Yeezuu Krista lemim nyɩnta kʊ
MATIYEE
a gʊrsɩra ba
Yeezuu Krista lemim nyɩnta kʊ Matiyee a gʊrsɩra ba bɩ
gasʊʊrɛ
Yeezuu Krista karɩndanyɩ Matiyee ɩ ci naa do ba. Nyɩnta a mɩŋŋa ʊ yawʊrsir, Yeezuu n a bir k'an zu a ʊ. Markɩ kan Likki kɩ y'a birle ŋ ʊ Levii. Zɩɩfʊrɔ do gʊaa m.
Ci bɩ ba Matiyee ʊ zɩɩfʊrɔ kʊ ŋ y'a ba kristagʊɔɔ wɔɔ tɔ ma. K'a hɩnka ŋ nɩ a ʊ, gʊaasɩbabaa gusire lerbɔrɛrɔ wɔɔ kʊ yɩ Yeezuu Krista tɔ ma, bɩ, a m cir kʊ Woso ʊ k'a nyɔɔ Israyɛl gʊɔɔ wɔɔ ma biisi tee… bɩ. (Matiyee 4.17).
A y'a hɩnkam cB i bɩ nɔ ʊ a ʊ, Yeezuu m bʊmbɔrɛzaa kʊ Woso a ler bɔ bɩ. (Matiyee 1.21). A y'a hɩnkam sɔ a ʊ, Zɩ Woso Nyɩ n Yeezuu m, bɩ, a ba n nɩ kan wɔɔ kɩ dɔmɩm haay amba a tɔ Emanuwɛl bɩ n n'a hɩnkam bɩ m. (Matiyee 1.23). A y'a hɩnkam sɔ a ʊ, Yeezuu a karɩndanyɩnɔ haay nyɔɔ durnya gʊɔɔ haay ma kʊ ŋ nɩ lemim nyɩnta pa da. (Matiyee 28.20). Bala, Yeezuu ɩ bʊr Woso cirbəə m, kʊ gʊaa k'a nɩ sɩra kaŋ ʊ bɩ n gasʊ ʊ.
Ⅰ
Yeezuu yaabɔɔ
(Likki 3.23-38)
Ⅰ Yeezuu yaabɔɔ wɔɔ ba n nɩ: Yeezuu ɩ yɩrɛ ɩ ʊ, cir *Davɩd Nyɩ m, Abraham do gʊaa m sɔ.
Ⅱ Abraham n Izakkɩ yɩ,
Izakkɩ n Zakɔɔb yɩ,
Zakɔɔb n Ziida kan a dannɔ kɩ yɩ,
Ⅲ Ziida n Farɛɛs kan Zaaraa kɩ yɩ,
ŋ da m Tamaar m,
Farɛɛs n Ɛsrɔm yɩ,
Ɛsrɔm n Aram yɩ,
Ⅳ Aram n Aminadaab yɩ,
Aminadaab n Naasɔɔn yɩ,
Naasɔɔn n Salmɔɔn yɩ,
Ⅴ Salmɔɔn n Boozɩ yɩ,
a da m Rahab m,
Boozɩ n Zobɛɛd yɩ,
a da m Rutɩ m,
Zobɛɛd n Yesee yɩ,
Ⅵ Yesee n cir Davɩd yɩ,
Davɩd n Salomɔɔn yɩ,
a da nyɩnta Iirii lʊ,
Ⅶ Salomɔɔn n Roboam yɩ,
Roboam n Abɩya yɩ,
Abɩya n Azaa yɩ,
Ⅷ Azaa n Zozafat yɩ,
Zozafat n Zooram yɩ,
Zooram n Ozɩyas yɩ,
Ⅸ Ozɩyas n Zowatan yɩ,
Zowatan n Akaazɩ yɩ,
Akaazɩ n Ezekɩyas yɩ,
Ⅹ Ezekɩyas n Manase yɩ,
Manase n Amɔɔn yɩ,
Amɔɔn n Zozɩyas yɩ,
Ⅺ Zozɩyas n Zekonɩyas kan a dannɔ kɩ yɩ.
