16
1 Bi din jii Yennu mɔlor lakir na ki baar kɔɔn lanbouŋ nba ki Defid ŋamm na nie, ki ji mann mujoonu maruŋ nan piinii maruŋ ki tur Yennu. 2 Defid nba din mann maruŋ na ki gbenn yoo nba, ki u sat piisin ki teen niib na paak Yennu sann ni, 3 ki ji biit jeet ki tur bi kur. U din tor Israel jɔɔ nan poo kur boroboro kunn kunn, nan nanpurikir nan tilɔɔnkoona.
4 Defid din gann Liifai teebe ki bi tuu set Yennu mɔlor lakir na tɔɔnn ki ŋmakitirib, ki bi yiin yanii ki dontir Israel teeb Yennu. 5 U din gann Asaf-e ki u te bi saakɔɔ, ki Sekaria waa paa u paak, ki wei paan Jeyel nan Semiramof nan Jehiel nan Matitia nan Eliab, nan Benaya nan Obed-Edom nan Jeyel. Ŋamme din tee binba peeb naagbajai ki faa kɔna. Asaf-e din tee wunba faa duunu, 6 ki Benaya nan Jahasiel nba tee mannteeb na peeb naatuna yoo kur, Yennu mɔlor lakir na tɔɔnn. 7 Li daare ki Defid din sint senn Asaf nan u leeb Liifai teeb, a bii tuu kii yiin dontir yaŋ nba na kii teen Yennu.
Dontir yaŋ
(Yanii 105.1-15; 96.1-13; 106.1, 47-48)
8 Turin Yennu niipoouk, kii mɔɔntir u sann,
kii want niib toona nba ki u tun.
9 Yinin yaŋ ki pak u sann,
ki wann u bakitnauŋ toona nba ki u tun.
10 Ii mɔk parpeenn man, nan ti tee u yabe,
ki te niib nba kur jiantirɔ-ii kpamm.
11 Saant Yennu boor ki la sommir,
kii biaki jiantirɔ nyɔɔ nyɔɔ.
12 Ii tiar bakitnauŋ nan yaar lituk toona nba ki u tun,
nan buut nba ki u bu,
13 yimm nba tee Yennu toontunnɔ Jakɔb yaaboona,
ki tee Israel yaaboona ki Yennu ganni na.
14 Ŋɔɔe tee ti Yomdaanɔ Yennu,
ki u sennii be tiŋ na kur po.
15 I daa ban tammit Yennu mɔlor nba ki u lor,
ki li sii be yaayoo siiyoo na,
16 mɔlor nba ki u din lor nan Abraham,
nan mɔsonn nba ki u din senn nan Aisak na.
17 Yennu din lor mɔlor nan Jakɔb,
ki li tee mɔlor nba kaa gbennu,
18 ki yet a, “Fine ki n saa tura Keenann tiŋ,
ki li sii tee faar nba ki a saa di.”
19 Yennu niib din ki yabi, ki tee saamm ki be Keenann tiŋ ni.
20 Bi din lin yiribe ki tuu saan doyenn ni ki ŋmat saan leer ni,
ki bia nyi tinyeŋ ni, ki ŋmat kɔɔ leer ni.
21 Yennu din ki te sɔɔ diimmi;
bi yaa paak ki u yakii nan kpanbara a,
22 “I daa siin n nigannkab na,
i bia daa tee n sɔkiniinba na daŋi.”
23 Tingbouŋ na kur n yin yaŋ ki tur Yennu,
kii mɔɔntir u tinnu labamann na po, daar n tuu daar.
24 Ii mɔɔnt u baakir ki tur digbana,
ki wann u toonjaana ki tur niib kur.
25 Ti Yennu-e tee yabint daanɔ, ki ŋan nan tin pakɔ;
ki ŋan ki tii tiinɔ ki gar yennii kur,
26 kimaan digbanlia yenbis na kur tee yanne,
ŋaan Yennu-e nan sanpaak,
27 ki baakir nan dontir tee u yar,
ki paŋ nan parpeenn be u ŋaak ni.
28 Pakin Yennu man, niib nba kur be tingbouŋ na ni,
ki pak dont u yabint baakir nan paŋ nba tee.
29 Pakin ki dont Yabint Yennu paŋ.
Baat nan piinii ki kɔɔ nann u ŋaak ni.
Ii gbaan ki jiant kasii daanɔ maŋ, wuu lekit yoo nba.
30 Tingbouŋ na niib kur-ii be u tɔɔnn, kii jekir.
Tingbouŋ na see kenken, ki kan mi chati.
31 Ii ŋaan ki sanpaak nan tiŋ-ii mɔk parpeenn,
kii kpamm ki te niib na kur n yet a,
“Yennu deen u naan kok paak.”
32 Ii ŋaan mɔkgbeŋa nan bonfoa nba kur be li ni na n dun;
ŋaant fɔɔr nan bonfoa nba kur be li ni-ii kpamm,
33 ki lin te tiinii nba be fɔɔr ni na n yin yanii.
Bi saa yin yanii nan parpeenne ki tur Yennu,
kimaan u baat a wun bu tingbouŋ na buute.
34 Turin Yennu niipoouk, kimaan u ŋan;
ki u lomm kaa gbennu.
35 Ii yikin man ki yet a, “Ti tinntɔɔ Yennu, a tinnit,
a taant bɔyennkɔɔ ni, ki fatit tingbouŋ na niib nuu ni,
ki lin te tin fit tur a kasii sann niipoouk,
ki dont a kasii sann na.”
36 Pakin ki dont Yennu, wunba tee Israel teeb Yomdaanɔ na.
Ii pakɔ mɔtana, nan yoo nba kaa gbennu.
Ki niib na kur ji yet a, “Li-i tee nna,” ki pak Yennu.
Biaŋinba ki bi jiant Yennu, Jerusalem nan Gibeonn doi ni
37 Kpanbar Defid din senn Asaf nan u leeb Liifai teeb, a lii tee bi toonn yoo kur, ki bii be Yennu mɔlor lakir tɔɔnn, kii ŋmakitir, ki bi jiantir daakur. 38 U bia din senn Obed Edom nba tee Jedutunn bija na, nan u naakuuk ni niib piinloob nan banniin, a bii sommitib. Ŋɔɔ Obed Edom nan Hosa-e din tee tammɔguura.
39 Defid bia din senn manntɔɔ Sadok-e nan u mannteleeb, a bii gorii jiantii nba be Gibeonn na. 40 Sanyiɔk ni nan daajoouk kur, bin tuu mann mujoonu piinii, maruŋ binbintir na paak, ki tur Yennu, nan biaŋinba ki li sɔb sennu gbouŋ nba ki Yennu din tur Israel teeb na ni. 41 Bi din be nan Hemann nan Jedutunn nan leeb nba ki bi din gannib, a bii yiin donta yaŋ kii teen Yennu nae, kimaan u lomm kaa gbennu. 42 Hemann nan Jedutunn-e bia din tuu gorii naatuna nan duunii nan bonmumɔɔt nba kur ki bi tuu dia peeb, yoo nba ki bi yiin donta yanii. Jedutunn naakuuk ni niibe din tee binba guu tammɔi.
43 Niib na kur ji din yaate ki kun bi ŋei ni, ki Defid mun ŋmat kun u ŋaak ni, a wun saa nian u ŋaateeb.