5
Ki jiin Jerusalem biit po
1 Jerusalem teeb, tinin ki lin i sɔnjot kur ni.
Gotir lint. Lamin i numm. Lomin doi ni,
ki laan i saa la nirɔ nba ki u toona ŋan ki u loon Yennu-u?
Yi-i saa fit lau, Yennu saa nyik chab Jerusalem-a.
2 Baa lek yeen a, “Nan Yennu nba be na,”
ŋaan bi poor faak mɔporae.
3 Yennu, a ninbina ki gorii ki loon mamɔmm kaa-a?
A faabe, ŋaan ki li ki toŋib.
A butibe, ŋaan ki bi yêt ŋmakitir.
Bi chee bi parae, ki li wakii gar tann, ki yêt bin nyik bi toonbiit.
4 Ki n dukin a, “Niib na tee tariie ki kaa yan,
kimaan bi ki mi Yennu sɔnii, koo waa loon bii tuun linba.
5 Li paak, n saa saan bi tɔɔndamm boore ki pak namm,
kimaan ŋamme mi Yennu sɔnii,
ki mi waa loon bii tuun linba.”
Ŋaan bi kur yêt Yennu yiikoowa, ki bia yêt bin sak u mɔba.
6 Li paak, yanbɔr saa nyi fɔɔr ni ki lekib,
ki kinkatir saa nyi kunkoouk paak ki biirib,
ki naamuuk sii dɔɔ kpia bi doo ki guub,
ki saa pat wunba nyii nanyer,
kimaan bi mɔyêtuk na yab bonchiann,
ki yoo kur bi ki waa Yennu sɔnii.
7 Ki Yennu boi a, “Bee ki n saa nyik chabini?
I waas yêtima, ki poor yennii nba ki tee yenmɔnii sana ni.
N turib linba kur ki bi loon,
ŋaan ki bi chomm, ki ŋamii saa bonchonchona ŋei ni.
8 Bi tee nan taanjai nba dii gboo,
ki ji mɔk niɔŋ nan poo nae, ki sɔɔ kur nian u lɔɔ ŋaapoo.
9 N kan dat bi tuba linba na paaki-i?
Koo ki daa dont wutoor nibooru nba na paaki-i?
10 Saant bi daan tiinii kpaant ni ki biirib,
ŋaan i daa biirib chainchain.
Ii chɔɔ yiinii maŋ, kimaan bi ki tee min Yennu yab kaa.
11 Israel teeb nan Juda teeb maŋ ki waan nan waama.
Min Yennu-e pak na.”
Biaŋinba ki Yennu yêt Israel teeb
12 Bi faar faake ki paan Yennu, ki yet a, “U kan teent siari. Siara biak kan baar ti paaki. Ti kan ban la kuun, koo komi. 13 Yennu sɔkiniinba na tee wouŋo, ki Yennu maan na kaa bi ni. Li paak, ŋaant linba ki bi piak na n ŋmat bi mɔŋ paak.” 14 Tɔn, Yomdaanɔ Yabint Yennu nba yet linbae na a, “Kimaan niib na nba pak linba na, n saa te ki n maan na-ii tee nan muu nae a mɔb ni, ki niib na-ii tee daat nba ki li sii di.”
15 Yennu yet a, “Israel teeb, n baat nan digbanbanfɔkir jabe a bin kɔn nani, ki tee yaayoo ni digbann nba mɔk gbankur, ki i ki gbia koo ki bant li niib maan paak. 16 Bi jatiat saa fit kpi niib bonchiann, ki bi kur tee kunkɔnkɔncheena. 17 Bi saa di i jeet kur, ki kpi i bonjai nan bonpoi kur, ki ŋman i pei nan nei kur. Bi saa biir i tilontii kur. Bi saa jii banjiake ki biir i doi nba paar ki i maa li paak na kur.”
18 Yennu yet a, “Daa maŋ ni, n kan biiri fas fasi. 19 Li-i tee ki niib na boi a, ‘Bee ki ti Yomdaanɔ Yennu tun linba na ki turiti?’ fan yetib a, ‘Baa yêtin ŋaan jiantir boorganii yennii bi tiɔŋ tiŋ ni na paak, mɔtana bi sii tee yommii ki tur nigamm, tiŋ nba ki tee bi yar na ni.’ ”
Biaŋinba ki Yennu yakii nan u niib
20 Yennu din yet a, “A mɔɔnt linba na ki tur Jakɔb yaaboona, ki pakir Juda tiŋ ni 21 ki yet a: Gbiintir na man, yimm nba kaa yan, ki mɔk ninbina ŋaan ki ki laat, ki mɔk tuba ŋaan ki ki gbia na, 22 n tee Yennu-e. I kan tinin jaŋmaanii-i? I bo kii baantir kaa n boori-i? Mine nan tanbiiuŋ ki li kɔr mɔkgbeŋir, ki tee kɔru nba ki li kan ban yakir li paak yaayoo siiyoo. Nyunpana sii labin ki mɔk fuut, ŋaan kan fit do li paak. 23 Ŋaan niib na mɔk tubkangbatin nan mɔyêtuk, ki ŋmat gaar gann po. 24 Bi ki yeen bi mɔŋ a, ‘Ŋaant ki tii tiin ti Yomdaanɔ Yennu, wunba teen naalɔuŋ, nan sakosaak li saka yoo, ki teent jaauŋ saama na.’ 25 I toonbiite boon linba na. I biite te ki i kɔŋ linba na.
26 “Nibiit be n niib na ni ki tuu dɔɔ guu, nan nirɔ nba tuu pii laauŋ a wun soor nɔɔŋ na, ki bia naan nan binba tuu pii barit a bin soor jab na. 27 Bi ŋei gbee nan kpinkpanniie, nan nɔɔnii nba tuu gbee ŋmangɔuŋ na. Bi mɔkite, ki la paŋ, 28 ki di gboot, ki gbeŋit. Bi toonbiit ki mɔk paak; bi ki sommit kpeebii ki bi laat mɔnii bi buut ni, bi ki taant tatimm ki bi gaan bi mɔnii.
29 “Ŋaan min Yennu saa dat bi tuba linba na paaka. N saa pab bi toonbiit na paaka. 30 Bontonn nba mɔk gbananjekint tun tiŋ na paaka. 31 Yennu sɔkiniinba na fa faak kɔɔe; ki mannteeb na tuun nan sɔkiniinba nba wannib biaŋinba na, ki n niib ki mɔk siar ki saa paki. Ŋaan li joontu yoo-i baar, bi tan saa teen nlee?”