2
Biaŋinba ki Yennu loon Israel teeb
1 Ki Yennu yetin
2 a man mɔɔnt maan na ki tur sɔɔ kur nba be Jerusalem a,
“N tian yaa din waan fanu biaŋinba,
yoo nba ki i din tee nipaauŋ na,
yoo nba ki i din sint jii i mɔŋ ki turin na.
I din wei n poor ki gar kunkoouk paak,
tiŋ nba ki bi ki ban bur siar na ni.
3 Israel teeb, i din tee n kuukɔɔ niibe,
i din tee n kasii faare.
N din te ki biak bonchiann baar wunba kur paani daŋ.
Min Yennu-e pak na.”
Ki jiin Israel teeb yeejamm biit po
4 Gbiintir Yennu maan, yimm Jakɔb yaaboona nba tee Israel teeb na. 5 Yennu yet a:
“Bilante ki i yeejamm din baar nann n paaki?
Bee din te ki bi lek bi numm ki nyikimi?
Bi din jiant yenbise, yenbis nba kaa nyɔɔti,
ki li te ki bi mɔŋ mun ji kaa nyɔɔti.
6 Bi din ki gbiin n po, ŋaan mine din nyinnib Ijipt,
ki somm namm kunkoouk paak,
siaminba tee tinkokirik nan tanbiiuŋ nan bootit,
ki tee tinkooŋ nan daŋ tiŋ nba ki sɔɔ ki kaar leŋ,
ki sɔɔ bia ki somm leŋ na,
7 ki n baar namm tiŋ nba mɔk koorin ni,
a bin tan di li jaauŋ nan bonŋana manu,
ŋaan ki bi biir n tiŋ, ki kɔɔn tiŋ nba ki n turib maŋ jakint.
8 Mannteeb na ki boi a, ‘Yennu be lia?’
N tiɔŋ mannteeb ki bannin.
Doo diara kɔn nanime, ki n sɔkiniinba piak tingbann
nba tee Baal na sann ni, ki jiantir yenbis.
9 Li paak, min Yennu saa ŋamm pak n maan ki jiin n niib po.
N saa baar nan maan ki jiin bi yaaboona po.
10 Saant yonbaa po, ki baar kunkonn doo nba foo nyun ni,
ki bi yi Saiprus na, ki tun sɔɔ yondo po, Kedar tiŋ ni.
I saa la nan linba na booru daa ki ban tun kaawa,
11 digbansiar ki ban lebit u yenbis,
nan baa lek ki tee yenmɔnii nawa.
Ŋaan n niib nyik min Yennu nba tee baakir daanɔ nae,
ŋaan waa yennii nba kan fit tun siar ki sommib na.
12 Li paak, ki n yet sanpaak a wun ŋak nan yanputuk
nan bakitnauŋ nan yaarlituk,
13 kimaan n niib tun biit booru munlee-e;
bi ŋmant bi poor ki tur min nba teen nyunŋanin na,
ŋaan gbiir gbiit nba tee bonyiant, ki nyun kan fit be leŋ.
Biaŋinba ki Israel teeb toonbiit saa baar nan tubdatu
14 “Israel digbann ki tee yommik kaa,
bi din ki marɔ yommisin ni kaa. Bee teen ki u datai waa beerɔ?
15 Bi gaan jat u paak nan yanbɔra nae,
bi kpant u tiŋ kunkoouko, ki u doi teen langbent ki dɔɔ yann.
16 Nn, Memfis nan Tapanes jab yeer u yukpabuko.
17 Israel digbann, fine baar nan linba na a mɔŋ paak.
A yêt min a Yomdaanɔ Yennu-e,
yoo nba ki n tɔk nana sɔnu maŋ ni na.
18 A dukii li-i tee ki a saan Ijipt ki saa nyuu
Nail mɔkir ni nyun, a saa la sommlannpoe?
A dukii li-i tee ki a saan Asiria ki saa nyuu
Yufrates mɔkir ni nyun, a saa la sommlannpoe?
19 A tiɔŋ toonbiite saa dat a tubir;
faa nyikin na, ŋanne saa biira.
