Ⅰ Hindeem ʊ, Yeezuu ɩ jɩnɩm *Zenezarɛtɩ higʊta lɛ ra, zamaa bɩ nɩ kʊ nyʊnnyɔɔtam a jɩr ʊ k'a tʊr ka Woso lemim ma. Ⅱ A kɔɔlʊʊ yɩ hɩɩya higʊta bɩ lɛ ra. Zɔbənno wɔɔ n bra, ŋn'a zaŋŋarɔ sʊrgɔm. Ⅲ Yeezuu n da kɔɔlʊʊ bɩ deem ʊ. Nyɩnta a ʊ Sɩmɔɔn hɔ. A n a yɛ han k'an a gaa higʊta bɩ lɛ ma poore. Yeezuu n nyɩnta, an a to kɔɔlʊʊ bɩ nɔ ʊ, an nɩ hɔ dɩndam zamaa bɩ m. Ⅳ K'a meer bɩ ba an a nya bɩ, a a hɩ Sɩmɔɔn m, a ʊ: «Ɩ zɔ hi bɩ nɔ ʊ, k'a a zaŋŋarɔ wɔɔ zo, k'a zɔ gʊr.» Ⅴ Sɩmɔɔn n a nyɩ bɔ ʊ, a ʊ: «Karɩnsaamba, wɔɔ zi ba gunuu ʊ tee… bɩ wɔɔ n hɔsɩ nyasʊ y. Bɩ k'ɩbɩɩ hɩ bɩ, mɔɔ yɩ ŋ zom.» Ⅵ Kʊ ŋ zaŋŋarɔ wɔɔ zo bɩ, ŋ zɔ gʊr gʊta, ŋ zaŋŋarɔ wɔɔ nɩ kɩnkaansʊrɛ. Ⅶ Ŋ n a to, ŋn'a wɔ zo a zibəəkɔɔnrɔ kʊ ŋ nɩ kɔɔlʊʊ deem bɩ nɔ ʊ rɔ wɔɔ m, kʊ ŋ nɩ b'a da a han. Brɔɔ n bʊr, ŋnɩ b'a da ŋ han ŋn'a waa ʊ, ŋn'a zar kɔɔlʊʊrɔ hɩɩyɔɔ wɔɔ ʊ, an a han, ŋn'a yo k'a nyoo ba. Ⅷ Sɩmɔɔn Pɩyɛɛr k'a naa yɩ bɩ, a kukurə zɛ Yeezuu taa, an n'a hɩrɛ, a ʊ: «Zuuba, ɩ ba mɔɔ ma laatʊ, bala, mimbʊnyaabər m mɔɔ m.» Ⅸ Dabɔʊ gʊta y'a nyasʊ kan a muno wɔɔ kɩ, zɔ gʊta kʊ ŋ y'a gʊr bɩ tɔ ma. Ⅹ Dabɔʊ Zebedee nyɩnɔ Zakkɩ kan Zaan kɩ kʊ ŋ nɩ Sɩmɔɔn zibəəkɔɔnrɔ wɔɔ nyasʊ sɔ. Yeezuu n a hɩ Sɩmɔɔn m, a ʊ: «Ɩ da bɩ bɔ ʊ y, naa ma kɛɛrɛ bɩ, ɩbɩɩ zɔnɔ gʊr biisi, ɩbɩɩ y'ɩ bam gʊɔɔkamazaa kɛɛrɛ.» Ⅺ Ŋ n a bɔ, ŋnɩ bʊr kɔɔlʊʊrɔ wɔɔ m higʊta lɛ ra b'ʊ, ŋnɩ hɔ haay bɩ to, ŋnɩ zu kʊ ʊ kan kɩ.

