33
Biaŋinba ki Moses sat piisin Israel teeb paak
1 Piisin nba ki Moses, wunba tee Yennu nirɔ na sat ki tur Israel teeb ŋaan kpoe na:
2 Yennu nyii Sainai jɔɔr paak ki dɔkit Edom tiŋ paak
nan yonnu nba tuu do na,
ki nyii Parann jɔɔr po, ki nyikint u niib paak.
Ki malakanba tusaa piik be nanɔ;
ki u dia muyeruk nan mulanbaabii u niidiitu.
3 Yennu loon u niib, ki guu binba tee u yab,
ki ti gbaant u tɔɔnn ki saak u sennu.
4 Ti saak sennu nba ki Moses turit na,
linba tee ti tiŋ burchinmɔkint na.
5 Yennu teen kpanbar ki tur u niib Israel teeb,
yoo nba ki bi booru booru nan bi saakab taan ki be na.
6 Ki Moses yet ki jiin Rubenn booru po a,
“Rubenn booru daa ban kpenn ki boontiri,
ŋaan u niibe lek waar.”
7 Ki u yet jiin Juda booru po a,
“Yennu, gbiintir bi fabinii ki sommib,
turimm mɔtaauk nan bi boorleeb na.
Yennu, kɔnin ki turib, ki bia somm ki fatib bi datai nuu ni.”
8 Ki u yet ki jiin Liifai booru po a,
“Fin Yennu, jiin a bona nba ki bi yi Yurim nan Tumim na
ki fiit a loomm ki wann Liifai teeb nba ki a bikimm Masa doo ni,
ki kat wann bi mɔnii nba tee biaŋinba, Meriba nyun boor;
9 ki bi set a poor po ki gar baa bo saa set bi damm
nan bi ninjamm nan bi waas poor po na.
Bi sak ki gaar a sennu nan a mɔlor kura nan bi para munn.
10 Bi saa wann a niib ki bin sak a sennuwa.
Bi saa mann maruŋ, a maruŋ binbinta paaka.
11 Yennu, sommit bi booru ki turib paŋ,
yii mɔk parpeenn nan linba ki bi tuun.
Faan kɔnn bi datai kur, ki daa te ki bi ji mɔk manfoori.”
12 Ki u yet jiin Benjaminn booru po a,
“Booru nba nae ki Yennu loomm ki bia guub;
u goriib daar kur ni, ki be bi sinsuuk ni.”
13 Ki u yet jiin Joosef booru po a,
“Yennu n teen piisin bi tiŋ paak, ki te ki saak-ii baa,
ki bia te ki nyun-ii nyi tinpɔɔr ni.
14 Ŋaant ki piisim-ii be bi tiŋ paak, ki yonnu-ii nyikintir,
ki lii loon lɔɔnŋana, lɔɔnŋana nba sii yab bonchiann li lɔɔna yoo.
15 Ŋaant ki yaayoo ni kunkona na n gbee nan jegaŋa.
16 Ŋaant ki bi tiŋ na n gbee nan bonŋana kur.
Yennu nba din be muyeruk ni,
jagotuk paak na n teen piisin bi paak.
Ŋaant ki piisin nae-ii be Joosef booru paak,
kimaan u din tee u ninjamm yudaanɔe.
17 Joosef booru paŋ tee nan naajak paŋ nae,
ki u yiikoo tee nan naajakookir yina na.
Ki u saa jii ŋanne ki tut nyinn niib ki saan namm banfɔka.
Ki u paŋ tee Manase maaru tusaa tusaa
nan Efraim maaru tusaa piik piik.”
18 Ki u yet jiin Sebulunn nan Isakar booru po a,
“Sebulunn saa mɔkit, mɔkgbeŋir paak kpinkpouŋ nie,
ŋaan ki Isakar gor saa pukin ŋaak ni.
19 Bi saa poi boorganii ki bin baar bi kunkonn ni,
leŋe ki bi saa mann barmɔnii maruŋ.
Bi sii laat bi mɔkint, mɔkgbeŋir na nie
nan tanbiinii nba kook mɔk-kpiŋ na ni.”
20 Ki u yet jiin Gaad booru po a,
“Pakin Yennu, wunba te ki bi yent yarik.
Gaad booru dɔɔ ki guue nan yanbɔr nba tuu guu
ki teen siir nan wun tabit boouk koo yur na.
21 Bi gann tinŋaŋe ki tur bi mɔŋ;
bi jii tɔɔndamm tor ki turib.
Bi sak gaar Yennu wannu nan sennu, yoo nba
ki Israel tɔɔndamm taan ki be boyennkɔɔ boor na.”
22 Ki u yet jiin Dann booru po a,
“Dann booru tee yanbɔr paaŋe,
ki yuuk mobit Basann yent ni.”
23 Ki u yet jiin Naftali booru po a,
“Yennu teen piisin Naftali booru paak bonchiann.
Ki bi yent nyii Galilii mɔkgbeŋir boor ki siik niidiitu po.”
24 Ki u yet jiin Aser booru po a,
“Aser booru la piisin ki gar boorleeba.
Ŋaant ki u ninjamm numm n gboou,
ki u tiŋ-ii kpai kii mɔk kpan tiinii,
25 ki te ki u doi tammɔi-ii loo kut gana
ki wuu yɔɔ kii be u yamani.”
26 Israel teeb, yensau ki tee nan i Yennu na,
wunba purin sanpaapo nan u bonŋana,
ki bia purin sanpagbant ni ki teen siir nan i sommir.
27 Yennu nba tun be na yɔɔ tee i sindant boore,
ki u nuu yɔɔ teebi.
Ki u saa ber i datai ki bin fɔkit ŋaan nyiki,
ki beti a yin biir bi kur.
28 Jakɔb maaru be parpeenn ni, ki be bi yamani
tiŋ nba gbee nan jeet nan tilɔɔna daan na ni,
siaminba ki marin nyi sanpaapo ki baa maant leŋ tiŋ na.
29 Israel teeb, i mɔk parpeenne.
Sɔɔ ki be ki tee nan yimm na.
I tee digbann nba ki Yennu tinnie.
Ŋɔɔe tee i naagbankɔŋir nan jukbanjiak,
ki guu-i ki bia saa turi nyannu.
Ki i datai tan saa baar i boor ni ki barimi a yin nyikib,
ki i tan saa ŋmaatib tiŋ ni.