2
Jona Yenmiaru
1 Jona nba din be jaŋ na poor ni na, ki u mei u Yomdaanɔ Yennu, ki yeen a:
2 “Yennu, n parbiir niŋe ki n yiina,
ki a gbiint ki turin.
N din be tinpɔɔr ni, kpeentiŋewa, ŋaan fabin tura,
ki a gbiint n fabinii maŋ ki turin sommir.
3 A jiime ki lun nyun ni, nyun tiŋ powa,
siaminba ki nyun piin n munn po,
ki a nyunpana nba mɔk paŋ gaar n paak.
4 Ki n dukin nan min kpan nyinte na,
ki ji kan mi nakin a kasii jiantu ŋasaakak na,
ki n ninbinn bia ji kan mi lari.
5 Ki nyun piin ki murintin, ki kpengoona fin n yur.
6 N kpii ki saa baar jɔfɔkit fiaka ni,
tiŋ nba tammɔi kpar yaayoo nan yaayoo,
ŋaan fin n Yomdaanɔ Yennu-e bia jiin sunsuŋ maŋ ni,
ki tan donnin foot.
7 Yoo nba ki n dukin nan n manfoor gbente na,
ki n fabin nan fin Yennu,
ki a be a kasii jiantu ŋasaakak ni, ŋaan gbiint n fabinii maŋ.
8 Binba jiantir pata na,
bi ki laat piisin nba ki a bo sii teemm na.
9 Ŋaan min saa yin yaŋ ki dont fine.
N saa mann maruŋ ki tura,
ki bia tun linba ki n senn mɔsonn nan n saa tun na.
Tinnu nyi Yennu boore.”
10 Tɔn, Yennu din te ki jaŋ na wukit Jona gbingbankpiŋ.