2
Ki jiin parmaasir nba kaa gbennu po
(Maika 4.1-3)
1 Maan nae ki Yennu tur Amos bija Aisaya, ki jiin Juda nan Jerusalem po:
2 Daa baate ki kunkonn nba ki Yenjiantu ŋasaakak tɔɔ li paak na
tan sii fɔk gar kunkona kur, ki be sanpaapo ki gar jɔjaana kur.
Digbana bonchiann saa tut baar leŋ.
3 Ki bi niib sii yeen a, “Ŋaant ki tin do Yennu kunkonn paak,
ki saan Israel teeb Yenjiantu ŋaak na ni.
U saa wannit waa loon tin tun linba;
ti saa somm sɔnii nba ki u gann ni,
kimaan Yennu wannu nyi Jerusalem-e;
u be Sayɔnn-e ki piak nan u niib.”
4 U saa ŋamm barii nba be digbanjaana sinsuuk ni na.
Bi saa jii bi takoobii ki kur sɔkit, ki jii bi kpana ki kur gɔtit.
Digbana ji kan ban saan tɔbu, bi kan ban teen tɔb siiri.
5 Tɔn, Jakɔb yaaboona, ŋaant ki tii somm yentu nba ki Yennu turit na ni.
Ki jiin tubdatu po
6 Yennu, a nyɔr nyik a niib nba tee Jakɔb yaaboonawa. Tiŋ na gbee nan nyɔkii toona nba nyii yondo po nan Filistia yent nie. Niib na waa binba ki waa Yennu na kaare. 7 Bi tiŋ na gbee nan salimpeena nan salimmɔnae, ki bi mɔkint na kaa paaki. Bi tiŋ na gbee nan taaniie, ki bi taantorit kaa paak. 8 Bi tiŋ na gbee nan yenbise, ki bi jiantir linba ki bi jii bi tiɔŋ nii ki nan na.
9 Sɔɔ kur yur saa sik tiŋ ni, ki u saa di fei. Yennu, a daa nyikin chabitibi.
10 Bi saa gur tanfiat nba be jɔɔt ni, koo ki gbiir bootii tiŋ ni, a bin bɔr Yennu wutoor nba baat na, ki bɔr nyi u paŋ nan u yiikoo ni. 11 Yoo baat ki nisaarik parbifaant saa gbenn, ki nisaarik garuk n biir. Tɔn, Yennu kɔɔe ji saa la baakir. 12 Daar maŋ ni, Yabint Yennu saa sikin wunba kur dont u mɔŋ, nan binba tee garit damm. Yennu kɔɔe tan saa la dontir, daar maŋ ni. 13 U saa tut lu Lebanonn kpek-foot nan kpinkpant nba be Basann tiŋ ni. 14 U saa boor naa jɔfɔkit nan kunkona na. 15 Ŋafoouk nan joonjouk kur saa biir. 16 U saa te ŋaringbeŋa nba kur tee ŋarinŋana na n kpii. 17-18 Nisaarik dont-n-mɔŋ saa gbenn, ki nisaarik garuk n biir. Yenbis kur saa bote fas. Yennu kɔɔe saa la dontir, daar maŋ ni.
19 Nisaarii saa gur tanfiat nba be jɔɔt ni, koo ki gbiir bootii tiŋ ni, a bin bɔr nyi Yennu wutoor ni, nan u paŋ, nan u yiikoo nba baat bi paak na, yoo nba ki u saa baar a wun nik tingbouŋ na. 20 Li daar-i baar, bi saa lu bi salimpeena nan bi salimmɔna pata nba ki bi ŋamm nae, ki nyɔr nyikir nan naasɔɔrii nan nanjɔnt. 21 Yennu-i baar a wun nik tingbouŋ na, nisaarii saa gur bootit nan tanfiat nba be jɔɔt nie, a bin bɔr nyi Yennu wutoor, nan u paŋ, nan u yiikoo nba baat bi paak na ni.
22 A daa tee a dindann nisaarik ni. Nisaarik jan nan bee?