14
Ki jiin yonkoonbiiuk po
1 Ki Yennu pak turin ki jiin yonkoonin po a,
2 “Juda mɔ kpemɔniie, kimaan u doi kpenne,
ki u niib dɔɔ tiŋ ni nan yanyêtuk,
ki Jerusalem mɔ ki loon sommir.
3 Mɔkita na tun bi daabae nyun po,
ki bi saan bunbuna boor,
ŋaan bi ki la nyun, ki ŋmat jen nan sɔkoona.
Bi yan ŋmate, ki bi ŋaa tama, ki bɔri bi numpo.
4 Tiŋ koore, kimaan saak ki baa, ki kpaara para biir,
ki bi bɔrii bi numpo.
5 Kɔnaaŋ nyɔr nyik u bike muuk ni, kimaan mɔɔt kaa.
6 Bɔnii see kunkona paake, ki foi ŋabitir nan mɔbɔi na,
ki bi ninbina diŋ, kimaan bi ki laat jeeti.
7 N niib bui ki fabin turin a,
‘Yennu, ti para ni beerit nan ti biira,
ŋaan a sommit nan faa senn mɔsonn na.
Ti nyika ki li wei bonchiann, ti tun biirawa.
8 Israel teeb yada kur gaa a paake, fine nyinnit biak ni.
Bee ki a tee nan saamɔ na ti tiŋ ni?
Bee ki a tee nan sinsommtɔɔ nba tuu dɔɔr nyɔyemmir na?
9 Bee ki a tee nan jɔɔ nba ki bi kpirɔ na?
Bee ki a tee nan kunkɔnkɔnnɔ nba kaa yiikoo
ki saa tinn nirɔ na?
Yennu, a setik be nant, ti tee a niibe. Daa nyikititi.’ ”
10 Ki Yennu pak ki jiin niib na po a, “Bi lon n boor ni yaatu bonchiann, ki bia ki fit dia bi mɔŋi. Li paak, n par ki mei bi paaki. N saa tiar biit nba ki bi tun na, ki dat bi tubawa.”
11 Ki Yennu pakin a, “Daa piakin nan man somm niib na. 12 Bi-i lekii lor mɔi, ŋaan n kan gbiint bi mɔnii nba jiin sommir po na, ki bi-i lekii mann mujoonu piinii, nan jeet piinii maruŋ ki turin, ŋaan n par kan maŋ bi paak. N saa kpib tɔbii nan kon nan yiarii nie.”
13 Ŋanne ki n yet a, “Yabint Yennu, a mi nan a sɔkiniinba na yeen niib na nan tɔb koo kon sii kaa, a kimaan a sat mɔb nan parmaasir sii be ti tiŋ paak.”
14 Ŋaan ki Yennu jiin a, “Sɔkiniinba na fae n sann ni; n ki tumm, koo ki turib mɔb, koo ki pakib siari. Baa laat linba ki piak na ki nyii n boor kaa, bi buntaa na tee bon-yana nba ki bi dukine. 15 Min Yennu-e beera maa saa tun linba ki tur sɔkiniinba nba ki n ki tumm, ŋaan ki bi piak n sann ni, ki yeen a tɔb nan kon kan baar tiŋ na paak na. N saa kpib tɔb nan kon nie. 16 Binba ki bi pak maan na ki turib na mun bia saa kpo li sɔnu nie. Ki bi saa lu bi gbanant Jerusalem sɔnjot ni, ki sɔɔ sii kaa ki saa piibi. Linba na saa tun ki tur bi kur nan bi poob nan bi bonjai nan bi bonpoi. N saa te ki bin pa bi toonbiit paaka.”
17 Ki Yennu wannin a n pak tur niib na ki jiin n parbiir po ki yet a,
“N ninnyuut-ii luun yonnu nan nyiɔk.
N kan nyik mɔnii, kimaan n niib la daŋ bonchiann ki li gbatiba.
18 Mi-i kɔɔ muuk, n tuu la jab nba ki bi kpiib tɔb ni na gbanante,
ki mi-i saan doi ni, man la ki niib kpenn kon.
Yennu sɔkiniinba nan mannteeb na tuun toona,
ŋaan bi ki mi baa tuun linba.”
Ki jiin niib na baruŋ po
19 Yennu, a set yêt Juda-e fabi-i? A ki loon Sayɔnn niibe-e?
Bee ki a turit daŋ nba yab ki ti kan la laafia?
Ti loon parmaasire, ŋaan bonŋansiar ki tuuni,
ki ti loon laafia, ŋaan ki woribuk baar.
20 Yennu, ti tun biirawa.
Ti fiit ti tiɔŋ biit nan ti yeejamm biita.
21 Tiat a mɔsonn na po, ki daa yêenti.
A daa baat nan fei Jerusalem nba ki a naangbouŋ be na paaki.
A daa porii mɔlor nba ki a lor nant na.
22 Tingbana na sɔɔ kaa ki saa fit tur saaki.
Sanpaak mɔŋ kan fit te saak n baa.
Ti teen ti dindann fin ti Yomdaanɔ Yennu nie,
kimaan fine tuun linba na kura.