22
Jeremaya mɔɔntii ki jiin Juda naan ŋaateeb po
1-2 Yennu din pakin a n saan Juda kpanbar nba tee Defid yaaboonn na ŋaak, ki pak kpanbar na, nan u saakab, nan Jerusalem teeb, a bin gbiint linba ki ŋɔɔ Yennu yet a, 3 “Min Yennu senti nan yii tuun linba ŋan ki bia took. Ii nyinn wunba ki bi ŋmaabɔɔ na wunba ŋmaabɔɔ na nuu ni. I daa dia digbangann teeb diabiiki, ki bia daa dia kpeebii nan pakɔi diabiik. I bia daa kpi nikaati. 4 Yi-i setiki tuun nan maa senni na, ŋann Defid yaaboonae sii yɔɔ tee kpanbara, ki ŋamm nan bi saakab nan bi niib sii yɔɔ be taantorit nan taanii paak, ki kɔɔ naan tammɔi na ni. 5 Ŋaan li-i tee ki i ki sak n sennu, n por turi nan naan ŋaak na saa teen langbenna. Min Yennu-e pak na.
6 “N boor ni, Juda naan ŋaak na fan nan Gilead tiŋ koo Lebanonn jɔjaana nae, ŋaan n saa teenir tin-yann nba ki sɔɔ kan kar leŋe. 7 N tun jabe maa bin baar ki biirir. Bi kur saa baar nan bi pajara, ki chɔɔ li kpekii dachaatŋana na, ki lu muu ni.
8 “Li poor po, digbangann teeb bonchiann sii gaar ki boi bi leeb, a bee teen ki min Yennu tun bonbooru na ki tur digbanjaann na. 9 Ki bi saa jiin a kimaan yaa nyɔr nyik yimm nan min Yennu mɔlor, ŋaan jiantir yenbis na paak.”
Jeremaya mɔɔntii nba jiin Joahas po
10 Yimm Juda teeb, i daa mɔ kpanbar Josaya paaki;
i daa mɔ u kpemɔnii, ŋaan ii bui saama u bija Joahas paak,
kimaan bi jiiu yaat nanɔ, ki u kan ban jen.
U kan ban ji la tiŋ nba ki bi din marɔ leŋ na.
11 Ki Yennu pak linba na ki jiin Josaya bija Joahas, wunba gaar u baa naan ki tee Juda kpanbar na po a, “U yaat nna nawa ki kan ban jen. 12 U saa kpo tiŋ nba ki bi saan nanɔ na nie, ki kan ban ji la tiŋ na.”
Jeremaya mɔɔntii nba jiin Jehoyakim po
13 Biiru be wunba jii fobit ki maa u ŋaak,
ki jii ŋmabir ki yarikir na paak;
wunba te ki u doo ni niib tuun toonn yann,
ki u ki pab na paak.
14 Daanɔ nba yet a, “N saa maa ŋajaanne ki tur n mɔŋ,
ki maa ditɔɔtii nba tee dijaana na,” biiru be u paak.
Nnae ki u tuu kɔɔn u ŋaak takorbona
ki jii kpek taabii ki faŋir ki pentir bonmɔŋ.
15 Li-i tee ki a jii kpek taabii ki maa ŋaak
ki li fan gar leeb ŋei, li saa fit teena kpanbarmɔnɔwa-a?
A baae la manfoor manu.
U din ŋane ki tee nimɔnɔ, ki do linba kur ki u tuun ni.
16 U din bu tatimm buut fanu, ki bont kur saan fanu ki turɔ.
Yentinu nba want biaŋinbae na.
17 Ŋaan fin kpan laat a ninfɔkin lommo.
A kpi nikaat, ki dia tonu ki dint a niib biak.
Yennu-e pak na.
18 Ki Yennu pak jiin Josaya bija Jehoyakim nba tee Juda kpanbar na po a,
“Sɔɔ kan bui u kpemɔnii, koo ki yet a,
‘Li bi, n yɔɔk, li bi.’
Sɔɔ kan mɔ u paak, koo ki bui yet a,
‘N yomdaanɔ, n kpanbar.’
19 U kuun sii tee nan boŋ kuun nae,
ki bi saa jiiu ki nyi lu Jerusalem nanyer po.”
Jeremaya mɔmaan nba jiin Jerusalem joontu po
20 Yimm Jerusalem teeb, saant Lebanonn tiŋ ni ki saa hoot.
Ii saa Basann tiŋ ni ki saa bui.
Ii be Moab kunkonfɔkit paak, ŋaan kii hoot,
kimaan bi nyann i jab kura.
21 Yennu pak nani yoo nba ki i mɔkitir nae,
ŋaan ki i yêt gbiintu.
I tuun nnae i manfoor kur ni, i ki ban sak Yennu mɔbi.
22 Wouŋo saa pebir i tɔɔndamm ki yaat namm,
ki bin soor i jab ki yaat namm,
ki bii tee tɔb dansarkɔɔra.
Ki i doo n di fei ki la yukpiasir,
kimaan biit nba ki i tun na paak.
23 I be i yamanie,
i ŋei nba ki bi nyii nan kpekii Lebanonn ki maa na ni,
ŋaan tont-i baari yoo nba, i sii mɔk ninbaauk bonchiann,
ki tont maŋ sii tee nan poo nba tuu mɔ matyiaru nae.
Biaŋinba ki Yennu saa dat Jehoyachinn tubir
24 Ki Yennu pak Juda kpanbar Jehoyachinn, wunba tee Jehoyakim bija na a, “Nan maa tee Yennu nba fo na, fi-i lekii bo tee dɔuk baŋ n niidiitu ni, ŋaan n bo saa pitae, 25 ki tur niib nba ki a tiimm jaŋmaanii, niib nba loon bin kpiia na. N saa jiia ki tur Babilonn kpanbar Nebukanesar-e nan u jab. 26 N saa mia fin nan a naa ki yin saan digbangann. I saa saan digbangann nba ki bi ki mar i sɔɔ leŋe, ki i banlee kur saa kpo leŋ. 27 I sii mɔk niɔŋ nan yin la tiŋ na, ŋaan i kan ban jeni.”
28 Ki n yet a, “Kpanbar Jehoyachinn tee nan bobiyiɔŋ nba ki bi tuu lu, ki sɔɔ ki loonir nae-e? Ŋanne teen ki bi soor ŋɔɔ nan u waas kur ki saan namm yommisin ni, digbangann nba ki bi ki mi na-a?”
29 Juda tiŋ, mine tee Yennu. Gbiintir linba ki n piak na:
30 “Jɔɔ na saa kɔŋ u waasa,
ki sii tee daanɔ nba kan ban nyann.
U kii mɔk yaaboona nba saa dia Juda tiŋ
ki tee binba set kpanbar Defid taaboouk ni.
Min Yennu-e pak na.”