47
Yennu maan nba jiin Filistia tiŋ po
1 Ijipt kpanbar din tan lekin Gasa*47.1 Gasa din tee Filistia doi na yenne. na, ki sɔɔ Yennu pak nanin ki jiin Filistia tiŋ powa a:
2 “Gotir! Nyun do gaŋ po, ki saa pubir nan nyunmɔnn na.
Li saa piin tiŋ na nan linba kur be li paaka,
li doi nan niib nba be leŋ na. Niib saa mɔ boi sommir po.
Sɔɔ kur nba be durinya na ni saa bui bonchiann.
3 Bi saa gbat taanii taawoka mɔnii, nan torit mɔnii,
nan fiia birintu fuur.
Baanba kan jiant bi waas po, bi nii sii sɔɔne.
4 Yoo baar nan bin biir Filistia-wa,
ki pot sommir nba ki u tuu laat Taya nan Sidonn boor na.
Min Yennu-e saa biir Filistia teeb na;
ŋamme tee binba kur nyii Kret mɔkgbiɔŋ po na.
5 Parbiir nba kaa paak baar Gasa teeb paaka,
ki Askelonn niib ŋmin.
Filistia niib nba biar na saa mɔ ki lin wei nlee?
6 I yikin ki piak a,
‘Yennu takoobu, nlee yooe ki a saa nyik niib kɔtu?
Ŋmatir sik a toouk ni. Ii be leŋ kii foi.’
7 Ŋaan li saa teen nlee ki foi?
kimaan n turir toonn a lin tuma.
Mine wannɔ nan wun lek Askelonn doo
nan niib nba be mɔkgbiɔŋ na.”