OBADIA
gbouŋ
Ki jiin Obadia gbouŋ na po
Obadia din tee Yennu sɔkiniie ki kpaan Edom digbana nan Yennu saa dat bi tuba nan baa dia Israel teeb diabiiuk na. Edom teeb na din tee Jakɔb ninja Esɔɔ yaaboonae, li paak, bi din tee ninjanne nan Israel teeb.
1
1 Mɔmaan nba nae ki Yabint Yennu yet Obadia ki jiin Edom tingbouŋ po.
Ki jiin Edom teeb tubdatu po
Ti gbat mɔmaan ki li nyii Yennu boor,
u tun tontii digbana ni ki yet a,
“Teent siir man ki tin saan faa Edom teeb tɔb.”
2 Yennu yet Edom teeb a,
“N saa butimi, ki te sɔɔ kur n yisimi.
3 I dont-n-mɔŋ nae kpanni.
I digbangbeŋir na tee tanpiiuko.
Ki i ŋei be jɔfɔkit paak, ki i ji beer i mɔŋ a,
‘Ŋmee saa fit dat ki sikiniti?’
4 Yaa lek maa i ŋei ki li be sanpaapo
nan baakir tiɔk nba be na,
ki te ki li tee nan li be ŋmaabira ni na,
ŋaan n lek saa dat ki sikiniiwa.
5 “Li-i tee nanyukib kɔɔ nyiɔku,
bi tuu jan linba ki bi loone;
ki li-i tee niib saan a bin tikir tilɔɔna,
ŋaan bi tuu lɔɔt waama,
ŋaan ki i datai ber nyinni fas fas.
6 Esɔɔ yaaboona, bi fat i faara.
7 Binba kur man nani, bi kpanniwa.
Bi ber nyinni i tiŋ niwa;
ki yimm nan niib nba bo man na, bi kɔn ki nyanniwa.
Ki i yɔɔsnba, binba ki yimm nan ŋamm tuu lakin di na,
bi pii barite ki guunti.
Bi piak i paak maan a,
‘Bi subinii nba ki bi mɔk na be lia?’
8 Daar nba ki n saa dat Edom teeb tuba na,
li daare ki n saa biir u jab nba tee subindamm,
ki boon bi bannu kur,
9 ki jaŋmaanii saa soor Temann kunkɔnkɔnna,
ki bi saa kpi jab nba kur be Edom tiŋ ni.
Linba paak ki Yennu saa dat Edom teeb tuba
10 “Kimaan yaa fiar
ki bia kpi i ninjamm Jakɔb yaaboona na paak,
ki n saa boonti, ki yin di fei nan yoo nba kaa paak.
11 Daar nba ki bi datai daan biir Jerusalem tammɔi
ki kɔɔ ki jii bi mɔkint ki yaat nann
ki saa biit bi taŋmiɔŋ ni na, i daan see-e ki gorii.
I ton nan datai maŋ nae.
12 I daan bo kii kpamm i ninjamm nba ki bi biirib
Juda tiŋ ni na paaki.
I daan bo kii mɔk parpeenn, daar nba ki bi biirib na ni.
I daan bo kii laab nan baa be parbiir ni na.
13 I daan bo kan kɔɔ n niib doo na ni,
ki saa kpamm, bi wahala daar ni,
ki bia fat bi mɔkint, biiru daar maŋ ni.
14 I daan bo kan set sɔnpaata na ni,
ki so binba tiin a bin paak na.
I daan bo kan soorib ki turib bi datai, parbiir daar na ni.
Ki jiin digbana nba ki Yennu saa bu bi buut na po
15 “Daar nba ki min Yennu saa bu digbana kur buut na per na.
Edom, faa tun linba, bi saa tun nnae ki jiina.
A toona saa ŋmat a yur paake.
16 N niib na gaar tubdatu bonchiann, n kasii kunkonn na ni,
ŋaan digbanlia nba kur kpia na saa la tubdatu
ki lin gar nnawa.
Bi saa gaar tubdatu nae ki tan kpakin yann.
Biaŋinba ki Israel teeb saa nyann
17 “Ŋaan Sayɔnn kunkonn paak, siab saa tin paak,
ki li sii tee kasii boor.
Ki Jakɔb ŋaateeb saa yent tiŋ nba tee bi yar nan barmɔnii.
18 Jakɔb ŋaateeb nan Joosef ŋaateeb* 1.18 Jakɔb ŋaateebe see Juda teeb seenu ni, ki Joosef ŋaateeb mun see Israel teeb seenu ni. sii tee nan muu nae,
ki saa di Esɔɔ ŋaateeb
nan muu nba tuu di kinkaka biaŋinba na.
Ki Esɔɔ yaaboona na, sɔɔ kan biari.
Min Yennu-e pak na.
19 “Niib saa nyi niidiitu po Juda tiŋ ni ki yent Edom tiŋ,
ki binba saa nyi yonbaa po kunkonbis po na saa fat Filistia tiŋ.
Ki Israel teeb saa kɔɔ Efraim nan Samaria yent ni,
ki Benjaminn booru saa yent Gilead tiŋ.
20 Ki Israel kunsɔntinna nba be Keenann tiŋ ni na
saa kɔn nyann Fonisia ki saan niigaŋ po ki saa tuu Sarefaf,
ki kunsɔntinna nba nyii Jerusalem ki be Saadis na
saa fat Juda niidiitu po digbana.
21 Ki nyannu damm nba be Jerusalem na saa nyann Edom tiŋ,
kii diab.
Ki Yennu mɔŋ sii tee bi kpanbar.”