35
Yenmiaru nba jiin sommir po
1 Yennu, yêtir damm nba yêenin na,
ki bia kɔn nan damm nba kɔn nanin na.
2 Jiin a naagbankɔŋir ki baar fatin.
3 Wokitir a kpann nan pajar ki took binba waan na.
Satir mɔb nan a saa tinnima.
4 Ŋaant ki binba koor a bin nyinn n manfoor na, bin gbar ki di fei.
Ŋaant ki binba lorin n paak bonbiir na, lin ŋmatib ki bin ŋmat.
5 Yennu malaka n wei berib nan fouŋ nba ki wouŋ tuu pebir na.
6 Ŋaant ki bi sɔnu-ii bɔn, kii biaki ŋarii,
ki te ki Yennu malaka n faab ki birib tiŋ ni.
7 Bi pii barit ki guuntin, ki li ki mɔk paaki;
ki bia gbiir bootsunsuŋ a bin soorin.
8 Bi tan sii bant na ki biiru tunn bi paaka,
ki barit nba ki bi pii na, lin soorib,
ŋaant ki bin baa bootuk na ni, ki lin biirib.
9 N par ji sii mei nan Yennu,
ki n sii mɔk parpeenn, waa tinnin na paak,
10 ki n saa yet Yennu nan n par kur a,
“Yennu, sɔɔ ki be ki tee nan fin na,
ki a nyint butimm, paŋ damm nuu ni,
ki bia nyint fara damm nan nandamm
binba ŋmaabib na nuu ni.”
11 Toonbiit damm di siara ki biirin,
ki boin buboit nba ki n ki mi li po;
12 ki bi pa biit ki jiintin ŋamm paak,
ki te ki n ki mɔk dindann.
13 Ŋaan baa bo yiar yoo nba, n bo lia parbiir liante
ki sikin n mɔŋ ki lor mɔb,
ki tibin n yur tiŋ ni ŋaan mei Yennu
14 nan maa bo saa miar ki tur n yɔɔk koo n naa bik biaŋinba na,
ki n lin mɔ fabin nan nirɔ nba tuu mɔ fabin
u naa paak biaŋinba na.
15 Ŋaan daamii nba tan baarin yoo nba,
ki bi kur mɔk parpeenn, ki taan leeb ki lintin,
ki sarikitin, ki saamm boon, ki faan yoo kur,
16 ki nyiitir bi nyana nan naŋ
nan niib nba sii sarikit wabik biaŋinba na.
17 Yennu, a saa tamm n po ki lin wei nlee?
Fatir n manfoor ki nyinnin bi biiru na ni.
Fatir n manfoor ki nyinnin yanbɔra na ni.
18 N saa tura niipoouk a nibur tintaanu ni,
bi kura sinsuuk niŋe ki n saa tura dontir.
19 A daa te ki n datai kpamm n biiru paaki.
Bi tee fai damme.
A daa te binba namin ki li kaa paak na laa n parbiir paaki.
20 Bi ki piak parmaasir maami,
ŋaan piak ki fa fai ki biir binba be soon nna, tiŋ na ni na,
21 ki piak ki biirin nan kunkɔpaara a,
“Ti la faa tun linbawa.”
22 Yennu, a la linba nawa, li paak, a daa ŋmini.
Yennu, a daa fɔkitir nanimi.
23 Yennu, fiit a mɔŋ ki kɔn turin. Yennu, fiit ki pak turin.
24 Yennu, a be fanu,
li paak, want nan n ki mɔk biiti, ki daa te ki n datai laami.
25 A daa te ki bi yeen ki teen bi leeb a,
“Ti nyannɔwa. Taa loon biaŋinbae na.”
26 Ŋaant ki binba kpamm n wahala ni na,
bin nyannib ki lin ŋmatib.
Ŋaant ki binba want bi mɔŋ na, bin di fei ki kɔŋ baakir.
27 Ŋaant binba loon ki min nyi wahala ni na,
bii yikin nan parpeenn, ki tuu ŋamm yet a,
“Yennu-e yen dontir, ki u par mei nan u daabir n la nyannu.”
28 N sii mɔɔntir a kasii binbeŋ po,
kii dontir a sann daar kur ni.