33
Ki jiin dontir yaŋ po
1 Ii yin yaŋ nan parpeenn ki tur Yennu,
yimm nba tee niŋamm na.
Li ŋan ki niŋamm na n jiantɔ.
2 Ii faa kɔnn ki tur Yennu niipoouk.
Ii yin yaŋ ki faa biɔk ki turɔ.
3 Ii yin yanpaaŋ ki turɔ,
ki faa kɔnn fanu ŋaan yikin nan parpeenn.
4 Yennu mɔmaan took ki bia tee barmɔnii;
ki toona nba kur ki u tuun na be fanu.
5 Yennu loon kasii toona nan toonŋana,
ki u lomm nba yɔɔ be na gbee tingbouŋ.
6 Yennu yet mɔmaame ki nan sanpaapo,
ki bia yet mɔbonn ki li nan yonnu
nan ŋmaarik nan ŋmaabira,
7 ki u taan mɔkgbeŋa kur bɔyenn kɔɔ boor,
ki taan mɔkgbeŋa nba sumii maŋ, ki li dɔɔ yomm.
8 Ŋaant ki tingbouŋ na bont kur n jiant Yennu.
Ŋaant tingbouŋ na niib kur n baakit Yennu.
9 U din pake, ki tingbouŋ na nan,
ki u yet mɔmaan, ki bont kur lekit ki set.
10 Yennu-e ŋmat tingbouŋ na niib dudukit,
ki te niib na ki fit tuun bi lora,
11 ŋaan Yennu lora see-e kenken yoo kur,
ki waa loon biaŋinba tuun yoo n tuu yoo.
12 Parpeenn be digbann nba ki Yennu tee bi Yomdaanɔ na paak.
Parpeenn be niib nba ki u gannib ki bi tee u yab na paak.
13 Yennu be yendɔuŋ ni ki tibin got ki la nisaarik kur.
14 U be u naan gbant paak,
ki gorii wunba kur be tingbouŋ na ni.
15 Ŋɔɔe nan sɔɔ kur yan, ki mi baa tuun linba kur.
16 Kpanbar sɔɔ kaa ki saa fit kɔn ki nyann tɔb
kimaan waa mɔk kunkɔnkɔnna bonchiann na paaki;
koo kunkɔnkɔnnɔ sɔɔ kaa ki saa kɔn nyann
kimaan waa mɔk paŋ na paaki;
17 Tɔb taamm ki tee dindann ki jiin nyannu po,
u paŋ kan tinni.
18 Yennu gorii binba saak u mɔbe,
ki bia gorii binba mɔk dindann nan u lomm
nba ki u teen yoo kur na.
19 Ki u nyintib kuun ni,
ki teemm manfoor kon sakir ni.
20 Ti dindann maa Yennu paake,
ŋɔɔe tee ti guutɔɔ nan ti sommtɔɔ.
21 U nie ki ti mɔk parpeenn,
kimaan ti teen yada u kasii sann na nie.
22 Yennu, ŋaant ki a lomm nba yɔɔ be na-ii be nant
nan taa maa ti dindann a paak biaŋinba na.