63
Ki jiin waa loon Yennu biaŋinba po
1 Yennu, fine tee n Yennu. N loon fine.
Nan tinkooŋ nan tinsaatik nba tuu loon nyun na,
nnae ki n gbanant nan n seek kur kpenn a paak.
2 Ŋaant ki mii laata a kasii binbeboor,
kii bia kii laat a yabint nan baakir nba tee biaŋinba.
3 A lomm nba mɔk nyɔɔt ki gar manfoor na,
li paak ki n saa dont a sann.
4 N manfoor ni kur, n saa dont a sanne.
N saa donn n nii ki miara.
5 N seek saa di jeŋant ki gboo,
ki n mɔb saa yin parmaasir yanii ki dont a sann.
6 Ki mi-i dɔɔ n dɔɔnu paak, n sii tian a po;
nyɔtunmunn n sii dukii a po,
7 kimaan a tun tee n sommtɔɔe;
ki n sii be a kpinkpant maasu ki yin parpeenn yaŋ.
8 N taab nana, ki a nuu dian ki tinnin.
9 Binba koor a bin kpin na saa sik kpeentiŋ.
10 Bi saa kpib tɔbii ni, ki kinkata saa ŋman bi gbanant.
11 Yennu nba saa tur kpanbar nyannu na, u sii kpamme.
Binba sent mɔsona Yennu sann ni na saa dontɔ;
ki binba fa faak na saa pɔbin bi mɔi kii ŋmin.