9
Biaŋinba ki niib na pak kat bi yanbɔmm
1-2 Ŋmaarik maŋ dapiinlee nan ŋanna daare, ki Israel teeb na din taan leeb a bin lor mɔi, ki lin wann bi parbiir nba tee biaŋinba, bi yanbɔmm paak. Bi poŋ din bɔkit bi mɔŋ nan boorganu kurawa. Bi din lia bɔtoote ki puk bi yura tanpent, ki li wann bi parbiir, ki bi ji din fiir set, ŋaan piin ki piak kat yanbɔmm nba ki ŋamm nan bi yeejamm din tun na. 3 Bi din jii awa ŋantaae ki karin bi Yomdaanɔ Yennu sennu ki turib, ki awa ŋantaa nba din wei na, ki bi jii ki kat bi yanbɔmm ŋaan jiant bi Yomdaanɔ Yennu.
4 Binbintir din be ki tee Liifai teeb sinsetboor, ki Jesua nan Bani nan Kadmiel nan Sebania nan Buni nan Serebia nan Bani nan Kenani, doo ki set. Bi din miar bi Yomdaanɔ Yennu sanpaapoewa.
5 Liifai teeb nae din tuu be bi tɔɔnn, jiantii ni. Ŋamme tee Jesua nan Kadmiel nan Bani nan Hasab-neya nan Serebia nan Hodia nan Sebania nan Petahia. Bi din yet a:
“Fiit set ki pak i Yomdaanɔ Yennu.
Ii pak dontɔ nan yoo nba kaa gbennu.
Ŋaant ki sɔɔ kur n pak u baakir sann na,
ŋaan nisaarik dontir lek kan jaŋɔ.”
Ki jiin dontir Yenmiaru po
6 Ki Israel teeb na miar Yennu a:
“Yennu, fin kɔɔe tee Yennu,
fine nan sanpaak nan ŋmaabira nba be sanpagbouŋ paak na.
Fine nan tiŋ nan mɔkgbeŋa nan linba kur be li ni na,
fine tur bonfoor kur manfoor.
Sanpaapo bona kur gbaant ki jiantira.
7 Yomdaanɔ Yennu, fine gann Abram ki nyii nanɔ Ur nba be Babilonn tiŋ ni,
fine din lebit u sann ki teen Abraham.
8 A din la nan u tee nimɔnɔe, ki a lor nanɔ,
ki senn mɔsonn nan a saa turɔ Keenann teeb, nan Hef teeb,
nan Amor teeb, nan Peris teeb, nan Jebus teeb,
nan Girgas teeb tinii, ki lii tee tiŋ nba ki u yaaboona sii kɔɔ.
A dia a mɔsona, kimaan a tee barmɔnpakirɔe.
9 “A la ti yeejamm nba dii biak Ijipt biaŋinbawa,
ki bi din boia sommir po, Mɔkmuŋ na boor, ki a gbiint.
10 A din tun bakitnauŋ toonjaana ki biir Ijipt kpanbar na,
nan u toontunna saakab, nan tiŋ na niib kura,
kimaan a mi baa dinn a niib na biak biaŋinba.
A din nyann, ki gaar sann nba ki a mɔk dinna na.
11 A din bir sɔnu mɔkgbeŋir na ni ki tur a niib,
ki bi somm tinkooŋ paak ki poot,
ki binba din waa beerib na dii nyun
nan tann nba tuu baa mɔkgbeŋir ni ki kpii biaŋinba na.
12 A din tuu dia sanpagbouŋo ki wantib sɔnu yonnu ni,
ki nyiɔk ki a dia muu ki yentir bi sɔnu.
13 A din nyii sanpaapo ki sik Sainai jɔɔr paak, ki pak tur a niib,
ki turib sennii nba ŋan, nan wannu nba took.
14 Fine din wannib a bii dia a foon daar na fanu, ki teenir kasii.
A din jii a sennii nae ki tur a toontunnɔ Moses, ki u tur a niib.
15 “Kon nba din soorib yoo nba, ki a turib jeet, ki li nyii sanpaapo.
Ki nyunnyukuru nba soorib yoo nba, ki a turib nyun, ki li nyii tanpiiuk ni.
A din betib a bin yent tiŋ nba ki a senn nan a saa turib na.
16 Ŋaan ki ti yeejamm na donn bi mɔŋ ki teen tubkangbata,
ki yêt bin sak a sennii na.
17 Bi din yêt mɔsakuwa, ki tamm linba kur ki a tun nawa,
ki bia tamm bakitnauŋ toona nba ki a tun na.
Bi karinbaanii paak, ki bi gann tɔɔndaanɔ
a wun jiib ki ŋmat namm daabisin ni, Ijipt tiŋ ni,
ŋaan a tee Yennu nba nyikin ki chabite,
ki bia mɔk parmaasir nan lomm, ki a wutoor ki do yian,
ki a ninbatinu yab, ki a ki nyɔr nyikibi.
18 Bi din maa tingbanne, ki li naan naajabik,
ki yet a ŋanne tee bi yennu nba daan nyii namm Ijipt na.
Yennu, bi din sukiia bonchiann.
19 Ŋaan a din ki nyikib kunkoouk na paaki,
kimaan a ninbatinu yab.
A din ki jii sanpagbouŋ koo muu nba gar bi tɔɔnn
ki wantib sɔnu yonnu nan nyiɔk na ki yaat nanni.
