Ⅰ Yawʊrsinno kan mimbʊnyaabənno kɩ haay a zɔ Yeezuu ma, k'a a tʊr ka ma. Ⅱ Farizɛɛnrɔ kan wosocikarɩnsaambɔɔ kɩ nɩ kukur barɛ, ŋ ʊ: «Gʊaa naa do ɩ mimbʊnyaabənno sim, an nɩ hɔ bɩm kan ŋ kɩ.»

Ⅲ Bɩ Yeezuu hɔbɔkʊrɛnoom naa do da ŋ nɩ, a ʊ: Ⅳ «Gʊaa bɩ kara n'awɔɔ bire ʊ, a seero n ta ʊ zɔrɔ, deem n nyaam, a bɩ bunɛɛhʊ a yaa n nɛɛhʊ rɔ wɔɔ tom a hɔbɩjɩ ʊ, an ta an aa a ka deem bɩ ma, an tolle ba an a yɩ? Ⅴ Bɩ, k'a a yɩ, a busu an nawʊm kan heernyɩnta kɩ a kɔɔn ra. Ⅵ K'a lee ku har ʊ, an a hannyɩnɔ so kʊ ma kan a cɩsɔnnɔ kɩ an a hɩ ŋ nɩ, a ʊ: k'a heer nyɔɔ kan mɔɔ kɩ, bala mɔɔ m ser k'a nyaam bɩ yɩ. Ⅶ A hɩ mɔɔ nawʊrɛ awɔɔ m, heernyɔɔ nyɩntaŋ ʊ gʊta arzana ʊ, mimbʊnyaabər deem k'a a bɔ a taam bɩ tɔ ma, an lɛ da gʊɔɔ tɩrgɔɔ bunɛɛhʊ a yaa nɛɛhʊ rɔ wɔɔ kʊ heerlʊrlɛ zibəə ba ŋ ma rɔ wɔɔ ra.»

Ⅷ «Gɛɛ lʊ bɩ kara n ta ʊ, a wanzurfu m bu, deem n nyaam, a bɩ sɛ dam fɩtɩrɛ ʊ, an cɛ bɩ waa, an a ka ma mɩŋŋa an tolle ba an a yɩ? Ⅸ Bɩ k'a a yɩ, a y'a hannyɩnɔ som kʊ ma, kan a cɩsɔnnɔ kɩ an a hɩ ŋ nɩ, a ʊ: K'a heernyɔɔ kan mɔɔ kɩ, bala mɔɔ m wanzurfu k'a nyaam bɩ yɩ. Ⅹ A hɩ mɔɔ nawʊrɛ awɔɔ m, heernyɔɔ ta ʊ Woso malɛɛkarɔ zi mimbʊnyaabər deem k'a n'a bɔrɛ a taam tɔ ma.»

