11
Biaŋinba ki bi dinn Defid naan ki teenɔ Israel nan Juda teeb kpanbar
(2 Samuel 5.1-10)
1 Israel teeb kur din saan Defid boor, Hebronn doo ni, ki saa yetɔ a, “Ti tee a tiɔŋ gbanante nan sɔn. 2 Sianyoowa dinn ki sɔɔ Sɔɔl daa din tee ti kpanbar na gbaa, ŋaan fine din tee daanɔ nba ŋmakitir timm Israel jab tɔbii ni, ki a Yomdaanɔ Yennu senn mɔsonn nan a saa dia u niib, kii tee bi kpanbar.” 3 Li paake ki Israel saakab kur din saan Defid boor, Hebronn doo ni. Ki Defid din soor sooru ki lor namm nan barmɔnii, ki bi mɔɔn kpan u paak ki dinnɔ naan, ki Defid ji tee Israel teeb kpanbar nan biaŋinba ki Yennu din pak ki tur Samuel na.
4 Kpanbar Defid nan Israel jab kur din tan saan lek Jerusalem doo. Bi din yir Jebus-e li yoo. Jebus teeb nba din tee tiŋ na damm na, daa din kɔɔ li ni. 5 Jebus teeb na din bet Defid a, “A kan ban kɔɔ doo na ni,” ŋaan Defid din nyann ki fat Sayɔnn digbanpaarir nawa, ki sɔɔ kur ji din yir Defid doo. 6 Defid din yet a, “Wunba fit kpii Jebus nirɔ sinsinn, ŋɔɔe sii tee n kunkɔnkɔnna na saakɔɔ.” Ki Joab, wunba ki u naa tee Seruya na saan ki lek sinsinn. Li paak, ŋɔɔe din gaar saakatuk na. 7 Defid nba din saan kar digbanpaarir maŋ ni na, li paak ki bi ji din yir Defid doo. 8 Defid din ŋamm maa ŋei doo na ni, ki piin maa ŋei siaminba ki bi piint bootit, ki li be kunkonn yondo po na, ki Joab mun ŋamm maa doo na bɔkleer na. 9 Defid din ŋamii laat paŋe, kimaan Yabint Yennu din be nanɔ.
Ki jiin Defid kunkɔnkɔnwakita po
(2 Samuel 23.8-39)
10 Defid kunkɔnkɔnwakita sanae na. Ŋamm nan Israel teleeb na din sommɔ ki u dii naan, nan Yennu nba din senn biaŋinba na. Ki bi din sommɔ, ki u naangbouŋ na mɔk paŋ.
11 Sinsinn niwakitir din tee Jasobeam-e, ki u nyii Hakmonn naakuuk ni, ŋɔɔe din tee saakɔɔ, jab bantaa na ni. U din jii kpanne ki kɔn nan jab kobii ŋantaa, ki kpii bi kur, tɔb yennkɔɔ ni. 12 Wunba pukin banlee, niwakita “bantaa” na ni, din tee Eleasar-e, ki u tee Dodo bija, ŋaan nyii Aho naakuuk ni. 13 U din kɔn taan Defid-e, Pas Damim doo ni. Ki Filistia teeb taan leeb leŋ, a bin kɔn nan Israel teeb. Eleasar din be jeet kpaab nie, ki Israel teeb piin ki tiin. 14 Ŋanne Eleasar nan u jab set kpaab na sinsuuk ni, ŋaan kɔn nan Filistia teeb na. Yennu din turɔ nyanngbeŋir.
15 Dasiar kunkɔnkɔnwakita piintaa na ni jab bantaa din saan tanpiiuk nba ki Defid be na boor, ki li kpia Adulam tanfiiɔk na, ŋaan sɔɔ ki Filistia jab yaba, ki be Refaim baauk ni; 16 li yoo maŋ Defid din be jɔjaann paake, ŋaan sɔɔ Filistia jasiab yent Betlehem-a. 17 Nyunnyukuru din soor Defid, ki u yet a, “N sun ki sɔɔ n saan bunbunn nba kpia Betlehem tammɔb na boor, ki finn nyun man nyu.” 18 Ki kunkɔnkɔnwakita bantaa na yabir ki kɔɔ Filistia kaaŋ na ni, ki saa finn nyun bunbunn nba kpia Betlehem tammɔb na ni, ki tan tur Defid. Ki Defid yêt nyunu, ŋaan kpaar mɔɔn tiŋ ni, ki li tee piinii ki teen Yennu, 19 ŋaan yet a, “Yennu, n kan fit nyu nyun nba na. Mi-i nyuu, li sii tee nan n nyu jab bantaa nba chibin bi saaŋmanii na sɔme,” ki yêt nyun na nyunu. Linba nae tee toonjaana nba ki kunkɔnkɔnwakita bantaa na din tun.
