31
Ki jiin Israel teeb kunu po
1 Ki Yennu yet a, “Yoo baat, ki n tan sii tee Israel booru kur Yennu, ki bi mun tee n niib. 2 N wann n ninbatinu ki tur niib nba nyii kuun ni kunkoouk paak na. Yoo nba ki Israel teeb ŋakitir ki loon foon na, 3 ki n nyii banfɔkira ki baar bi boor. Israel teeb, n yɔɔ loonie, ki tukin wanti n lomm nba kaa gbennu na. 4 N bia saa fiiniwa. I saa ŋamm jii i naayaka ki waa waak nan parpeenn, 5 ki bia saa ŋamm bur daan tiinii Samaria kunkona paak, ki binba bur tiinii maŋ saa di li lɔɔna. 6 Barmɔnii, yoo baat ki guuteeb tan sii be Efraim kunkona paak, ŋaan yiin leeb ki yet a, ‘Ŋaant ti do Sayɔnn man, ti Yomdaanɔ Yennu boor.’ ”
7 Ki Yennu yet a, “Yinin yanii nan parpeenn
ki tur Israel nba tee digbana kur digbanjaann na.
Yinin i dontir yaŋ a, ‘Yennu tinn u niiba,
u fat binba kur biar nawa.’
8 N saa nyi namm gaŋ po ki baar namm,
ki bia nyi namm tingbouŋ na kpinii kur po
ki baar namm.
Jɔɔnii nan dianii saa weib ki baar,
ki podamm nan binba yaa bin mar kur saa baar.
Bi saa jen ki tee digbanjaanne.
9 N niib sii jent ki mɔe,
ki mein yoo nba ki n kpent namm na.
N saa saan namm kpenii nba mɔk nyun boor,
ki tɔkin namm sɔnu nba kaa boota, ki bi kan gbiat.
N tee nan baa nae ki tur Israel teeb,
ki Efraim boorue tee n bijakper.”
10 Ki Yennu yet a, “Digbana, gbiintir ki turin,
ki mɔɔnt n maan banfɔka mɔkgbiant.
N yat n niiba, ŋaan n saa tikiribe kii guub,
nan pekpaarik nba tuu guu u pei na.
11 N nyinn Israel teebe ki tinnib digbanpaarir nuu ni.
12 Bi saa baar ki yin nan kpinkpammuk Sayɔnn kunkonn paak,
ki bi para sii mei n piinii paak,
ŋanne tee jeet nan tilɔɔna daan nan kpan nan bonkobit.
Bi sii tee nan kpabik nba ki bi maantir nyun fanu nae,
bi sii mɔk linba kur ki bi loon.
13 Ki sapaamm saa waa waak ki mɔk parpeenn,
ki naasimm nan jakpera sii kpamm.
N saa maan bi para,
ki saa kpint bi mɔnii na ki teen kpinkpammuk,
ki kpint bi parbiir ki teen parmaasir.
14 N saa gboon mannteeb nan jeet nba ŋan,
ki tur n niib, bi bonloŋa kur.
Min Yennu-e pak na.”
Ki jiin Yennu ninkpabauŋ po
15 Ki Yennu yet a, “Fuur fu Rama doo ni,
fuur nba tee kpemɔnii nan fabinii,
ki Rachel mɔ u waas paak,
ki bi barimɔ ki tan goo,
kimaan u waas kaa.
16 Nyikin mɔnii ŋaan fiar a ninnyuut na.
Linba kur ki a tun ki tur a waas na kan biar yann,
ki kaa nyɔɔti. Bi saa nyi datai tiŋ ni ki jena.
17 Dindann be a tɔɔnn po; a waas na saa kpenna.
Min Yennu-e pak na.
18 “N gbia ki Israel teeb piak nan parbiir a,
‘Yennu, ti tuu tee nan bonkobyiɔk nae,
ŋaan a tumiit mɔsakuwa.
Jenin nant, ti teen siir nan tin jen a boora,
fin nba tee ti Yomdaanɔ Yennu na.
19 Ti bo yêtae, ŋaan mɔtana ti loon tin jene.
Faa dat ti tuba na, ti yura ji sɔɔne nan parbiir.
Ti din dii fei-e ki la yukpiasir,
kimaan ti din tun biit ti bisin niwa.’
20 “Israel digbann, fine tee n bijaloŋir,
bik nba ki n lomm mantik be u ni.