Ⅺ Yeezuu n a ya, an a hɩ, a ʊ: «Gʊaa ɩ nyɩnta ʊ, a nyɩnɔ hɩɩya. Ⅻ A poore bɩ n a hɩ a zɩ m, a ʊ: M zɩ, arzaka k'ɩbɩɩ n ta m bɩ, a jir, k'ɩ m hɔ ka m ʊ. Ŋ zɩ bɩ n arzaka k'an ta m bɩ jir ŋ nɩ. ⅩⅢ A dɔmɩm k'a yɩ poore bɩ, nyɩ poore b'a hɔ bɩ gʊr an a hɛɛ, an ta zaa ra, kʊ laatʊrɛ ʊ. B'ʊ bɩ, a yaa a arzaka bɩ zar zibəəro bʊnyaarɔ nɔ ʊ. ⅩⅣ K'a a zar an a nya bɩ, nɔ gʊta a da kʊ b'ʊ, cicir n a nyasʊ. ⅩⅤ A n ta, an nɩ zi bam kan tara bɩ gʊaa deem kɩ, bɩ n a nyɔɔ kurkuuro dɔ ma ʊ a hɔsɩra ʊ. ⅩⅥ A mɩŋŋa a ŋʊa k'a hɔbɩrɛ kʊ kurkuuro wɔɔ n'a bɩm bɩ bɩ, k'an a ka. Bɩ gɔsɩ bɩr a kaŋ ʊ y. ⅩⅦ A n bɩ, an nyɩnta an a hɔɔn da, a ʊ: Mɔɔ zɩ zibəəzannɔ gʊta, ŋn'ɩ hɔbɩrɛ bɩrɛ a mɩsɩ nɩ gɔɔtam, mɔɔ n bʊr kɛɛrɛ, m nɩ gam nɔ ma naa ʊ. ⅩⅧ Mɔɔ tarɛ m zɩ zi, m aa a hɩ m, mɔɔ m zar Woso kan ɩbɩɩ kɩ ma. ⅩⅨ Mɔɔ n m ga m, ɩbɩɩ n ɩ ya, ɩ mɔɔ bir ɩ nyɩ y. Mɔɔ ba am ɩ zibəəzannɔ gʊaa deem hɔ bɩ m. ⅩⅩ A n a bɔ an nɩ doore a zɩ bɩ zi. K'a gɔɔta an laatʊ bɩ, a zɩ bɩ n a to an a yɩ, a cicir n a nyasʊ. A n bra si, an aa a wɔ burgu ma, an a lɛ dɔrɛ. ⅩⅪ A nyɩ bɩ n a hɩ m, a ʊ: M zɩ, mɔɔ mim zar Woso kan ɩbɩɩ kɩ ma, mɔɔ n m ga m, k'ɩ ɩ ya, ɩ mɔɔ bir ɩ nyɩ y. ⅩⅫ B'a zɩ b'a hɩ a zibəənyɩnɔ wɔɔ m, a ʊ: K'a ba zɔɔ, a bʊr huu k'a gʊɛrɛ lɛ da bɩ m, a b'a du ma. K'a bʊr tolleŋŋa m a da a nyʊkʊm ma, k'a kʊsɔrɔ da a gam ʊ. ⅩⅩⅢ K'a bʊr dinnyɛɛm ka mɛ ka bɩ m, a zɛ k'ʊ a bɩ, k'ʊ ʊ heer nyɔɔ, ⅩⅩⅣ bala, mɔɔ nyɩ k'a nyɩnta an ga bɩ, a a mɩm bɔ ʊ, a nyɩnta an nyaam, ʊ ʊ ya, ʊ a yɩ. Ŋ n a sɩŋŋɩda sa, ŋn'ɩ cibsa barɛ.

ⅩⅩⅤ A nyɩ jɩtaarɛ bɩ nyɩnta pooyaa ʊ. K'a a bɔ, an nɩ zɛm an a zɔ har ma bɩ, a bɩ kɔnnɩrɔ kan bintiiro kɩ nyi ma, kan sarbaa kɩ. ⅩⅩⅥ A n zibəənyɩ deem bir an laaka da a jɩ ma. ⅩⅩⅦ Zibəənyɩ bɩ n'a nyɩ bɔ ʊ, a ʊ: Ɩbɩɩ dam bɩ y'a bɔ an bʊr, ɩbɩɩ zɩ bɩ n dinnyɛɛm k'ʊ wɔɔ tʊr bɩ zɛ, k'a a nyɩ bɩ yɩ kan laafɩɩ kɩ bɩ minto. ⅩⅩⅧ Nyɩ jɩtaarɛ bɩ nɔ n ma ʊ, a ʊ: A bɩ gasʊm har ʊ y. A zɩ bɩ n bɔ k'a yaa bir k'an bɩ gasʊ. ⅩⅩⅨ A n a hɩ m, a ʊ: Dɩga a, a dɔɔraa gʊta mɔɔ n'ɩbɩɩ zi bam, mɔɔ n kaanm ɩbɩɩ lɛ m deem nɩ y. B'ɩbɩɩ n binnyɛɛm ka mɔɔ ʊ cɩna m a zɛ, m cibsa ba m kan m hannyɩnɔ kɩ y. ⅩⅩⅩ B'ɩbɩɩ nyɩ k'a ɩbɩɩ arzaka gʊr, an aa a zar kan lannɔmɩŋŋaheenno kɩ an a bɔ an bʊr naa, ɩbɩɩ dinnyɛɛm k'a mɛ ka bɩ zɛ a minto. ⅩⅩⅪ A zɩ bɩ n a hɩ m, a ʊ: M nyɩnnɩ, ɩbɩɩ ɩ kan mɔɔ kɩ dɔmɩm haay, hɔ haay k'a nɩ mɔɔ ʊ bɩ, ɩbɩɩ y'ɩ so ʊ. ⅩⅩⅫ Bala, a a ga m k'ʊ cibsa ba, k'ʊ ʊ heer nyɔɔ. Ɩbɩɩ dam bɩ k'a nyɩnta an ga, an a mɩm bɔ ʊ bɩ minto. Nyaam a ʊ, ʊ ʊ ya, ʊ a yɩ.»