51
Ki jiin Babilonn tubdatleer po
1 Yennu yet a, “N baat nan wonbiiuko a man biir Babilonn tiŋ nan li niib. 2 N saa tun boorganu ki bin baar biir Babilonn, nan wouŋ nba tuu pebir fouŋ ki yaat nann na. Biiru daar maŋ-i baar, bi saa lek lokir kur po, ki tiŋ na saa biar dɔɔ yann. 3 I daa teen bi jab na yaak ki bi yeek bi peenii, koo ki lia bi jatiati. I daa nyikin bi naasimm na. Ii boont bi jab na kur. 4 Bi saa la danii, ki kpo bi doi sɔnii ni. 5 Min Yabint Yennu nba tee Yomdaanɔ na ki nyɔr nyik Israel teeb nan Juda teeb, nan baa lek tun ki biir min nba tee Israel teeb Kasii Yɔɔ na. 6 Chiat ki nyi Babilonn man. Tinin, ki tinn i manfoor man. I daa te ki bi kpi-i Babilonn teeb biit paaki. N pa bi panne, ki daar bi tuba nan laa jaŋib na. 7 Babilonn din tee nan salima daŋmaŋ nae, n nuu ni, ki n te ki durinya kur yib. Digbana din nyuu li daame ki waat. 8 Babilonn baae ki boont. Ii mɔ li kpemɔnii man. Ii kpaan tebuk ki teen li fiat na, li pasiar li saa buura. 9 Boorganu nba be leŋ na yet a, ‘Ti yabir a tin somm Babilonn, ŋaan sɔɔ yoo gara. Ŋaant ki tin nyik ŋaan ŋmat kun. Yennu jii u paŋ kure ki dat Babilonn tubir ki biirir chain chain.’ ”
10 Yennu yet a, “N niib na hoot a, ‘Yennu wann nan timme mɔk mɔnii. Ŋaant ki tin saan pak niib nba be Jerusalem na, ti Yomdaanɔ Yennu nba tun linba.’ ”
11 Yennu fiin Media kpanbarawa, kimaan u loon wun biir Babilonn-e, waa saa teen biaŋinba ki pa u Ŋasaakak biiru paake na.
Lek teeb saakab na tur mɔb a, “Ŋatir i peenii man. Teent siir nan i naagbankɔŋa man. 12 Turin nyinn ki bin lek Babilonn joonjot. Kɔɔnt guuteeb na para. Sent guuteeb na bi seenii ni. Laan jab muuk ni man.”
Yennu tun linba ki u yet a u saa tun ki tur Babilonn niib nawa. 13 Tiŋ maŋ mɔk mɔka nan mɔkint bonchiann, ŋaan li yoo baara, ki li manfoor jiinn cheera. 14 Yabint Yennu por nan u mɔŋ manfoore, nan u saa baar nan jab bonchiann, ki bin tan lek Babilonn, ki jab na sii yab nan naasuut na, ki hoot nan nyannu.
Ki jiin dontir yaŋ na po
15 Yennu jii u yiikooe ki nan tingbouŋ na,
ki jii u subinii ki nan tingbouŋ na nan sanpaak.
16 U sennue te ki nyun nba be sanpagbant paapo na fu,
ki nyi nan sanpagbant lokir kur po ki tikiir.
Ŋɔɔe te ki sanyikintii nyikintir saak ni,
ki te wouŋ nyi u boor ki da.
17 Nisaarii laat linba na kure, ŋaan tee jatit nan bonliinii.
Binba naan pata na dii feie,
kimaan baa naan pata nba maŋ tee bonninnanti,
ki kaa manfoori.
18 Bi kaa nyɔɔti, ki tee niib n yêtibe,
ki Yennu-i baar a wun bu bi buut yoo nba, u saa biirib.
19 Jakɔb Yennu na ki tee nan ŋamm na kaa.
Ŋɔɔe tee wunba nan bont kur,
ki gann Israel teeb a bii tee u tiɔŋ niib.
U sanne tee Yabint Yennu.
Ki jiin Yennu jaar na po
20 Yennu yet a,
“Babilonn, a tee n jaare ki tee n tɔb jatiɔk.
N jiia ki yeer digbana nan tinii,
21 ki biir taanii nan bi jakira,
ki biir taantorit nan li ŋmakit-teeb,
22 ki kpii jab nan poob, ki kpii saakab nan waas,
ki kpii bonjai nan bonpoi,
23 ki kpii pekpaarii nan bi pei,
ki kpii binba dia taanii ki ko tanmɔna nan bi taanii maŋ,
ki kpii kpanbara nan tɔɔndamm.”