20 Joab naa bik Abisai-e din tee kunkɔnkɔnwakita piintaa na saakɔɔ. U din jii u kpanne ki kɔn nan jab kobii ŋantaa, ki kpii bi kur. Bi piintaa na ni, u sanne din wokit ki gar leeb na kur. 21 Ŋɔɔe din tee kunkɔnkɔnwakitir nba ki u sann doo piintaa na ni, ki bi teenɔ bi tɔɔndaanɔ, ŋaan u sann din ki wokit ki baar kunkɔnkɔnwakita bantaa na.
22 Benaya, wunba tee Jehoyada bija, ki nyii Kabseel na mun din tee kunkɔnkɔnwakitire. U din tun partoona bonchiann: U din fit kpii Moab kunkɔnkɔnwakita banlee. U ban sik bootuk ni samaatuk daar ki kpii yanbɔr. 23 U bia din kpii Ijipt niwakitir, ki u fɔkint tee taakaabii ŋanlee nan bonjinn. Ijipt nirɔ na din kub kpanporuŋo, ŋaan ki Benaya worɔ nan gbajar, ki fat kpann na Ijipt nirɔ na nuu ni, ŋaan kpiiu nan kpann maŋ. 24 Par toonn nba ki Benaya, wunba din pukin niib piintaa na nba din tume na. 25 U sann din wokit ki pukin bi po, ŋaan u sann din ki wokit ki baar kunkɔnkɔnwakita bantaa na. Ki Defid te ki u tee u guuteeb saakɔɔ.
26 Jab nae tee kunkɔnkɔnwakitlia na:
Asahel, ki u tee Joab naa bik,
nan Elanann, ki u tee Dodo bija, ki nyii Betlehem,
27 nan Samof, ki u nyii Harod,
nan Heles, ki u nyii Pelet,
28 nan Ira, ki u tee Ikes bija, ki nyii Tekoa,
nan Abieser, ki u nyii Anatof,
29 nan Sebekai, ki u nyii Husa,
nan Ilai, ki u nyii Ahoo,
30 nan Maharai, ki u nyi Netofa,
nan Heled, ki u tee Baana bija, ŋaan nyii Netofa,
31 nan Itai, ki u tee Ribai bija, ki nyii Gibea,
ki li be Benjaminn yent ni,
nan Benaya, ki u nyii Piratonn,
32 nan Hurai, ki u nyii baat nba kpia Gaas na,
nan Abiel, ki u nyii Arba,
33 nan Asmafef, ki u nyii Bahurum,
nan Eliaba, ki u nyii Saalbonn,
34 nan Hasem, ki u nyii Gisonn,
nan Jonatann, ki u tee Sagee bija, ki nyii Harar,
35 nan Ahiam, ki u tee Sakar bija, ŋaan nyii Harar,
nan Elifal, ki u tee Ur bija,
36 nan Hefer, ki u nyii Mekera,
nan Ahija, ki u nyii Pelonn,
37 nan Hesro, ki u nyii Kamel,
nan Naarai, ki u tee Esbai bija,
38 nan Joel, ki u tee Natann naa bik,
nan Mibar, ki u tee Hagri bija,
39 nan Selek, ki u nyii Amonn,
nan Naharai, ki u nyii Beerof, ki tee Joab jatiat jikirɔ,
40 nan Ira nan Gareb, ki bi nyii Jatir,
41 nan Yuria, ki u tee Hef nirɔ,
nan Sabad, ki u tee Ahalai bija,
42 nan Adina, ki u tee Sisa bija, ki nyii Rubenn booru ni; ŋɔɔe din tee Rubenn booru ni yudaanɔ. U din mɔk u tiɔŋ jab ki bi tee piintaa ki be u boor;
43 nan Hanann, ki u tee Maaka bija,
nan Josafat, ki u nyii Mitann,
44 nan Yusia, ki u nyii Astera,
nan Sama nan Jeyel, ki bi tee Hotam bonjai ki nyii Aroer,
45 nan Jedia-el nan Joha, ki bi tee Simri bonjai ki nyii Tis,
46 nan Eliel, ki u nyii Mahafa,
nan Jeribai nan Josafia, ki bi tee Elnaam bonjai,
nan Itma, ki u nyii Moab,
47 nan Eliel nan Obed nan Jaasiel, ki bi nyii Soba.