38
Ki jiin talasdaanɔ Yenmiaru po
1 Yennu, a daa daar n tubir nan wutoori,
2 kimaan a peenii na ŋmuu ki saarima,
ki a nuu faa ki birin.
3 Ki a wutoor paak, ki laafia ji kaa n gbanant ni,
ki n kpaba ji ki mɔk paŋ, kimaan n yanbɔmm paak.
4 Ki n biit kpiakin nan jikir nba tuu kpiak nan jiinu
biaŋinba na.
5 N jatii paak ki n nara lukir ki pɔɔk.
6 Bi dinnin ki n faab tiŋ ni, ki mɔ fabin daa kur.
7 Ki n gbanant di muu nan yuyeeuk, ki n ki mɔk laafia.
8 Ki n baŋ, ki ki mɔk paŋ nan waama,
ki n par biir, ki n fabin nan tont.
9 Yennu, a mi maa loon linba, ki a gbiin n fabinii.
10 N parpaak toe, ki n paŋ gbent;
ki n ninbina jii ki nyirii.
11 Ki n yɔɔsnba nan n tɔknanleeb tiinin,
nan n ŋaateeba ki nakiin, kimaan n nara na paak.
12 Binba loon ki bin nyinn n manfoor na pii barite ki guuntin,
ki binba loon bin paanin daŋ na lorin daa kur a bin biirin.
13 N tee nan tuukpaar nae ki ki gbia maan,
ki bia tee nan muuk nba kan fit pak maan na.
14 Ki n kpant nirɔ nba kan fit pak jiin
kimaan waa ki gbia na paak.
15 Yennu, n teena yada ki guu a gatu,
fin, n Yomdaanɔ Yennu-e saa turin gatu.
16 N meia ki yet a, “A daa te ki n datai laan, laa biirin na paaki,
koo ki bi dont bi mɔŋ maa baa na paaki.”
17 N ji yaa man baae ki be nan tont yoo kur.
18 Ki n pak ki kat n yanbɔmm, ki n biit maŋ daamiin.
19 N datai mɔk laafia ki bia mɔk panii.
Ki n datai yaba ki namin, ki li ki mɔk paaki.
20 Ki binba jikit biit ki pa n ŋamm paak na piak ki biirin,
kimaan maa koor a man tun linba ŋan na paak.
21 Yennu, a daa ŋaanin; Yennu, daa fɔkitir n boor.
22 Yennu, n tinntɔɔ, baat yian ki tan sommin.