38
Ki jiin kpanbar Hesekia baatuk nan u paaku po
(2 Kpanbara 20.1-11; 2 Barkperii 32.24-26)
1 Yoo na ni ki kpanbar Hesekia dɔɔ nan baatuk ki per kuuma. Ki Amos bija Aisaya nba tee Yennu sɔkinii na yetɔ a, “Yennu piaka, a li tee fan ŋmakit bont kur fanue, kimaan a kan paaki. Teent siir nan kuun.”
2 Ki Hesekia ŋmant u numm ki tor dikpinn, ŋaan miar Yennu a, 3 “Yennu, tiat nan n weia fanu nan baakir, ki yoo kur ki n yiab a n tun linba ki a loon man tun.” Li yoo na ki u piin ki mɔ nan parbiir.
4 Ki Yennu wann Aisaya 5 a wun ŋmat Hesekia boor ki saa pakɔ a, “Min Yennu nba tee a yeeja Defid Yomdaanɔ na gbat a miaru nawa, ki bia la a ninnyuut nawa. N saa te ki a manfoor n pukin bina piik nan ŋanŋmu. 6 N saa tinn fin nan Jerusalem digbann na Asiria kpanbar nuu ni, ki n bia saa tukin kii guu digbann maŋ.”
21 Ki Aisaya yet Hesekia a bin jii kinkana ki ŋann ki pɔr u mɔra na, ki u saa la laafia. 22 Ki kpanbar Hesekia boi a, “Nyinlanne want nan n tan saa fit saan Yenjiantu ŋasaakak ni?”
7 Ki Aisaya jiin a, “Yennu saa tura nyinn ki lin wann nan u sii dia u mɔsonn. 8 Taaŋmaata nba ki kpanbar Ahas din maa na, Yennu saa te ki li taaŋmaata yunyuŋ n ŋmat poor, taar piik.” Ki taaŋmaata na yunyuŋ ŋmat poor taar piik.
9 Hesekia nba la laafia yoo nba ki u sɔb dontir yaŋ na a:
10 N bo dukin nan manfoor sinsuuk nie ki n saa kpeentiŋ,
ki n manfoor saa pot jinjiŋe.
11 N dukin nan n kan ban la Yennu koo nisaarik tingbouŋ na ni.
12 N manfoor bo pote ki gbenn, nan baa tuu chaat lanbouŋ na,
nan baa saa pot chinchenn nba ki bi daa luu na.
Ki n dukin nan Yennu gbent n manfoore na.
13 Tont te ki n bui nyɔtunmunn, ki li naan yanbɔre kɔnii n kpaba,
ki n dukin nan Yennu gbent n manfoore na.
14 Ki n kunkɔr waab ki baŋ, ki n mɔ nan ŋmann na.
Ki n ninbina bak nan sanpaapo gotu.
Yennu, nyintin daamii na kur ni.
15 N saa pak a bee? Yennu-e tun linba na.
N par biire, ki n kan fit gɔɔn.
16 Yennu, n sii tee a yɔɔe, a kuukɔɔ yɔɔ.
Turmin laafia, ki te mii fo.
17 N tont na saa kpant manue.
A nyinn n manfoor ninbɔŋ kur niwa.
A nyikin chab n biit kura.
18 Sɔɔ kaa kpeentiŋ ki saa fit donta.
Kpeemm kan fit teen yada a mamɔmm ni.
19 Binba fo nae dontira, nan maa dontira mɔtana na.
Bibaanba piak bi waas, a mamɔmm po.
20 Yennu, a turin laafiawa.
Ti saa faa kɔna ki donta,
ki yin donta, a jiantu ŋasaakak ni, ti manfoor ni kur.