A saa bann laa ton ki bi biaŋinba nan fan nyik
min a Yomdaanɔ Yennu, ki ji ki waa n sɔnii na.
Min Yabint Yennu-e pak na.”
Israel teeb nba yêt Yenjiantu biaŋinba
20 Ki Yabint Yennu yeen a,
“Israel digbann, sian yooewa ki a din yêt n yiikoo,
a yêt fan sak n mɔbe, ŋaan jiantir pɔtuk yennii na,
kunkonn nba dokii kur paak nan timaatik kur nyakir.
21 N burae, ki a tee nan daan tiik nba ŋan,
ki nyii bin nba ŋan ni na,
ŋaan gotir faa ji tan tee biaŋinba na.
A ji tee daan tiik nba loon lɔɔnbiite.
22 Fi-i lekii jii cheeb nba paar ki wur,
ŋaan n bia sii laat a jakint.
23 A saa teen nlee ki yet nan a ki biir a mɔŋi,
ki bia ki jiant tingbann nba tee Baal na?
Gotir faa tun biit biaŋinba baauk na ni. Gotir faa tun linba.
A tee nan muuk ni laagumii nba ki u poor sooru yoo-i baar,
ki u lin tiin yann,
24 ki tiin do kunkoouk nae.
U poor sooru yoo-i baar, ŋmee saa fit gɔɔrɔ?
Laagumjak nba loonɔ ji ki bakiti,
kimaan u be-e yoo nba kur ki laagumjak tee wun lomɔ.
25 Israel digbann, a daa chat a taa,
koo ki koot a kunkɔr nan boorganii yenbis weiu.
Ŋaan a tuu yet a, ‘Aaii, n kan ŋmat poor.
N loon boorganii yenbis nae ki sii waab.’ ”
Biaŋinba ki Israel teeb jaŋ nan tubdatu
26 Ki Yennu yet a, “Baa tuu tan soor nanyukɔ, ki wun di fei biaŋinba na, nnae ki yimm Israel niib kur tan saa di fei. I kpanbara nan saakab, nan mannteeb nan n sɔkiniinba na saa di fei. 27 Yimm nba yaa tiike tee i baa, ki tann tee i naa na, i kur tan saa di feiwa. Linba na saa tun, kimaan yaa nyikin ŋaan yaat na paak. Li-i tee ki i be daamii ni yoo nba, i tuu yime a man baar ki tinni.
28 “Yennii nba ki i maa ki tur i mɔŋ na be lia? Li-i tee ki i be daamii ni, yin te bin nyinni, li-i tee ki bi saa fit. Juda teeb, i yennii yab nan yaa mɔk doi biaŋinba nae. 29 Bee tee i daamii? Bee ki i yêtimi? 30 N dat i tuba, ŋaan li ki ŋamm siari. I ki sak man ŋmakiti. I tee nan yanbɔr waatik nae, ki kpii n sɔkiniinba kur. 31 Israel teeb, gbiintir linba ki n piak na. N tee nan kunkoouk nae ki turini-i? N bɔne ki tee nan ninbɔŋ tiŋ na-a? Bee ki i piak a i sii tuun yaa loon linbae, ki kan ban jen n boori? 32 Poopaaŋ tammit u salinbaŋ po-o, koo pooyookir tammit u chiann liant po-o? Ŋaan yimm n niib tamm n po ki li wei ki gar yoowa. 33 I setik mi yɔɔs sooru. Poochonchonn saa fit tumii i boora. 34 I tiat mɔnn nan talas damm nan nikaat sɔme, li ki tee fat-teeb sɔn kaa.
“Ŋaan linba na kura, 35 ki i yeen a, ‘Ti ki tun biir. Yennu ji ki dont wutoor ti paak.’ Ŋaan min Yennu saa dat i tuba, kimaan i nɔi nan i ki tun biiti. 36 I teen i mɔŋ dafur nan yaa jii i mɔŋ ki tur digbangana yennii nawa. Ijipt saa dinni fei nan Asiria nba din dinni fei nae. 37 I saa ŋmant i poor ki tur Ijipt, ki i yura n kpiak nan fei. Min Yennu yêt binba ki i teen i dindann bi ni nawa, ki i kan la nyɔsiat bi boori.”