Ⅻ Yeezuu k'a yaa lee ku tara deem la bɩ, gʊaa nɩ b'ʊ kusiməbaa n ta ma jilli. K'a Yeezuu yɩ bɩ, a sʊnta, an a meer zuutə tara ʊ, an yaa da m, a ʊ: «Zuuba, k'ɩ lɛ taa ma, ɩ ɩ da ma ɩ mɔɔ waa, k'ɩ dintim gʊ mɔɔ ma.» ⅩⅢ Yeezuu n a wɔ hʊr, an a da ma, a ʊ: «Mɔɔ lɛ taa, ɩ waa.» Lɛɛm bɩ, a kusiməbaa bɩ nya ma. ⅩⅣ Yeezuu n lɛ ka ʊ, a ʊ, a b'a hɩ gʊaa nɩ y. Bɩ, a a hɩ, a ʊ: «Ta ɩ yaa n'ɩ hɩnka wosocɛmannɩbər m, k'ɩ ganwʊrɛ ka amba wosolɛsinnɩsorazaa Moyiisi lɛ ka bɩ m, ɩ dintim gʊ ɩ ma minto, k'an nyɩnta kasɛtɩ gʊaa haay lɛɛ.» ⅩⅤ Bɩ y'a ka Yeezuu tɔ n bɔ an n'a dam la. Zamaa gʊta n tɩr a zɛm kʊ ra, k'a tʊr ka a lemim ma, k'a ka kʊ Yeezuu n a waa a yaabarɔ minto. ⅩⅥ Bɩ, kʊ Yeezuu nɩ, ta a tɩr a ʊ a deem bɔlɛɛmarɔ ʊ, an bɩr yaa darɛ.

ⅩⅦ Hindeem ʊ, Yeezuu nyɩnta an nɩ hɔ dɩndam. Farizɛɛnrɔ kan wosocikarɩnsaambɔɔ kɩ nyɩnta b'ʊ. A to ŋ y'a ʊ Galilee kan Zidee kɩ Zerizalɛm kɩ kʊrɔ ʊ, ŋnɩ bʊr. Zuuba paŋŋa nyɩnta kan Yeezuu kɩ, an a ka, an nɩ yaabazannɔ waam. ⅩⅧ Gʊɔɔ n lee ku mɛgarɛzaa m wʊtarahɔ ʊ, ŋn'a kam ma k'a gasʊ m har ʊ b'ʊ, a wʊta Yeezuu taa. ⅩⅨ Zamaa bɩ minto bɩ ŋ n a dɔ kʊ gasʊ awɔɔ n nawʊm nɩ lʊnlɔ y. Ŋ nɩ der cɛ bɩ ra, ŋnɩ cɛ bɩ mim hɔn ra, ŋn'a nyɔɔ, ŋn'a zer kan a wʊtarahɔ bɩ kɩ Yeezuu taa zamaa bɩ lɛɛ. ⅩⅩ Yeezuu k'a ŋ sɩrakarɛ bɩ yɩ bɩ, a a hɩ yaabazaa bɩ m, a ʊ: «Gʊaa, ɩ ɩ mimbʊnyaarɔ sugur yɩ.» ⅩⅪ Farizɛɛnrɔ kan wosocikarɩnsaambɔɔ kɩ y'a mɩŋŋa larm a heer ʊ, ŋ ʊ: «Gʊaa bɩ kara n naa, an nɩ Woso sʊnsɔ wʊrɛ? Nka y'a da ma an mimbʊnyaarɔ sugur ka kʊ Woso deem bɛɛ?» ⅩⅫ Bɩ Yeezuu k'a ŋ hɔɔndarɛ bɩ yɩ bɩ, a a hɩ ŋ nɩ, a ʊ: «Bɔ m, awɔɔ n'a hɔɔn darɛ ncɩnaaʊ? ⅩⅩⅢ Kara n naanaa? M a hɩ, m ʊ: Ɩ ɩ mimbʊnyaarɔ sugur yɩ bɩ m gɛ, ɩ wuti ɩ ta bɩ nɩ?» ⅩⅩⅣ Bɩ k'awɔɔ n a dɔ a ʊ, Gʊaanyɩ b'ɩ lɛ m k'a mimbʊnyaarɔ sugur ka tara burə ʊ bɩ, an a hɩ mɛgarɛzaa bɩ m, a ʊ: «Mɔɔ y'a hɩ ɩbɩɩ m, wuti, ɩ ɩ wʊtarahɔ bɩ sa ɩ doo.» ⅩⅩⅤ Bɩ n wuti lɛɛm, ŋ mɩnyaa m, an a wʊtarahɔ bɩ sa, an doo, an n'a lɛ bɔm Woso ʊ. ⅩⅩⅥ Ŋ haay zɛ kədə, ŋn'a lɛ bɔm Woso ʊ. Dabɔʊ n ŋ nyasʊ, ŋn'a hɩrɛ, ŋ ʊ: «Wɔɔ mim daa yɩ her.»

