1 Ki Job jiin a: 2 N ban gbat mɔbona nba na booruwa, ki chekinii nba ki i teenin na tee gbanantonte. 3 I kpan yaa yii piake yoo kuri-i? I sii loon mɔbonjoontkara yoo kuri-i? 4 Li-i bonni tee ki i be n binbeŋ na booru ni, ki n mun be i binbeŋ na ni, n bo saa fit yet yaa piak linba na kurawa. N bo sii gumii n yure nan subinii, ki pak nani mɔbona bonchiann. 5 N bo saa chekini nan kpaanii, ki bo sii ŋammit piak, a lin maan i para.

6 Ŋaan mi-i yet siari, li ki sommitin; ki li-i tee ki n ŋmini, li ki maakit n gbanantonti. 7 Yennu, a te ki n chɔka, ki bia te ki bi kpii n ŋaateeb. 8 A soorima ki tee n dataak. N tee gbouŋ nan kpaba kuukɔɔe, ki niib jiir ki li tee n toonbiit nyinn.

9 Ki Yennu jii wutoor ki pat patin, ki goriin nan naŋ. 10 Ki niib yisimin ki see lintirin, ki pebitin tanpakii. 11 Yennu-e jiin ki kubinin nibiit nuu ni. 12 N din be parmaasir ni, ŋaan ki Yennu soor n turu ni, ki but butin ki nannin. U jii mine ki n tee jabenn, 13 ki yekitin peenii ki li nyi lokir kur po, ki tee peenii nba kɔɔ saatin ki teenin daŋ. Linba na lek, ŋaan u ki mɔk ninbatinu nanin. 14 U teenin daŋ yoo nan yoo, ki lekinin nan kunkɔnkɔnnɔ na. 15 Ki n mɔ fabin ki lia liant nba tee bɔtoot liant, ki kɔŋ dindann, ki kar tanbiinii ni, 16 ki bui, ki n ninbina tan mɔnn, ki faant, 17 ŋaan ki n ki tun jat-toonsiari, ki n Yenmiaru tee barmɔnii.

18 Tingbouŋ, a daa bɔrii wahala nba baarimi. A daa te yiinii nba ki n yi, ki li tee barmɔnii po na kpakint yanni. 19 Sɔɔ be Yendɔuŋ ni ki saa set n paak, ki pak turin. 20 N yɔɔsnba laame, ki n nunii nyi ninnyuut, a Yennu n la. 21 N loon sɔɔ n set n paak ki barin Yennu, nan nirɔ nba tuu barin u yɔɔk paak biaŋinba na. 22 N bina na saae, ki n ji tɔk sɔnu nba saa, ŋaan ki ki jent na.