Ki jiin Babilonn tubdatu po
24 Ki Yennu yet a, “I saa la ki n pa jiin Babilonn nan li niib, biit nba kur ki bi tun tur Jerusalem na paak. 25 Babilonn, a mɔk paŋ nan jɔjaann nae, ki biir durinya kur, ŋaan min Yennu-e tee a dataak. N saa soora ki ŋmata nan tant ki nyika tanpent ni. 26 Sɔɔ kan ban jii a langbent ni tana ki maa ŋaaki. A sii tee nan kunkoouk nae yoo kur. Min Yennu-e pak na.
27 “Turin nyinn nba ki bi saa lek. Pebin naatunn ki digbana n gbat. Teent niib na tɔb siir ki took Babilonn. Pakin digbana nba tee Ararat nan Mini nan Askenas ki bin lek. Nyint jasaakɔɔ ki wun gar bi tɔɔnn. Baat nan taanii na, ki bii yab nan naasuut na. 28 Teent niib na tɔb siir ki took Babilonn. Tumin ki boi Media kpanbara po, nan bi tɔɔndamm nan bi saakab po, nan digbana nba kur ki bi dia na jab po. 29 Tingbouŋ na jekire nan jaŋmaanii, kimaan Yennu tuun u lor nba ki u yaa wun kpant Babilonn kunkoouk nae, ki sɔɔ kan kar leŋi. 30 Babilonn jab nyik kɔnna, ŋaan ji be bi ŋapaara nie. Bi para kpoe, ki bi ji tee nan poob na. Bi yeer doo na tammɔiwa, ki joo ŋei na muu. 31 Toomiinba ji tiine yenɔ yenɔ ki saa kumii Babilonn kpanbar na nan bi yeer u doo na lokir kur po ki kɔɔwa. 32 Datai fat punpootboor na, ki joo ŋapaara na muuwa. Babilonn jab na yan pute. 33 Li kan yukir ki datai na saa kpib ki ŋmaatib, nan baa tuu ŋmaat dii jarik paak na. Min Yabint Daanɔ nba tee Israel teeb Yennu nae pak na.”
34 Babilonn kpanbar pot pot Jerusalem ki nakɔwa.
U nyik doo na koonte nan sɔkoonn na,
ki nakir nan waakper nba tuu nak bonkobuk biaŋinba na.
U jii linba ki u loone ŋaan lu linba tenn na.
35 Ŋaant ki Sayɔnn niib n yet a,
“Biiru nba baarit na kur nyiiruk n baa Babilonn paak.”
Ŋaant ki Jerusalem niib n yet a,
“Biak nba kur ki ti dii na nyiiruk n baa Babilonn paak.”
Biaŋinba ki Yennu saa somm Israel teeb
36 Yennu pak Jerusalem teeb na a, “N saa gaar i paak ki te ki i datai n pa baa tun linba ki turi na paak. N saa te ki Babilonn kpen-yura n koor, ki mɔka na n fɔɔr. 37 Tiŋ maŋ saa kpant langbent, ki muuk ni bonkobit sii be leŋ. Leŋ sii tee jaŋmaansooruk boore, ki sɔɔ kan kar leŋ, ki wunba kur lar, jaŋmaanii saa soorɔ. 38 Babilonn teeb na kur fu nan yanbɔra nae, ki mɔ nan yanbɔrbis na. 39 Bi tee jawudamme-e? N saa teen jaamm ki turib, ki te bin nyu yib kii mɔk parpeenn. Bi saa gɔɔn ki kan ban yerikii. 40 N saa te bin kɔtib, nan baa tuu kɔt pei nan buunii nan pejai biaŋinba nae. Min Yennu-e pak na.”
Ki jiin Babilonn joontu po
41 Ki Yennu pak jiin Babilonn po a, “Bi nyann doo nba ki durinya tuu dontirɔ nawa. Babilonn ji tee siaminba mɔk jaŋmaansooruko ki tur digbana. 42 Mɔkgbeŋir pubir ki doo Babilonn paak, ki nyunpana piinɔwa. 43 Doi na kpant jaŋmaansooruk boore, ki tee nan kunkoouk nba kaa nyun, ki niib ki kɔɔ leŋ, ki bia ki gaar leŋ na. 44 N saa dat Babilonn tingbann nba tee Bel na tubira, ki te wun jiin bona nba ki u jan na, ki digbana bia ji kan jiantɔ.
