3
Bont kur yoo be-e
1 Linba kur tuun durinya na ni, li tuun yoo nba ki Yennu sennire.
2 U senn matuk yoo, ki bia senn kuun yoo,
ki senn bonbuburit yoo, ki bia senn jinjaan-yoo,
3 ki senn nikpinu yoo ki bia senn tebu yoo,
ki senn yeeru yoo, ki bia senn maanu yoo,
4 ki senn ninbaatir yoo, ki bia senn kpinkpammuk yoo,
ki senn fabinii yoo, ki bia senn sawaanu yoo,
5 ki senn tana yatu yoo, ki bia senn tana tintikir yoo,
ki senn ki puur wɔb yoo, ki bia senn yêtu yoo,
6 ki senn ki kpaan la yoo, ki bia senn kɔŋir yoo,
ki senn bekiru yoo, ki bia senn yatu yoo,
7 ki senn patu yoo, ki bia senn nyaru yoo,
ki senn ŋminŋminn yoo, ki bia senn pinpakit yoo,
8 ki senn lomm yoo, ki bia senn naŋ yoo,
ki senn tɔbii yoo, ki bia senn parmaasir yoo.
9 Nyɔlante nyi ti toona kur ni?
10 N mi jik-kpiata nba ki Yennu jinnit. 11 U senn yoo nba ŋane ki tur bont kur. U turit niɔŋ nba ki ti sii loon, ki tii mi linba saa tun wonn, ŋaan ji ki te ki ti mi gbenn fanu waa tuun linba.
12 Ŋanne ki n bann nan taa saa fit tun linba tee ki tii mɔk parpeenne, ki yabir kii tuun taa saa fit linba, taa daa be ti manfoor ni na. 13 Ti kura n tuu di ki bia nyu, ki maan ti para nan taa tun ki la linba. Li tee Yennu piiniie.
14 N mi nan bona kur nba ki Yennu tun na, li yɔɔ bee. A kan fit pukin siar li paaki, koo ki nyinn siar li ni. Yennu tuun linba na, a niibi baakitɔe. 15 Linba kur tuun, koo ki saa fit tun, li ban tuma. Yennu-e te bont maŋ bia ŋamii tuun ki lei.
Biit nba be durinya ni biaŋinba
16 N bia la linba pukin durinya na ni tee, tonue be siaminba ki barmɔnii nan linba ŋan bo sii be. 17 Ki n yet n mɔŋ a, “Yennu loon wun tan lakin bu niŋamm nan nibiit buut yomm, kimaan toona kur, nan marima kur, tan saa tun yoo nba ki u senne.” 18 Ki n dukin nan Yennu bikintite ki wantit nan ti ki gar bonkobit kaa. 19 Li kur lek ŋaan joontu yennkɔɔe guu nisaarik nan bonkobuk kur. Nisaarik saa kpowa, ki bonkobuk mun bia saa kpowa. Bi kur tee bonfoae. Nisaarik ki gar bonkobuk kaa, kimaan bi kur manfoor ki mɔk nyɔɔti. 20 Bi kura siik bɔyenn kɔɔ nie, ki li tee tant ni. Bi kur nyii li nie; bi kur bia saa ŋmat li nie. 21 Nlee ki nirɔ setik saa fit bann nan nisaarik nariŋ do paapoe, ŋaan ki bonkobuk nariŋ ŋmat siik tinpɔɔr ni? 22 Ŋanne ki n ji bann nan taa saa tun linba tee ki tin di maan ti parae nan bona nba ki ti tun la, siar ki be ki ti ji saa teeni. Sɔnsau kaa, ki saa te ki tin bann linba tan saa tun durinya ni, ti kuun poor po.