1 A mi pawann nba maar yoo nba-a? A ban diit ki la pabɔŋ matuku-u? 2 A mi baa tuu soor poor ki lin wei biaŋinba bin tan mari-i? A mi yoo nba ki bi tuu tan maari-i? 3 A mi yoo nba ki bi tuu tan dɔɔr, ki mar bonbik durinya na ni-i? 4 Bi tuu be muuk nie, ki bi waas tuu kpaat ki mɔk paŋ, ki tan yaat, ki ji ki jent.

5 Ŋmee te ki bɔnii na be muuk ni bi yamani-i? 6 Mine turib kunkoouk na, a lii tee bi binbeboor, ki te bi be tinfukirik na ni. 7 Ki bi kɔɔ ki fɔk nan doi, kimaan fuut paak; ki sɔɔ kaa ki saa fit soorib ki te bin tun toonni. 8 Kunkona na paake tee bi linlin boor, ki bi sii di, ki tee siaminba ki bi sii kpaan mɔmaatit ki ŋman.

9 Mɔnaajak saa fit ko kpaab ki turawa-a? U sii loon wun dɔɔr a naaloor ni nyɔyemmira-a? 10 A saa fit dia bi yenɔ nan ŋmiiuk ki wun ko kpaaba-a? koo ki te wun dat naasɔk a kpaab niŋa-a? 11 A sii fit maa u pangarisuk paak ki dukii nan wun tun a toonpaara ki turawa-a? 12 A dukii nan wun jaan a jeet ki bia tikir jeet na, a jarik paaka-a?

13 Naamiɔŋ kpinkpant kakii ki yuuk yian yian, ŋaan u kan fit yukir nan janbɔɔnlot na. 14 Naamiɔŋ tuu nyik u jenn tin-yann nie, ki te yonnu n nyikint li paak tanbiinii na ni, ki li tan buun. 15 U ki mi nan taar saa liar, koo muuk ni bonkobuk saa mann yeerir. 16 Ki u binbeŋ tee nan jena maŋ ki tee u yar na, ki u baka bia kaa nan u paŋ saa teen yanni. 17 Mine din namɔ jatuk, ki ki turɔ yanfoomi. 18 Ŋaan li-i tee ki u piin nantaar yoo nba, u laa taamm nan taanjakirɔ nba saa tin biaŋinbae. 19 Job, fine din nan taanii ki bi mantik mɔk panii, ki turib taanganni-i? 20 Fine namm ki bi fit mɔbit nan naasuut na, ki bia te ki bi tuu foont foon ki jeent niib na-a? 21 Ki bi tuu dia bi taawoka ki parii tiŋ, ki tiin nan bi panii kur ki saa tɔb. 22 Bi ki mi jaŋmaanii, ki jukbanjiak kaa ki saa te bin tunnii. 23 Ki jatiat nba ki bi taanjakira dia na sii damme ki mɔk fuut ki nyirii. 24 Naatuna-i taŋi peb yoo nba, bi tuu jekire ki kpamm ki loon bin saan. 25 Ki naatunn-i peb kur, bin foont ki jiin, ki bann tɔb nubiruwa ki tan fit nakinir, ki gbia kunkɔnkɔnna saakab nba hoot ki teen sennii nba. 26 Job, kanbiɔk tumii a boore ki fit yuuk, yoo nba ki u lat u kpinkpant ki tor niidiitu po na-a? 27 Baakir tuu guu wun gbat a mɔbewa, ki tan fit tia u tiɔk jɔjaana ni-i? 28 Bi tia bi tiat jɔɔt paake ki bia dɔɔ tanjagbent paak jɔɔt ni, 29 ki tuu be leŋ ŋaan gorii laat banfɔkira, ki guu siar n gar ki bin kpi ki di. 30 Juut tuu tikir ki lint gbanankpeenae, ŋaan ki jubis na ji nyu sɔn.