20 A binbenŋaŋ paak, ki a din wannib baa saa teen biaŋinba.
A din dinnib jeet nba tee mana na,*9.20 Mana tee jeet nba nyi sanpaapo ki baa tiŋ na paak. ki bia turib nyun ki bi nyuu.
21 Bina piinna nba ki bi din be kunkoouk paak na,
ŋaan a din teemm bi bonloŋa kur, bi liant din ki ban kpet,
ki bi taa din ki mɔɔr bi sommir paaki.
22 “A te ki bi nyann digbana nan naan yent,
nan tinii nba ter namm.
Bi din kɔn nyann Hesbonn tiŋ nba ki Sihonn din dia na,
nan Basann tiŋ nba ki Og din tee leŋ bat na.
23 A turib waas ki bi yab nan ŋmaabira nba be sanpaapo
biaŋinba nae,
ki te ki bi kɔn nyann ki kɔɔ tiŋ nba ki a din senn
nan a saa tur bi yeejamm na ni.
24 Bi din nyann Keenann tiŋ, fine nyann niib nba kɔɔ leŋ na.
A din tur a niib na yiikoo a bin tun biaŋinba ki bi loon
ki tur Keenann teeb nan bi kpanbara.
25 A niib na din nyann digbana nba mɔk joonpaara, nan tinkpiasa,
ki li ŋei gbee nan mɔkint, ki bunbuna poŋ gbiira ki be li ni,
nan kpan tiinii nan daan tilontii kpaant nan tilontilia,
ki bi di baa loon biaŋinba ki gbeŋit,
ki laat bonŋana nba kur ki a teemm, ki bi di nan parpeenn.
26 “Ŋaan a niib na din yêt a mɔbe, ki lin a poor.
Bi din kpii a sɔkiniinba nba tuu teemm kpaanii na,
binba beerib a bin ŋmat jen a boor na.
A niib na tuu sukiiae yoo n tuu yoo.
27 Li paak ki a te ki bi datai nyannib, ki ji diab.
Baa be wahala ni na, ki bi boia sommir po,
ki a be sanpaapo ki gat turib.
A ninbatinu nba yab na paak, ki a turib tɔɔndamm nba fatib bi datai boor.
28 Parmaasir nba din tan be yoo nba na,
ki niib na bia ŋamm tun yanbɔmm,
ki a bia te ki bi datai na nyannib;
ŋaan baa tan kat bi yanbɔmm ki lebit bi binbeŋ
ki boia sommir po yoo nba, ki a be sanpaapo ki gbiint,
ki teenib gatu, ki tintib yoo nan yoo,
a ninbatinu nba yab na paak.
29 A din kpaanib a bin sak a wannu,
ki bi karinbaanii paak ki bi yêt a sennii,
ŋaan a sennu na dianue tee manfoor sɔnu.
Bi mɔyêtuk nan bi tubkangbatin na paake,
ki bi ŋmant bi poor ki tura.
30 Binn n tuu binn, a teemm kpaanii nan sukuru.
A te ki a sɔkiniinba pak, ŋaan a niib na tee tuukpaae,
li paak ki a te ki digbanlia nyannib.
31 Ŋaan a ninbatinu nba yab na paak, ki a ki nyɔr nyikib,
koo ki boontibi.
A tee parmaasir nan ninbatinu Yennu-e.
32 “Yennu, ti Yennu, a mantik tee Yenjaanne.
A tee jaŋmaansooruk nan yiikoo daanɔe.
A dia a mɔlor nba ki a din senn na nan barmɔnii.
Laa nyii yoo nba ki Asiria kpanbara din dintit biak na
ki tan tuu mɔtana, ti mantik dii farawa.
Ti kpanbara, nan ti tɔɔndamm, nan mannteeb, nan a sɔkiniinba,
nan ti yeejamm, nan ti niib na kura dii biaka.
Tiat taa mantik dii fara biaŋinba.
33 Faa dat ti tuba na, a tun fanuwa, nan taa lek tun yanbɔmm na,
ŋaan fin ŋarin tuun ŋante.
34 Ti yeejamm, nan ti kpanbara, nan ti tɔɔndamm,
nan mannteeb na din ki dia a sennu na.
Bi din ki gbiint a sennii nan a kpaanii na.
35 Fine tee piisin kpanbara paak, ki bi dia a niib.
Ki a turib tiŋ nba yarin ki bia kpai, ki bi be leŋ,
ŋaan ki bi yêt bin nyik bi yanbɔmm ki jianta.
36 Ki mɔtana ki ti ji tee yommii, tiŋ nba ki a turit na ni,
ki li tee tinkpiasir nba teent jeet.
37 Linba ki tiŋ na naan na,
li tee kpanbara nba ki a sennib ki bi diat na yarae,
kimaan ti yanbɔmm paak.
Bi diat nan ti tee bonkobit nae,
ki tuun nant baa loon biaŋinba, ki ti be parbichiɔŋ ni.”
Ki jiin lor nba ki niib na din taan ki sɔb na po
38 Laa tun nna paak, ki timm Israel teeb taan leeb ki lor lor, ki sɔb teenir gbant ni, ki ti tɔɔndamm, nan Liifai teeb, nan mannteeb na dinn bi yiikoo dinta li paak.