ⅩⅩⅦ Bɩ kur bɩ, a bɔ an yawʊrsir yɩ, a tɔ m Levii, an nɩ nyɩntarɛ a zibəə bɩncɛ ʊ. Yeezuu n a hɩ m, a ʊ: «Zu mɔɔ ʊ.» ⅩⅩⅧ Levii n wuti, an a gʊ hɔ haay ma, an zu Yeezuu ʊ. ⅩⅩⅨ Levii n cibsa gʊta ba a har ʊ, an hɔbɩrɛ ba Yeezuu minto. Yawʊrsinno gʊta bʊr, kan gʊɔɔ vantɔɔ kɩ, ŋnɩ b'a zɛ kʊ ra, ŋn'ɩ hɔ bɩm kan ŋ kɩ. ⅩⅩⅩ Farizɛɛnrɔ kan a wosocikarɩnsaambɔɔ kɩ n bʊr, ŋn'ɩ kukur bam karɩndanyɩnɔ wɔɔ ma, ŋ ʊ: «Bɔ minto, awɔɔ n nɩ hɔ bɩm, an nɩ hɔ mim kan yawʊrsinno kɩ, mimbʊnyaabənno kɩ?» ⅩⅩⅪ Yeezuu n a hɩ ŋ nɩ, a ʊ: «Laafɩɩzannɔ bɩr a kam lɔɔtɔr ma y, yaabazannɔ n n'a kam ma. ⅩⅩⅫ Mɔɔ n bʊr kʊ m bɩ gʊɔɔ tɩrgɔɔ bir y, bʊr mɔɔ ʊ mimbʊnyaabənno minto, kʊ ŋ n'a mɩsɩrbaa lʊr.»

ⅩⅩⅩⅢ Gʊɔɔ n a hɩ Yeezuu m, ŋ ʊ: «Gallɛm gʊta Zaan karɩndanyɩnɔ kan farizɛɛnrɔ karɩndanyɩnɔ kɩ y'a lɛ kʊsɩm, ɩbɩɩ hɔɔ wɔɔ n bɔkarɛ, ŋn'ɩ hɔ bɩrɛ, ŋn'ɩ hɔ mire?» ⅩⅩⅩⅣ Yeezuu n a hɩ ŋ nɩ, a ʊ: «Awɔɔ y'a dam ma, a ka lʊ daa zim gʊaasɩbɔɔ n a lɛ kʊsɩ, kʊ lʊ daa bɩ zim b'ɩ kan ŋ kɩ ra? ⅩⅩⅩⅤ Dɔmɩm zɛm, n nɩ zɛm bɩ lʊ daa zim bɩ bɔ ŋ bire ʊ. Dɔmɩm bɩ do ʊ bɩ, ŋ y'a lɛ kʊsɩm.»

ⅩⅩⅩⅥ A n a ya, an hɔbɔkʊrɛnoom vanta da ŋ nɩ, a ʊ: «Gʊaa ba ʊ, an nɩ pɛɛra daa kur sam, an a sɩnsar kan huu gusire kɩ y. Bala, pɛɛra daa bɩ b'a gam kʊ ʊ kan a gusire bɩ kɩ y. Pɛɛra daa bɩ y'a gusire bɩ kaansʊm. ⅩⅩⅩⅦ Gʊaa b'a dam ma, an dɩvɛn daa tɔ hibɔɔnrɔ gusinno ʊ y, kʊ bɩ bɛɛ nɩ, dɩvɛn bɩ yɩ ŋ hɩnhaanm, an a lo, bɩ hibɔɔnrɔ wɔɔ nyɩntam bɔm. ⅩⅩⅩⅧ Bɩ, a ga a wʊm, ŋnɩ dɩvɛn daa tɔ hibɔɔnrɔ daarɔ ʊ. ⅩⅩⅩⅨ Bala, gʊaa k'a nɩ dɩvɛn gusire mim bɩ, a lɛ baa dɩvɛn daa ma y. Bala, a hɩ a nawʊrɛ, a ʊ, dɩvɛn gusire bɩ m mɩŋŋa.»