44
Yennu kuukɔɔe tee ti Yomdaanɔ
1 Yennu yet a, “Gbiintir man, yimm Israel teeb nba tee
Jakɔb yaaboona, ki tee n toontunna nba ki n gann.
2 Mine tee Yennu nba nami, ki sommiti i maaru niwa.
I daa tiin jaŋmaanii, i tee n toontunnae,
ki tee niib nba ki n gann ki looni.
3 N saa tur tiŋ nba ki nyunkon be na nyun,
ki te kpenii puub tinkooŋ ni.
N saa mɔɔn n Seek i waas paak,
ki bia mɔɔn n piisin i yaaboona paak.
4 Bi saa yit nan mɔɔt nba ki bi maanir nyun fanu nae,
ki lat nan kpentiiuk na.
5 “Niib sii yeen leeb yenɔ yenɔ a, ‘N tee Yennu yɔɔe.’
Bi saa baar ki tan pukin Israel teeb po.
Sɔɔ kur saa sɔb Yennu sann u nuu paak,
ki sii yi u mɔŋ Yennu niib na yenɔ.”
6 Yabint Yennu nba dia Israel teeb, ki bia guub na piak a,
“Mine tee pinpiik nan joontu, ki tee Yen-yemmir,
yensau ji kaa ki pukin n po.
7 Sɔɔ be ki saa fit tun linba ki n tun na-a?
Ŋmee din saa fit wann linba saa tun,
laa nyii piinu niwa ki tan tuu gbennu?
8 N niib, i daa tiin jaŋmaanii.
I mi nan laa nyii yaayoo niwa ki tan tuu mɔtana,
n buntir linba saa tume, ki i tee n siara damm.
Yensau ji be pukini-i?
Yensau be ki mɔk yiikoo, ŋaan ki n ki mi gbat u po-o?”
Biaŋinba ki patmannu tee jatii
9 Binba kur maa pata na kaa nyɔɔti, ki bi pata nba ki bi dontib sanpaapo bonchiann maŋ kaa nyɔɔt. Binba jiantir pata maŋ tee jɔɔniie, ki bia ki mi siar, ki tan saa di feiwa. 10 Li ki ŋan sɔɔ n jii kut ki nan siar ki jiantir, a li tee Yennu. 11 Wunba kur jiantirir saa di feiwa. Binba naan pata na tee nisaariie, bi ki tee siar. Ŋaant ki bin baar ki bin bu bi buut. Bi tan saa jekir ki di fei.
12 Saauk daanɔ tuu jii kute ki pur muu ni, ki jii jaar ki boor kut na nan paŋ, nan laa tan saa teen waa loon linba. Waa tuu tuun na, kon nan nyunnyukuru tuu soorɔe, ki wun bia bak.
13 Kanpinta tuu bikin taabue, ki jii bonsɔbkar ki nan linba ki u loon, ki kpeerir ki li ji naan nirɔ, ki tee nifaŋ, ki wun sennir u ŋaak ni. 14 U saa fit chɔɔ kpek ki kpeer, koo tijakper, koo kɔɔnsaauŋ fɔɔr ni, koo u saa fit bur tisiak, ki guu a saak n baa ki lin kpaat. 15 Nisaarik tuu jii tiik chianue, ki li tee daat ki u jokit muu, ki jii chianu nba tenn na ki nan patir. Tiik bɔkyenne ki nirɔ tuu jii ki teen daat ki nanii, ki bia teen jeet, ki jii bɔkleer na ki teen patir, ki jiantir. 16 U tuu jii tiik na dayente, ki joo muu ki pur nant, ki ŋman tan gboo. U tuu nanii muu nae ki yet a, “Li ton ki man bonchiann. Muu na man bonchiann.” 17 Daat nba tenn na, wun jii ki nan patir, ki gbaa jiantir. U tuu mei patir maŋe, ki yeen a, “Fine tee n yennu, a tinnin.”
18 Li nibooru liisin paak ki bi ki fit bant baa tuun linba. Bi mun bi nuniie, ki nyar bi tuba, ki jiin barmɔnii po. 19 Wunba naan pata na ki mɔk yan nba ki u saa yet a, “Daat maŋ yenn nbae ki n joo muu na. N pur boroboro nan nant li muu nie, ki ŋman, ŋaan tont daat nba tenn na ki nan patir, mɔtana n ji jiantir daat maŋe.”
20 Nirɔ-i di tanpent, li sɔ. U jatdudukit na turimɔ, ki li paak niiwa ki sɔɔ ji kan fit sommɔ. U kan sak nan patir nba ki u dia u nuu ni na ki tee siar nan waama.
Yennu-e tee naamii daanɔ nan tinntɔɔ.
21 Yennu yet a, “Israel teeb, ii tian linba na man,
ii tian nan i tee n toontunnae.
Mine nami a yii tee n toontunna, ki n kan ban tamm i po.
22 N wuur i biit ki li yaat
nan sanpagbouŋ nba tuu gar biaŋinba nae.
Jennin n boor man; mine tee wunba tinti.”
23 Sanpaak, ii hoot nan kpinkpammuk. Tingbouŋ, ii hoot.
Kunkona nan fɔɔr ni tiik kur n hoot nan kpinkpammuk.
Yennu tinn u niib Israel teebe, ki li wann u yiikoo nba tee.
24 “Mine tee Yennu, ki tee i tinntɔɔ.
Mine tee wunba nami. Mine tee Yennu nba nan bont kur.
Min kɔɔe din jɔnn sanpaak.
Maa din naan tingbouŋ na yoo nba, sɔɔ ki sommin.
25 N nyint ninnyɔɔn damm nae paanu,
ki ŋmat binba cheŋ ŋmaabira na buntaa.
N tuu tunn yandamm bannu nae,
ki wann nan bi subinii na tee jatiie.
26 Ŋaan n toontunnɔ-i bunt buntir,
koo mi-i tun toomii a wun wann n lora,
n tuu te ki buntir na, nan n lora na n teen mɔniie.
N pak Jerusalem, a niib tan saa ŋamm kar leŋ,
ki pak Juda doi, a niib tan saa ŋamm maab.
Bi saa ŋamm ki fiin doi maŋ langbent.
27 N din yet mɔbonne, ki mɔkgbeŋir fɔɔr.
28 Ki n pak kpanbar Sairus a, ‘Fine saa dia n niib ki turin;
ki a saa tun linba ki n loon.
A saa tur mɔb ki bin ŋamm maa Jerusalem
ki bir jiantu ŋasaakak na fiakir.’ ”