabaa ʊ.
Pol yaadarɛ
ⅩⅤ Naa tɔ ma m, kʊ mɔɔ sɩra k'awɔɔ ka Zuuba Yeezuu ʊ bɩ mim ma bɩ, m a ma sɔ, n ʊ, awɔɔ ɩ wosogʊɔɔ wɔɔ haay ŋʊam bɩ, ⅩⅥ kʊ mɔɔ ɩ yaa dam Woso m awɔɔ tɔ ma, bɩ mɔɔ n'a barka dam awɔɔ minto dɔmɩm haay. ⅩⅦ A yɛ mɔɔ nawʊm wɔɔ Zuuba Yeezuu Krista Woso bɩ han, wɔɔ Zɩ k'a nɩ lɛbɔʊrɛ m gʊta bɩ, k'an mindɔrɛ ka awɔɔ ʊ, k'awɔɔ n a da ma a bɩr Woso dɔm, k'a b'a dɔ paan…. ⅩⅧ A yɛ mɔɔ nawʊm han sɔ, k'a n'awɔɔ hɔɔn gu a lɛɛgure bɩ m, k'awɔɔ n a da ma a taaheerlɛ k'awɔɔ bir ma bɩ dɔ, k'awɔɔ n a da ma a hɔnyɩ k'an a lɛbɔʊrɛ nɔ ʊ bɩ dɔ sɔ, hɔjirle hɔnyɩ k'awɔɔ nɩ zɛm b'a yɩ kan a gʊɔɔ wɔɔ kɩ bɩ m. ⅩⅨ A yɛ mɔɔ nawʊm sɔ, k'a n a ka k'awɔɔ n a paŋŋa gʊta k'a zi bam wɔɔ tɔ ma bɩ dɔ, wɔɔ kʊ sɩrakarɛzannɔ m wɔɔ m nɔ wɔɔ. K'awɔɔ n a paŋŋa bɩ gʊtabaa k'a cem haay dɔ. ⅩⅩ Paŋŋa bɩ do Woso zi ba m an a hɩnka, Yeezuu Krista mɩm k'a a bɔ ʊ bɩ dɔmɩm ʊ, an a ka an nyɩnta a bɩsɩ ra arzana ʊ. ⅩⅪ A n a ka Yeezuu nɩ paŋŋazannɔ do haay burə ʊ, lɛɛzannɔ do haay, lɛɛsoʊrezannɔ haay, cirbəə do haay kɩ burə ʊ. A a ka an nɩ hɔ k'an ta ʊ her durnya naa ʊ gɛɛ booti m haay burə ʊ. ⅩⅫ A a ka Krista n a so hɔ haay ʊ. A a ka an nɩ hɔ haay burə ʊ, an a ka an a ba a gʊɔɔ wɔɔ sokʊma minzaa. ⅩⅩⅢ Kristagʊɔɔ sokʊma bɩ m Krista mɛ. A mɩŋŋa n'a mɩsɩrbaa barɛ a gʊr zi jilli, Woso mɩŋŋa n'ɩ mɩsɩrbaa bam Krista mɩŋŋa gʊr zi jilli sɔ.