40
Ki jiin dindann mɔmaan po
1 Ki Yennu yet a, “Maant n niib para, maant n niib para.
2 Turin Jerusalem teeb na parcheenn.
Pakimm nan bi dii fara ki li yukir jaŋa,
ki mɔtana bi biit la nyikinchaba.
N dat bi tuba bi biit kur paaka.”
3 Sɔɔ hoot ki yeen a, “Ŋammit sɔnu muuk ni, ki tur Yennu,
ŋammit sɔnu kunkoouk paak, ki turɔ.
4 Gbeent baauk kur, ki yeer jɔɔr kur ki naa.
Kunkona saa boor naa,
ki digbann nba tee bongbetima na saa naa, ki ŋarik.
5 Ŋanne ki Yennu yiikoo saa dɔkit, ki nisaarii kur saa lar.
Yennu tiɔŋo tur mɔsonn na.”
6 Kunkɔr hoot a, “Mɔɔntir mɔmaan.”
Ki n boi a, “Mɔmaan boorbee ki n saa mɔɔnti?”
Ki kunkɔr na jiin a, “A mɔɔnt nan nisaarii kur tee nan mɔɔt nae.
Bi ki yukii nan puuk nba ki yukii nae.
7 Mɔɔt tuu jɔɔke, ki puuk n koor,
yoo nba ki Yennu tun wouŋ ki li da gar li paak.
Nisaarii ki yukii nan mɔɔt nba ki yukii nae.
8 Barmɔnii, mɔɔt tuu jɔɔke ki puuk n koor,
ŋaan Yennu maan ŋarin yɔɔ be-e.”
9 Jerusalem teeb, ii do jɔfoouk paak ki saa mɔɔnt barŋanii na.
Sayɔnn teeb, yiint nan kunkɔsaakar, ki mɔɔnt barŋanii na.
Pakin, ki daa tiin jaŋmaanii. Betir Juda doi na, a bi Yennu baat.
10 Yabint Yennu baat a wun dia durinya na nan yiikoo.
U baat ki dia niib nba ki u tinnib na.
11 U saa got u pei na, nan u tee pekpaarik nae,
ki taan pebis na ki diab u nii ni;
u saa somm nan penaant na, nan sukuru.
Ki jiin Israel teeb Yennu nba kaa lɔɔ na po
12 Sɔɔ saa fit jii mɔkgbeŋir ki bikin u niipant niwa-a?
koo sɔɔ saa fit jii u nii ki bikin sanpaaka-a?
Sɔɔ saa fit jii tingbouŋ na tant kur ki bikin ŋmanbaŋ niwa-a?
koo sɔɔ saa fit jii jɔjaana nan kunkona
ki bikin churu paaka-a?
13 Sɔɔ saa fit wann Yennu waa sii tuun biaŋinbawa-a?
koo ŋmee saa fit tumii Yennu, koo ki turɔ kpaanii?
14 Yennu tuu boi ŋmeewa ki fit bann bont paak,
koo ki bann bona nba sii tuun biaŋinba?
15 Yennu boor, digbana tee yanne,
li tee nan nyun nba tuu too kpek nae.
Kunkona nba see mɔkgbeŋa ni na fukii nan tangbiruŋ nae.
16 Bonkobit nba kur be Lebanonn fɔɔr ni na maruŋ
kan jaŋ Yennu, ki li tiinii na kur kan jaŋ li muu.
17 Digbana na ki tee siar u boori.
18 Ti saa bikin Yennu nan ŋmee? A saa bikinɔ nlee?
19 U ki tee nan yenbik nba ki toontunna maa na kaa,
u ki tee nan yenbik nba ki saauk damm jii salimmɔna ki pɔr,
ki sennir salimpeenboota ni na kaa.
20 Jɔɔ nba kan fit la salimpeena koo salimmɔna
tuu gann tiik nba ki dute,
ki kpaan tikpeerɔ nba mi tikpeet fanu,
ki wun kpeer bonninnauŋ nba kan fit baa.
21 I ki mi-i? Bi din ki paki yaayoo ni-i?
I ki gbat durinya na nba din piin biaŋinba-a?
22 Wunba kar u naan gbant paak nae din nan durinya na.
U be tingbouŋ nan sanpaak liik poewa,
ki nisaarii nba be tingbouŋ na ni waar ki tee nan lannyanii na.
Ŋɔɔe jɔnn sanpagbouŋ na nan jinjɔŋ na,
ki li naan diiuk nba ki nirɔ sii be li ni.
23 Ŋɔɔe sikint doo diara nba mɔk yiikoo ki teeb yann.
24 Bi tee nan bont nba tuu pia ki daa ki baa jiina nae.
Yennu-i te ki wouŋ da yoo nba, bi tuu koore,
ki wei wouŋ nan mɔɔt na.
25 Ti saa bikin kasii Yennu na nan ŋmee?
Sɔɔ be ki tee nan ŋɔɔ na-a?
26 Gotir sanpaak. Ŋmee nan ŋmaabira nba ki a laat na?
Li tee wunba gar bi tɔɔnn nan nirɔ nba saa gar nibur tɔɔnn nae.
U mi ŋmaabira maŋ kann nba tee, ki yi ŋmaabir kur nan u sann.
U yiikoo yab bonchiann, ki nan ŋmaabir yennkɔɔwa ki boori.
27 Israel teeb, bee ki i burin a Yennu ki mi i daamii,
koo u baka kaa nan yaa ki laat mɔnii na po?
28 I ki mi-i? I ki gbati-i?
Yennu tee Yomdaanɔ nba yɔɔ be-e yaayoo siiyoo;
ŋɔɔe nan durinya na kur.
U ki bakit koo ki miatiri. Sɔɔ ki bant u dudukit paak.
29 Ŋɔɔe teen binba bak ki chɔk na paŋ.
30 Binba paan na gbaa baŋit, ki naasimm bakit,
31 ŋaan binba teen bi dindann Yennu ni ki loon sommir na,
ŋɔɔ Yennu-e saa ŋamm pant bi paŋ.
Bi sii mɔk paŋ nan baakaa nae, ki do sanpaapo.
Bi saa tin, ŋaan kan bakii, ki sii somm, ki ki baŋit.