46
Yennu be nant
1 Yennu-e tee ti paŋ daanɔ nan ti guutɔɔ,
ki teen siir nan wun sommit daamii ni, yoo kur.
2 Li-i lekii tee ki tiŋ damm,
ki jɔjaana baa mɔkgbeŋa nba sumii ni,
3 li-i lekii tee mɔkgbeŋa na damm, ki mɔk fuur,
ki li jek kunkona, ŋaan ti kii tiin jaŋmaanii.
4 Mɔkisiar be ki teen yabint daanɔ Yennu doo nba tee
u kasii binbeboor na parpeenn.
5 Yennu be doo maŋ ni, ki li kan biiri;
u tuu saa baar ki sommir sanyafaar.
6 Yennu kunkɔr tant, ki tingbouŋ nann,
ki jaŋmaanii soor niib na, ki digbana baa.
7 Yabint daanɔ Yennu be nant,
wunba tee Jakɔb Yennu na, ŋɔɔe tee ti gungurboor.
8 Baat ki tan got Yennu toona.
Gotir yaarlituk toona nba ki u tun tiŋ na paak.
9 U te tɔbii gbent tingbouŋ na kur po,
ki kɔnii tɔrbana, ki jintir kpana,
ki bia jokit naagbankɔŋa muu,
10 ki yet a, “Nyikin kɔnn man,
ki bann nan mine tee Yennu,
ki saa la dontir digbana kur ni,
ki bia saa la dontir tingbouŋ kur po.”
11 Yabint daanɔ Yennu be nant,
wunba tee Jakɔb Yennu na, ŋɔɔe tee ti gungurboor.