1 Nisaarik daa tee waaminnae ki gbee nan daamii. 2 Ti kpaatire, ki suur yian yian nan tipuuk na. Ti boore nan yunyuŋ nba boor biaŋinba na. 3 Yennu, a saa gotin koo ki sennin ki bu n buuta-a? 4 Bonŋansiar ki fit nyi linba ki yeen ni. 5 Yennu daan senn nisaarik manfoor ki jaŋ u ŋmaarii kann nba tee-e, ki u kan fit yakir. 6 Lekin a numm ŋaan nyikɔ; ŋaant ki wuu be u binbenpaarir ni, li-i tee ki u saa fit.

7 Bi-i chɔɔ tiik ki lu, ŋaan dindann be u paak, u tuu jen u manfoor nie ki kpaatir. 8 U jiina-i lekii kpet biaŋinba, ki u nyakir na kpo tiŋ ni, 9 wuu laat nyun, u tan saa binte nan tipaaŋ na. 10 Ŋaan nisaarik tuu kpoe, ki u joontu kure na; ki wuu kpo, u ji be lee?

11 Kpenii nba jit ki ki puub biaŋinba, ki mɔka koor na, 12 nnae mun ki niib kpenn, ki ji ki fi. Bi kan ban fiir durinya na ni, bi kan ban yerik bi gɔɔn ni.

13 N sunman ki a bɔrin kpeentiŋe, ki ŋaan ki mii bɔr leŋ ki saa tuu yoo nba ki a wutoor saa maak, ki a ji senn yoo, ki tan tiar n po. 14 Nirɔ-i kpo, u saa fit jen u manfoor niwa-a? Ŋaan min saa guur ki la yoo nba ŋane, ki guur nan daamii yoo na nba tan saa gbenn. 15 Ki a ji kii yiinin, man toon, ki a sii mɔk parpeenn nanin, min nba tee a naamii na. 16 Ki a sii gorii taaŋmaatir nba kur ki n ŋmaan, ŋaan a kan kan n toonbiiti; 17 ki a saa nyik chabin, ki tamm n biit po, ki saa piin biit nba kur ki n tun.

18 Yoo baate ki jɔjaana tan saa bet baa, ki tanpiit n chat. 19 Nyun saa lukir tana, ki sajakpera saa baa ki piar tiŋ; nnae ki a biir nisaarik dindann, u manfoor po. 20 Ki a tuu nyann nirɔ, ki yaatɔ ki u ji ki be, ki u numm tuu gbitik kuun ni. 21 Ki u waas tuu tan la baakir, ŋaan ki u ki bant, koo u waas na-i dii fei, ki bi ki kumiiɔ. 22 U tuu kpan bant u mɔŋ gbanantont nan u ninbadudukit na kɔɔe.