60
Ki jiin Jerusalem baakir nba baat na po
1 Jerusalem, fiit kii nyirii nan yonnu na;
Yabint Yennu yentchiɔŋ na yentire a paak.
2 Bunbɔnne saa piin digbanlia,
ŋaan ki Yennu maŋ yentu na sii yeen a paak,
ki u yentchiɔŋ na sii be nana.
3 Digbana saa baar a yentu na ni,
ki kpanbara saa baar a dapaann yentu na ni.
4 Gotir lint a mɔŋ ki la linba tuun,
a niib lakinte a bin kpen.
Bi saa jii a bonpoi na nan bi tee waase na.
A bonjai saa nyi banfɔka ki kpen.
5 A saa la linba na ki gbee nan kpinkpammuk.
Parpeenn saa jek a gbanu.
Bi tan saa baar nan digbana mɔkint ki tura.
Bi mɔkint saa nyi mɔkgbeŋir pootir ki baar a boor.
6 Laagumiinba saa jii jika ki nyi Midiann nan Efa
ki baar a boor.
Bi saa nyi Sieba ki baar nan salima nan bonnunubit.
Niib saa pak barŋanii ki jiin linba Yennu tun na po.
7 Ki bi saa baar nan Kedar nan Nebayof pei kur a boor,
ki li tee maruŋ, ki mannir binbintir paak, ki lin maŋ Yennu.
Ki Yennu saa faŋ u ŋasaakak na, ki lin gar laa tuu tee.
8 Ŋarinlanae naan sanpagbant na,
ki tee nan ŋmana nba tuu ŋmat kun na?
9 Li tee ŋarint nba nyii banfɔkae, ki kpent nan Yennu niib.
Bi dia salimpeena nan salimmɔna,
a bin tur Yennu sann baakir;
ŋɔɔe tee Israel teeb kasii Yennu
nba te ki digbana kur teen u niib baakir na.
10 Yennu pak tur Jerusalem a,
“Boorganue saa ŋamm maa a joona,
ki bi kpanbara sii jiantira.
N bo be wutoor nie ki dat a tubir,
ŋaan mɔtana n saa tina ninbaauk, ki tura sommir.
11 A tammɔi sii yaae yonnu ni nan nyiɔk,
ki lin te digbana kpanbara n baar nan bi mɔkint ki tura.
12 Ŋaan n saa biir digbana nba ki jiantira nae peb.
13 “Ki bi saa baar nan daat nba tee foi nan naagbasukirii,
nan kɔɔnsaant nba tee Lebanonn fɔɔr ni tiŋanii na,
ki tan ŋamm maa fin Jerusalem, ki faŋ n jiantu ŋasaakak na,
ki bia faŋ n doo maŋ.
14 Binba dinta biak na yaaboona tan saa baar
ki gbaan a tɔɔnn ki tura baakir,
ki binba yisima na kur tan saa gbaan ki jianta,
ki saa yiina a, ‘Yennu doo,’
ki bia sii yiia ‘Sayɔnn nba tee Israel teeb kasii Yennu doo.’
15 “Bi ji kan yêta ki bia namani, a ji kan biar dɔɔ yanni.
N saa teena digbanjaann, ki bia faŋa.
Ki a sii tee siaminba ki kpinkpammuk yɔɔ be.
16 Digbana niib nan kpanbara sii dinta
nan binaa nba tuu dint u bik nae,
ki a saa bann nan min Yennu-e tinna,
a min Israel teeb Yabint Yennu-e nyinna ki ŋaa-a.
17 “N saa tura salimmɔnae, ŋaan nyik kutmɔnt,
ki tura salimpeena nan kutmɔnt, ŋaan nyik kut nan taabii,
ki tura kut, ŋaan nyik tana.
A diara ji kan mukisani.
N saa te ki bin dia-a nan ŋamm nan parmaasire.
18 Sɔɔ ji kan gbat jat fuuri, ki biiru ji kan ban bukir a tiŋi.
N saa guura ki kɔn a paak nan joonjouk nae,
ki a saa dontin, kimaan maa tinna na paak.
19 “Yonnu kaa ji sii tee a yentu, daar ni,
ki ŋmaarik mun kii tee a yentu, nyiɔku.
Min Yennu-e sii yɔɔ tee a yentu yaayoo siiyoo.
N baakir yentu na sii yeen a paak,
20 ki a parbiir na saa gbenn.
Min Yennu-e sii yɔɔ tee a yentu yaayoo siiyoo,
ki saa yukir gar yonnu nan ŋmaarik.
21 A niib kur sii tuun linba ŋan,
ki saa yent tiŋ na yaayoo siiyoo.
Mine namm ki kaamm a man fiit n yabint ki wann sɔɔ kur.
22 A ŋabik nba tee sikin-n-mɔŋ ŋaak na saa la paŋ,
ki tee nan digbanjaann na.
Li yoo-i baar, n saa te ki linba na n tume yiama.
Mine tee Yennu.”