Yoo nba kur ki n taa a sann,
n tuu dukin a po nan lomme.
N yan tuu nyi saan a boore.
N sii mɔk ninbatinu nana.
21 Teent nyina ki dɔk sɔnu na.
A ŋamm la sɔnu nba ki a tɔkin ki yaat na.
Jenin man, yimm Israel teeb,
jenin doi nba ki i din nyii na ni man.
22 I saa taantir nlee, yimm yadkanpɔɔna damm na?
N nan bonpaann nba be li kɔɔe,
ki li be li kɔɔ nan poo nba tuu tekir jɔɔ na.”
Ki jiin Yennu niib nyɔɔt baaru po
23 Ki Yabint Daanɔ nba tee Israel teeb Yennu na yet a, “Mi-i jiin niib na bi tiŋ ni yoo nba, bi saa ŋamm pak Juda tiŋ ni nan li doi ni a,
‘Yennu n teen piisin Jerusalem kasii kunkonn paak,
kasii boor nba ki u be na.’
24 Niib sii be Juda tiŋ nan li doi kur ni, ki kpaara sii be, ki pekpaarii be nan bi pei. 25 N saa maan binba bak na gbanu, ki bia gboon wunba ki kon baŋɔ. 26 Ki nisaarii saa yet a, ‘N gɔɔn ki tan yerik, ki sɔɔ ki n mɔk paŋ.’
27 “Min Yennu piak nan yoo baat ki n saa gbeen Israel nan Juda tinii nan niib nan bonkobit. 28 Ki maa la yaak nba ki ŋabir, ki daa bir, ki ber, ki biir, ki bet na, nnae ki n saa bia la yaak ki burib ki bia maa donnib. 29 Li yoo-i baar, nisaarii ji kan yet a,
‘Bibaanba mɔɔ gbiirkaa, ŋaan ki li mii bi waas nyana.’
30 Ŋaan wunba mɔɔ gbiirkaa, u nyanae sii mii, ki sɔɔ kur saa kpo u tiɔŋ biit paak.”
31 Ki Yennu yet a, “Yoo baate, ki n tan saa lor mɔlorpaann nan Israel teeb nan Juda teeb. 32 Li tan kii tee nan mɔlor nba ki n din lor nan bi yeejamm, yoo nba ki n kub bi nii ki nyinnib Ijipt tiŋ ni na kaa. N lek din tee nan bi sɔrɔ nae, ŋaan ki bi ki dia mɔlor na. 33 Mɔlorpaann nba ki n saa lor nan Israel teeb na sii tee nnae: n ji saa teen n sennii maŋ bi dudukit nie, ki sɔbir bi para ni. Mine sii tee bi Yennu, ki bi tee n niib. 34 Bi sɔɔ ki tee wun ji tumii u lɔɔ koo u ninja ki yaa, ‘Bant Yennu,’ kimaan bi kur tan sii min, laa nyii tarik ki saa tuu paarɔ. N saa nyik chab bi biit, ki kan ban tiar bi yanbɔntoona po. Min Yennu-e pak na.”
35 Yennu-e tur yonnu ki li teent yentu daar ni,
ki turit ŋmaarik nan ŋmaabira ki li teen yentu nyiɔk.
Ŋɔɔe tuu kut mɔkir ki te ki li fu, u sanne Yabint Yennu.
36 U senn mɔsonn a durinya ŋaak bona nba be li seenu ni
ki yukii biaŋinba na, nnae ki Israel sii tee digbann ki yukir.
37 Li-i tee ki bi saa fit bikin sanpaak, ki ŋmaa tingbouŋ na,
li yooe ki Yennu mun saa yêt u niib Israel teeb,
kimaan linba ki bi tun na paak.
Yennu-e pak na.
38 Ki Yennu yet a, “Yoo baate ki bi saa ŋamm maa Jerusalem, ki li tee n doo, laa nyii Hananel difoouk na boor, ki saan tuu Gungɔnt boor Tammɔb na. 39 Ki kpaar na saa nyi yonbaa po maŋ ki saan baar Gareb kunkonn paak, ki gɔnt baar Goa. 40 Baauk na kur, baa pii kuun sian, ki bi lubin bonchiat na, nan kpaant nba be Kidronn nyuntonn boor na kur, ki saan tuu Taamm Tammɔb nba be yondo po na, li kur sii tee kasiie ki turin. Bi ji kan ban yeer doo na koo ki biiriri.”