“Babilonn joonjot baawa. 45 Israel teeb, chiat ki nyi leŋ man. Chiat ki tinn i manfoor, n wutochiɔŋ na ni. 46 I daa ŋaan tama koo ki tiin jaŋmaanii, yaa gbia biyaa na paaki. Binn kur mɔk li biyaae, biyaa nba jiin tɔbii po, nan biyaa nba jiin kpanbara nan bi leeb kɔna po. 47 Yoo baate ki n saa dat Babilonn tingbana tuba. Digbann na kur saa di fei, ki bi saa kpi leŋ niib na kur. 48 Linba kur be tingbouŋ na paak nan sanpagbant ni saa hoot nan kpinkpammuk, yoo nba ki Babilonn saa kɔɔ jab nba nyii gaŋ po ki baar a bin biirir na nuu ni. 49 Babilonn teebe baar nan durinya kur po niib kuun, ki mɔtana Babilonn saa baa, kimaan u te ki Israel teeb bonchiann kpo. Min Yennu-e pak na.”
Ki jiin Israel teeb nba be Babilonn na po
50 Yennu piak teen u niib nba be Babilonn a, “I nyii kuun niwa. Ii saa man. I daa taantir. Yaa lek fɔk nan i doo na, ŋaan ii dukii min nba tee i Yennu na po, kii tian Jerusalem po. 51 I yeen a, ‘Ti dii fei ki la yukpiasira, ti la nan ti ki mɔk sommtɔɔ nan yenɔkɔɔwa, kimaan boorganu gaar kasii boa nba be Yenjiantu Ŋasaakak ni nawa.’ 52 Li paak, n piak nan yoo baat ki n saa dat Babilonn tingbana na tuba, ki binba la danii na saa mɔ tiŋ na kur po. 53 Li-i lekii tee ki Babilonn bo saa fit do ki saa maa ŋacheenn sanpaapo, ŋaan n bia bo saa tun niib leŋ ki bin saan yeer ŋaak maŋa. Min Yennu-e pak na.”
Biaŋinba ki Yennu saa ŋamm biir Babilonn
54 Yennu yet a, “Gbiintir mɔnii nba be Babilonn,
kpemɔnii nba jiin tiŋ na biiru po.
55 N biir Babilonn-e ki saa te lin muu sirrr.
Jab tiin kɔɔ leŋ nan mɔkgbeŋir ni nyunpana nae,
ki lekin nan fuut nba yab.
56 Bi baar ki biir Babilonn-e, ki nyann li jab,
ki bia kɔnn bi tɔrbanawa.
N tee Yennu nba daar biit damm tubae,
ki saa tun Babilonn linba jaŋɔ.
57 N saa te ki li doo diara, nan li yandamm
nan li tɔɔndamm, nan li jab n yib.
Bi saa gɔɔn ki kan ban yerik.
Min kpanbarjaanne pak na. Mine tee Yabint Yennu.
58 Bi saa daa Babilonn joonpaarit ki sikin tiŋ ni,
ki joo li tammɔfɔkit na muu.
Digbann maŋ toona kur teen yanna, bi bakint na dii muuwa.
Min Yabint Yennu-e pak na.”
Ki jiin Jeremaya mɔmaan po
59 Kpanbar Sedekaya tiɔŋ ŋmakit-tɔɔ din tee Seraya-e, ki u tee Neria bija, ŋaan tee Maseya yaaboonn. Sedekaya nba dii Juda naan, li bina ŋanna nie ki ŋɔɔ nan Seraya tɔk saa Babilonn, ki n tur Seraya mɔmasiar nna. 60 N din sɔb biiru nba kur saa baar Babilonn-e, ki teen gbouŋ ni, nan linba kur pukin ki jiin Babilonn po. 61 N din yet Seraya a, “Li-i tee ki a baar Babilonn, fan karin linba kur sɔb na ki tur niib na. 62 Li poor po fan miar Yennu a, ‘Yennu, a pak nan a saa biir doo nawa, ki bonfoor sii kaa leŋi, laa tee nirɔ koo bonkobuk, ki li sii tee nan kunkoouk nae yoo kur.’ 63 Seraya, li-i tee ki a karin gbouŋ na ki tur niib na ki gbenn, fan jiir ki lor nan tann ki lur Yufrates mɔkir ni, 64 ŋaan yet a, ‘Linba saa tun ki tur Babilonn-e na. Li saa kpii ki kan ban pukiti, kimaan biiru nba ki Yennu saa baar nann na paak.’ ”
Jeremaya mɔmaan na dian nnae.