10
Ki jiin patmannu nan barmɔnii jiantu po
1 Israel teeb, gbiintir maan nba ki Yennu yaa wun pak turi na.
2 U yet a, “I daa waa digbanlia taatɔk,
i daa te ki bonsaana nba ki i laat sanpaapo na daamii-i,
halii nan laa lek kɔɔnt digbanlia jaŋmaanii nawa.
3 Niib maŋ jiantu tee yanne.
Tiike ki bi tuu chɔɔ ki lu fɔɔr ni,
ki tikpeera n jii bi pai ki kpeerir,
4 ki ŋammir nan salimpeena nan salimmɔna,
ki bin jii kpai ki kpaa sennir, a li daa baa.
5 Li pata tee nan baa tuu nan bont nba ki senn kpaab ni
ki li beer bondidiit nae,
bi kan fit pak, bi bia kan fit somm, niib-ii jikitib.
I daa tiinib jaŋmaanii: Bi kan fit paani daŋi,
bi bia kan fit sommini.”
6 Yennu, sɔɔ kaa ki tee nan fin na, a tee Yenjaanne,
ki a sann yab, ki bia mɔk paŋ.
7 Ŋmee kan tur fin nba tee digbana kur kpanbar na baakiri?
A jaŋ nan niib n tura baakira.
Subindamm ni nan kpanbara ni, sɔɔ ki be ki tee nan fin na.
8 Bi kura tee jatit nan bonliiniie.
Bi saa tumii bee, baa jii tiinii ki nan pata nba na boori?
9 Bi nyii nan salimpeena Speenn tiŋ nie,
ki nyii nan salimmɔna Ufas tiŋ ni,
ki saauk damm tan taan bi pata maŋ ki pɔrir.
Linba na kur tee bonninnant damm toonae.
Bi lannib taŋant nba ki taluura luue.
10 Ŋaan fin Yennu-e tee barmɔnii Yennu,
ki tee Yennu nba fo na, ki bia tee kpanbar yaayoo siiyoo.
A wutoor-i doo yoo nba, durinya tuu jekire;
digbana kan fit dia a wutoor.
11 (Yimme tee yin pakib nan Yennu saa biir pata nawa. Pata maŋ kaa nan sanpaak nan tingbouŋ na. Bi ji sii kaa siar po, tingbouŋ na ni.)
Dontir yaŋ ki teen Yennu
12 Yennu jii u yiikooe ki nan tingbouŋ na,
ki jii u subinii ki nan durinya na, ki tant sanpaak.
13 U tur mɔbe, ki nyun nba be sanpagbouŋ liik po na fu.
Ŋɔɔe te ki sanpagbant nyi siar kur po ki lakii.
Ŋɔɔe te ki sanyikintii nyikintir, ki wonpaaruk nyi u boore ki da.
14 Nisaarii laat linba na, ŋaan kaa yan, ki tee jatit.
Binba naan pata na dii feie,
kimaan pata nba ki bi naan na tee yanne, ki kaa manfoori.
15 Bi ki mɔk nyɔɔt, ki tee bin yisimme.
Yennu-i baar bi paak nan wutoor yoo nba, u saa biiriba.
16 Israel teeb Yennu na ki tee nan pata maŋ na kaa,
ŋɔɔe nan bona kur, ki gann Israel teeb a bii tee u tiɔŋ niib;
u sanne tee Yabint Yennu.
Ki jiin biiru nba baat po
17 Jerusalem teeb, bi looniwa. Tikit i faar man. 18 Yennu yaa wun ber nyinni tiŋ na nie. U saa buti, ki nan i yenɔkɔɔwa tan kan tenni. Yennu-e pak na.
19 Ki Jerusalem teeb yikin a,
“Ti la daŋ bonchiann, ki ti fiat maŋ kan buuri,
ki ti bo dukii a li tee linba ki ti saa fit gubin gaare.
20 Ti ŋei kpant langbenta.
Ki ŋmiit nba tuu diar na cheera.
Ti waas kur yaata,
ki sɔɔ ji kaa ki saa ŋamm maa ti ŋei maŋi,
sɔɔ kaa ki saa lor ti mɔŋmii na.”
21 Ki n jiin a, “Ti tɔɔndamm na tee jatite,
bi ki boi Yennu ŋmakitir po.
Ŋanne teen ki bi gbar, ki ti niib yat.
22 Gbiintir, maan baara,
ŋmatir be digbann nba be gaŋ po na ni bonchiann.
Li jab saa te ki Juda doi n kpant langbent,
ki mɔbɔie sii be leŋ.”
23 Yennu, n mi nan sɔɔ kaa ki dia u binbeŋ joontu yiikoo u nuu ni,
sɔɔ ki yen u mɔŋ manfoori.
24 Yennu, ŋmakitirit, ŋaan a daa mantik ton nanti,
koo ki dat ti tuba yoo nba ki a wutoor doo;
fi-i tun nna, ti saa boonte.
25 Ŋaant ki a wutoor-ii be digbana nba ki jiantira na,
nan niib nba yêta na paak.
Bi kpii timm nba tee a niib nae, ki biirit fas,
ki teen ti doi langbent.