YAŊ
Ki jiin Yaŋ gbouŋ na po
Gbouŋ na ni mɔk yanii nba ki a sii fit yiin, koo ki piak ki mei Yennu. Yanii maŋ bonchiann, Defid-e din yin. Yaŋ gbouŋ na bɔkit paabu munŋmue: Gbouŋ yenn, nan gbouŋ ŋanlee, nan gbouŋ ŋantaa, nan gbouŋ ŋanna, nan gbouŋ ŋanŋmu. Baatusir ni, bi yi gbouŋ maŋe Saams.
GBOUŊ YENN
1
(Yanii 1 -- 41)
Barmɔnii parmaasir
1 Daansiab nba ki gaan biit damm maan
ki bia ki tokii bi binbeŋ,
koo ki ki tɔkii nan binba yaa Yennu kaa na,
parmaasir tee bi yare.
2 Bi parmaasir nyi baa saak Yennu sennu na niŋe,
kimaan bi dukii sennu maŋ poe yoo kur.
3 Li nibooru tee nan tiik nba see kpengbiɔŋ nae,
kimaan u lomm yoo-i baar, u tuu lone,
u tituut bia ki siiri.
Bi toona kur saa fanue.
4 Ŋaan li ki tee nna kaa biit damm boori.
Biit damm ŋarin tee nan fouŋ nae,
ki wouŋ tuu da ki piar yaatir.
5 Yennu tan saa biir biit damm,
ki ŋamm nan Yennu niib kan lakin taan benu.
6 Yennu-e ŋmakitir niŋamm na ki nyintib bonbiir ni,
ŋaan nibiit na ŋarin kpan tɔk bi biiru sɔnue.