3
1 Biiru be fai damm nba tee nikpiirit na doo paak,
doo nba gbee nan gor, ki bi tan saa gaarir,
ki bia fatir tɔbii ni.
2 Gbiintir bulaar mɔnii man,
ki gbiint fiaa sommir mɔnii,
ki gbiint taanii nba mobit biaŋinba,
ki bia gbiint taantorit fuur.
3 Ki taanjakira teen siir, ki jukbanjai pekin,
ki kpana tiantir, ki nikpeena dɔɔ pukii,
ki yab kaa kann, ki jab gbiatirib.
4 Ninefe doo nba tee nan bonchonchonn na la tubdatuwa.
U fane, ŋaan gbee nan dudukbiit,
ki kpar digbana, ki teemm yommii.
5 Yabint Yennu yet a, “Ninefe, n saa dat a tubir.
N saa yokita, ki te digbana n la-a, ki te bin la a fei kur.
6 N saa yisima, ki tarima jakint,
ki niib saa gota, ki jaŋmaanii n soorib.
7 Ki binba kur la-a, bi saa fɔɔ jir poor.
Bi saa yet a, ‘Ninefe ji biar tee langbente.
Ŋmee mɔk ninbatinu nanɔ?
Ŋmee sii loon ki wun maan u pari?’ ”
8 Ninefe, a chee Ijipt digbangbeŋir Tebes-ii? U mun bia din mɔk mɔkir, ki li guu-u nan joonn na. Nail mɔkire din tee u bontekitir. 9 Tebes dooe din dia Itiopia nan Ijipt, ki u yiikoo kaa terik; ki Libia tee u yɔɔk. 10 Bi lek din tan soor Tebes teebe ki yaat saan namm digbangann, ki boo bi waas ki kpiib, ki baan bi tɔɔndamm na nan jarit ki yaat namm, ki biitib tur niib nba soorib na.
11 Ninefe, a mun saa nyu ki yiba. A mun sii koor a fan nyi a datai nii nie. 12 A ŋajaana na kur tan sii tee nan kinkaŋ nba mɔk kinkanmɔna nae; fi-i nik tiinii na, li lɔɔna na tuu baa a mɔb nie. 13 A kunkɔnkɔnna na tee nan poob nae, ki a digbann na see a datai tɔɔnn, ki siar ki guuri. Muu saa di biir kut laana nba puun a tammɔkɔɔka ni nawa. 14 Luunt nyun ki guun a mɔŋ, ki teen siir nan a datai, ki pukin a joona paŋ. A taa tant, ki teen birik-ŋmant siir. 15 Faa lek tun linba kur, ŋaan bi saa joo-a muu ki kpi-a, koo ki kpi-a tɔb niwa. A saa boont nan naasuut nba tuu kokii bonbuburit biaŋinba nae.
A pɔte nan naasuut na. 16 Ki a kpinkpenta pukin ki tee nan ŋmaabira nba be sanpaapo biaŋinba na. Mɔtana ki bi ji kaa, nan naasuut nba tuu lat bi kpinkpant ki yukir yaat biaŋinba na. 17 A saakab na tee nan naasuut nba tuu taab joona, damaatuk daar biaŋinba nae. Ŋaan yonnu-i taŋi nyii yoo nba, bin yukir yaat, ki sɔɔ ki bant baa saan siaminba.
18 Asiria kpanbar, a yent saakab na kpowa, ki a nijaana na bia gɔɔn tɔra, ki a niib na yat kunkona na paak, ki sɔɔ kaa ki saa jiib ki jen namm bi ŋei ni. 19 A danii na kaa tebuku, ki a fiat na kan ban buri. Niib nba kur gbat nan biiru baara, ki bi poi niipoot ki kpamm. Nirɔ din fit nyii a tonu nba kaa gbennu na niwa-a?