A n a ga kʊ ʊ kan *Babɩlɔnnɩ lɔmbaa tarɛ dɔmɩm bɩ kɩ.
Ⅻ Babɩlɔnnɩ lɔmbaa bɩ jɛ ʊ bɩ,
Zekonɩyas Salatɩyɛl yɩ,
Salatɩyɛl n Zorobabɛl yɩ,
ⅩⅢ Zorobabɛl n Abiyud yɩ,
Abiyud n Eliyakim yɩ,
Eliyakim n Azɔɔr yɩ,
ⅩⅣ Azɔɔr n Sadɔk yɩ,
Sadɔk n Akim yɩ,
Akim n Eliyud yɩ,
ⅩⅤ Eliyud n Eleyazaar yɩ,
Eleyazaar n Matan yɩ,
Matan n Zakɔɔb yɩ,
ⅩⅥ Zakɔɔb n Maarii zim Zozɛf yɩ,
Maarii bɩ do ɩ Yeezuu yɩ n n'a birm Krista.
ⅩⅦ Yaabɔɔ wɔɔ haay lɛ a zɛ kʊ ra bueeresi-si. A n a sa Abraham ma an ta m Davɩd ra bueeresi, an a sa Davɩd ma an ta m Babɩlɔnnɩ lɔmbaa ma bueeresi, an a sa Babɩlɔnnɩ lɔmbaa ma an ta m Krista ra bueeresi.
Yeezuu yɩrɛ
(Likki 2.1-7)
ⅩⅧ Yeezuu yɩrɛ bɩ zaa ba n nɩ: A da Maarii bɩ, nyɩnta a ʊ Zozɛf jaan, bɩ, an lɛɛ ka kʊ Maarii n a ba Zozɛf lʊ bɩ, *Sɛnt-Ɛspri a ka Maarii n jɩsɩ sa. ⅩⅨ A jaan Zozɛf bɩ kʊ gʊaa mɩŋŋa m bɩ, a n a ŋʊa k'a a da nyannɩ ʊ y. A n a hɔɔn da k'a wɔ saa kʊ gɔsɩ b'a dɔ y. ⅩⅩ K'a n'a hɔɔn darɛ ncɩnaaʊ bɩ, Zuuba Malɛɛka bʊr zi nɩnnarɛ nɔ ʊ, an a hɩ m, a ʊ: «Zozɛf, Davɩd do gʊaa, ɩ bɩ nyi ba k'ɩ Maarii sa ɩ ba ɩ lʊ y, bala, Sɛnt-Ɛspri paŋŋa y'a ka, an nɩ jɩsɩ bɩ m, ⅩⅪ a nyɩ yɩm yar, k'ɩ tɔ ka Yeezuu, bala, a m n'a do bɩ bʊmbɔrɛ a mimbʊnyaarɔ nɔ ʊ.» ⅩⅫ Naa do woo… naa, ba ʊ kʊ meerbaa kʊ Woso a ba kan a lɛsinnɩsorazaa lɛ kɩ bɩ n kʊ yɩ.
ⅩⅩⅢ A ba n nɩ: nyɩmbʊɛɛrɛ k'a n yar dɔ bɩ jɩsɩ sim,
an nyɩ yɩ yar, n y'a tɔ karɛ Emanʊwɛl,
a jɩ lɛ taa k'a hɩ, a ʊ: Woso ɩ kan wɔɔ kɩ.
ⅩⅩⅣ Zozɛf k'a bɩ gu hinceem ma bɩ, a hɔ kʊ Zuuba malɛɛka b'a hɩ m bɩ ba: A Maarii gaa, an a ba a lʊ, ⅩⅩⅤ bɩ, a n a dɔ lʊ y, an ta an aa dɔmɩm k'a nyɩyar bɩ yɩ ʊ bɩ ku, an a tɔ ka Yeezuu.