1 Yennu, gbiintir maa fabin fabinii nba ki jiin buut

nba ŋan po na.

Gbatir mɔnii nba ki n mɔ ki loon sommir na.

Gbiintir n miarmɔnu na.

2 A saa bu ki sommima, kimaan a mi linba took.

3 A mi n dudukit, faa baar n boor nyiɔk,

a bikinin fanue ki ki la yanbɔndudukit n ni.

4 N ki piak biit nan leeb nba piak biaŋinba na.

N sak a maame ki yêt min wei kpikpiruk sɔnii.

5 N yɔɔ tɔk a sɔnue; n ki mi kpat nyii kpiŋi.

6 Yennu, n meia, kimaan a teenin gatu,

li paak, gbiintir n mɔbona.

7 Wantin a bakitnauŋ lomm na ki tinnin.

Li-i tee ki n be a boor, n nyii n datai nuu niwa.

8 Ii guun nan faa saa guur a tiɔŋ ninbinn biaŋinba na.

Jiimin ki gurin a boouk ni,

9 ki nitont na daa fit teen siari.

Databiit na kaan lintima.

10 Bi ki tiin ninbaauku, ŋaan piak ki dont bi mɔŋ.

11 Bi ŋaa lintima, mi-i ŋmant siar kur po, bi bee,

ki loon yaak bin dat sikinin.

12 Bi tee nan yanbɔra nae ki guun;

ki loon bin chat-chatin.

13 Yennu, baat, tookit n datai ki nyannib.

Jiin a jukbanjiak ki fatin tondamm nuu ni.

14 Nyintin binba mɔk linba kur ki bi loon na nuu ni.

Datir bi tuba nan biak nba ki a bir guumm na.

A ŋaan ki lii yaba ki baar bi waas nan bi yaaboona.

15 Ŋaan n saa la fin Yennu-wa, kimaan n ki tun biit nan waama;

ki mi-i gɔɔn tan yerik, a benu tuu turin kpinkpammuk bonchiann.