12
Ki jiin Jeremaya buboit po
1 Yennu, min nan fin-i yaa ti bu, fine sii mɔk mɔnii.
Ŋaan n saa boia buboit ki jiin barmɔnii maan powa.
Bee teen ki yanbɔndamm mɔkitiri?
Bee ki ŋmabir damm paakiti?
2 A buribe, ki bi baa jiina, ki kpaatir, ki loon lɔɔna.
Yoo kur bi piak fanue ki jiint a po, ŋaan bi baka kaa a po.
3 Ŋaan Yennu, a min, ki laat maa tuun linba
nan maa loona biaŋinba.
Berin niib na, ki bin tut saan nan pei na ki bin kpib.
Ii guub nan yoo nba tan saa jaŋ nan bin kpib.
4 Li saa wei nlee ki ti tiŋ bia daa tee tinkooŋ,
ki siar kur boor mɔɔt n koori?
Bonkobit nan nɔɔnii kpenne, kimaan ti niib toonbiit paak,
niib nba yeen a, “Yennu ki laat linba ki ti tuun na.”
5 Yennu yet a, “Jeremaya, li-i tee ki a bak
nan fan poo nantaar poot nan niibi,
a saa teen nlee ki poo nan taanii?
Li-i tee ki a kan fit set paanu ni,
a saa teen nlee ki set Jɔɔdann mɔkir fɔɔr ni?
6 A tiɔŋ ninjamm nba nyii a ŋaak ni na kɔɔtawa,
ki taan nileeb po ki wora.
Baa lek piak nan mɔmant na, ŋaan a daa teeb yada.”
Ki jiin Yennu yanyêtuk po
7 Ki Yennu yet a, “N nyɔr nyik Israel teeba,
n yêt n nigannkab nawa.
N jii niib nba ki n loomm na, ki kubin bi datai nuu niwa.
8 N nigannkab na kɔn nanime.
Bi gaan jate n paak nan yanbɔr be fɔɔr ni na, ki n yan yêtib.
9 N nigannkab na tee nan nɔɔŋ nba ki kanbiat worɔ
lokir kur po nae.
Yiint muuk ni bonkobit ki bin baar tan di jaamm.
10 Digbangana yent damm bonchiann biir n daan tiinii kpaaba,
bi ŋmaa n kpaant ki biirir,
ki kpint n tinŋaŋ na ki teenir kunkoouk.
11 Bi teenir kankoonne ki li dɔɔ yann n boor ni.
Tiŋ na kur kpant kunkoouko ŋaan ki sɔɔ ki fiin li po.
12 Jab saan tiŋ na kur poe a bin fat bona.
N tun tɔbo a lin biir tiŋ na kur, ki sɔɔ kii be u yamani.
13 N niib buur diie, ŋaan jaan mɔɔt.
Bi tun nan bi paŋ, ŋaan bi ki la siari.
N wutochiɔŋo te ki bi jeet ŋakit.”
Ki jiin Yennu mɔsonn po
14 Ki Yennu yet a, “N mɔk siar ki saa pak tur Israel teeb kɔɔnanleeb nba biir tiŋ nba ki n tur n niib Israel teeb maŋ na. N saa nyinn nibiit maŋ bi tinii ni, nan baa tuu ŋabir bonbuburit nae, ki fat Juda teeb bi nii ni. 15 Ŋaan mi-i yaat namm, li poor po, n saa tinib ninbaauk. N saa jen nan nibooru kur bi tiɔŋ tiŋ ni, nan bi tiɔŋ digbann ni. 16 Li-i tee ki bi saa gaar n niib jiantu nan bi par kur, ki por a, ‘Nan Yennu nba be na,’ nan baa din tumii n niib a bii poor tingbann Baal sann ni biaŋinba na, bi saa pukin n niib po, ki sii mɔkitir. 17 Ŋaan li-i tee ki digbansiar kan sak n mɔb, ŋann ŋarin n saa ŋabirɔe ki biirɔ fas fas. Min Yennu-e pak na.”