28
Wok Sabatpek miza logo waleleige wok Sondabekke wangane panu Maliya Matalena keya Maliya namele piyau Petani yerenda wiya logo Yisugi londagi pakeli kambela.
Togo nguk namizi kuburuk yemane nak uli keya Yemizibekki angelawiliyaga nak paka ngalega kanda pugu king yemane ulogo kandikke waliyabek towilizamiya logo king maburage ngalege mogosa wizilege. Wiregawere pugura lengka wililiktik kelik keya kagorik pugu wakiyayeng wilangka panu piyeng kelik logo kozainung wilangkayeng kelik. Keya ami pulogo Yisugi londage ngai koyimawili angelabekyegi pakelawekke puwili kulili yemane miza logo leli ula mela logo kawiye wala logo ibengwili kelik koya.
Yongok piyau Yisugi londage kanda piyaugu angelabekyegi pakelawekke piyaurau kazi miza kapura angelabokko yongok piyauyegi pelik yeiya, Yali kulili mizi wak. Yali Yisu puwiligu yengeleileige nili ulabokyegi weli purik ne iwaka. Kapura pi pelege yolu ono, pi yaka yangalekta, pi ngezebokko kaiya pilik. Pakeli koli, pelege puwiligu pi ulogo wiya wazamiya kapura pi weik yangalekta. Mena, yali ngezangai kambeli, logo pugu waligeleyawiliyegi ngago peragi pelik kozak yei mizizo, Pi ibendaga yangalekta logo pi were ngabelak Kalili meibekke kangki pulogo inugu piyegi pakelagilege, yeizo. Nogo yaliyegi peragi kozak yeiya logo yaligu puwiliyegi kozak yeizo, yeiya.
Togo piyau Yisugi londaga welagela kanda kulili mizi kapura wilikwilikmek kiling piyau yombu pugu waligeleyawiliyegi kozak yeiweki nginda kambela logo nguk namizi Yisugu piyau yoromaure keleya wizigeya pelik yeiya, Wangane, yeiya. Piyau Yisugi ingewerege inge piyaugiyeng laliya logo piyegi ya kumula.
10 Togo Yisugu piyauyegi pelik yeiya, Kulili mizi wak. Yali kambelizo, logo negi si keya sakkawili nobiyeng miza puwiliyegi ngabelak Kalilibekke kangweki yeizo logo pulogo puwiligu neyegi pakelibene, kozak yeizo, yeiya.
 
11 Togo yongokyau yagoneigeya amiwili Yisugi londage ngai koyimawiliyaga nawili panga yerendage kandorik yombu Anotoyegi kolak miziwiligi ngaiwiliyegi watabi yaka lewagela mela piyengki kozak yeiya. 12 Togo puwiligu Yudawiligi yemanewili keya ngagozak piyengki kerewiyiwiliyaga nawilirau wawere uliweki ngago yeiya logo puwili ngago nara kozak kela.
Togo puwiligu ami puwiliyegi king yemane yana 13 logo pelik yeiya, Inugu yongkambanuwiliyegi pelik kozak yeizo, Teni iwek koyigeya yombu pugu waligeleyawiligu kusarikke kayima logo yasu pugurik ngoweiya logo kambela kisizo. 14 Keya tamizeige Rom Kapman Yudaya ngabelakpekki ngai yemanebek Pailetgu peragi kerewiya logo pugu ngago nara kai purik mabura tonuwago piyegi ngago nara meiya to melagi logo inuwa ngagozak mizagi ono, yeiya.
15 Tegi ami puwili king piyeng weiya logo ngago Yudawiligi ngai yemane puwiligu kisa puragi kiriwei miza. Togo ngago ngaigura Yudawili mabuwiliyegi ululu miza mela keya mabilik mabek pewekkerau ngoluk mizageya koyinda.
 
16 Yombu meleyau keya pongo ingenazikka nak Yisu ngezebokko waligeleya puwili Yirusalem yerenda wiya logo pongo ngabelak Kalili meibekke kambela. Kanda pulogo puwili paka lewak Yisu ngezebokko ulogo kangweki kozak yeiyabekke kambela. 17 Kanda pakalege puwiligu Yisu pakelawekke puwili kebiyeng morogulunda koyimowei piyegi ya kumula koya. Kapura puwiliyaga nawiligu pi wameik Yisu panu purik kangka neyau koya.
18 Tegi Yisu puwiliyegi mereke kanda pelik yeiya, Anotogo ne kozang paka ngalegiyeng mabiyeng keya ngabelakpekkiyeng mabiyengkirau ngaiweki pangkara nana legi nogo inuwa yaweyeng miziweki yani. 19 Togo yongkambanu ngabelak mabiyengkiwili mabuwiliyegi kambelizo logo watabi nogo inuwayegi waligeleya piyeng mabiyeng inuwago puwiliyegi waligeleyizo, logo piyengki kerewiya logo puwili nogo waligeleyiwili sagi. Keya inuwago puwili Pebagi yeikta, keya ne, pigi Marekpekki yeikta, keya pigi Kung Walekpekki yeiktage kaimelizo. 20 Keya inugu puwiliyegi ngago nogo inuwago miziweki kozak yeiya maburagi kiriwei mizizo kai purikki kozak yeizo. Keya kumula, inuwa koyi kang keya ne inuwa kiling wizageya kuna ngabelak pobok weik yeik puwekkegine kani, yeiya.
Togo ngago pera yombu Matiyu meibokko lende mizara logo weik pulogo yeik.