1 Kut bootit be ki tee siaminba ki bi gbii salimpeena. Boa be ki tee siaminba ki bi ŋammi salimmɔna. 2 Niib gbii tiŋ ki nyint kut li ni, ki naan tana ki nyint kutmɔnt li ni. 3 Niib gbii boot sunsunt, ki baat tinpɔɔr ni, ki kpaan kut nba be bunbɔncheenn ni, 4 ki li fɔk nan niib nba kɔɔ siaminba, koo ki fɔk nan siaminba ki nisaarik saa baar. Ki niib gbii kut boot-tintant, ki saa tuun leŋ bi kuukɔɔ, ki tɔb ŋmiit ki siik bootit na ni. 5 Tiŋ nba ki jeet nyi li ni na, li tiŋe bia di muu tinpɔɔr niwa. 6 Ki tiŋ na tana mɔk tanbinyinyira nba daauk paar, ki li tanbiinii mɔk salima, 7 ki kanbiɔk kaa ki laat sɔnu nba saa kut bootit na ni. Ki juuk bia kaa ki ban yukir ki gar li paak. 8 Yanbɔr koo bonkob-susoleeuk taar ki ban ŋmaa sɔnii nba ki sɔɔ kaa leŋ maŋ.

9 Nisaarii gbii tana nba paar paake, ki gbii jɔɔt nyaka ni. 10 Baa gbii ki faa sɔnii tana ni na, ki bi laat tanbinyinyira nba daauk paar. 11 Bi gbii ki baat kpen yur po, ki nyint linba be bɔr ni paanu. 12 Ŋaan lia nie ki a saa la yanfoomi? Lia nie ki ti saa tumii ki banni?

13 Ti kan la yanfoon nisaarii boori. Sɔɔ ki mi li ŋant nan barmɔnii. 14 Ki mɔkgbeŋa nan mɔka nba sumii yeen a, a kan la yanfoon bi ni. 15 A kan fit jii salimpeena koo salimmɔna ki daa yanfoomi. 16 Ki salima nba ŋan nan tanbinyinyira nba daauk paar, ŋaan li nyɔɔt kan fit yekin nan yanfoomi. 17 Li mɔk nyɔɔt ki gar salima, ki bia mɔk nyɔɔt ki gar salima seŋ, koo seŋ leer nba daauk paar. 18 Yanfoon nyɔɔt yab gar tanbinyinyira nba kur be ki li daauk paara. 19 Ki tanbinyinyira nba daauk paar nan salinŋana na, ŋaan li nyɔɔt kan fit yekin nan yanfoon nyɔɔti.

20 Yanfoon nyi lia nie jikii? Lia nie ki ti saa tumii ki banni? 21 Bonfosiar kaa ki saa fit lari; nɔɔn nba lek yuuk sanpaapo na, ŋaan u kan fit lar. 22 Ki kuun nan biiru yeen a bi gbia bi yaae ki jiin yanfoon po.

23 Yennu kuukɔɔe mi li sɔnu, ki mi siaminba ki u saa lon yanfoon, 24 kimaan u laat tingbouŋ na kpinii, ki laat linba kur be sanpagbouŋ na lɔŋ ni. 25 Yoo nba ki Yennu din tur wouŋ yiikoo, ki bia bikin mɔkgbeŋir yabint nba tee biaŋinba na; 26 yoo nba ki Yennu din senn sennu ki tur saak, nan satianii nba sii tɔkii siaminba na; 27 li yooe ki u din got yanfoon, ki bikin li kpaiu, ki sak nan li ŋan.

28 Ki Yennu yet nisaarik a, “A tin min Yennu jaŋmaanii, ŋanne tee yanfoon; ki bia nyik toonbiit tumu, ŋanne tee bannu.”