118
Ki jiin datai nyannu niipoturu po
1 Turin Yennu niipoouk, kimaan u ŋan,
ki u lomm kaa gbennu.
2 Ŋaant ki Israel teeb n yet a, “U lomm kaa gbennu.”
3 Ŋaant ki Yennu mannteeb n yet a, “U lomm kaa gbennu.”
4 Ŋaant ki binba jiantirɔ kur n yet a, “U lomm kaa gbennu.”
5 N daamii nie ki n yiin Yennu,
ki u turin gatu, ki nyinnin daamii maŋ ni.
6 Yennu be nanin, n ki jee siar; nirɔ saa fit teenin bee?
7 Yennu-e sommitin, ki n nyant n datai.
8 Li ŋan fin teen Yennu yada, ki chee fii maa nisaarik paak.
9 Li ŋan fin teen Yennu yada, ki chee fii maa tɔɔndamm paak.
10 Datai bonchianne ki lintin,
ŋaan ki n jii Yennu paŋ ki biirib.
11 Bi daan ŋaa lintime li munn po;
ŋaan ki n jii Yennu paŋ ki biir bi kur.
12 Bi daan waame gbangban nan sai na,
ŋaan ki n jii Yennu paŋ ki kpiib,
ki bi boont nan muu nba tuu di naamɔɔr na.
13 Bi daan worin nan ninmɔnne a bin nyannin,
ŋaan ki Yennu sommin.
14 Yennu turin yiikoo nan paŋ; ŋɔɔe tinnin.
15 Gbiintir parpeenn hootii nba nyi Yennu niib binbeboor
ki jiin nyannu po na a: “Yennu yabint yiikooe te ki li tun.
16 U yiikooe turit nyannu, u jii u panchiɔŋo ki kɔn tɔb ni.”
17 N kan kpo, n sii foe ki mɔɔntir linba Yennu tun.
18 U dat n tubir bonchiann, ŋaan u ki te ki n kpo.
19 Lootir Yenjiantu ŋasaakak tammɔi na ki turin,
n saa kɔɔ li ni ki tur Yennu niipoouk.
20 Yennu tammɔbe na, kasii damm kɔɔe saa kɔɔ leŋ.
21 Yennu, n saa pak donta, kimaan a gbia n fabinii,
kimaan a turin nyannuwa.
22 Tann nba ki tanmaara yêtir na,
ŋanne tan tee lɔtik ni tanŋann.
23 Yennu-e teen nna, ki li teent bakitnauŋ.
24 Daar nba nae tee Yennu daar.
Ŋaant ki tii mɔk parpeenn kii kpamm man.
25 A tinnit, Yennu, a tinnit. Yennu, turint nyannu.
26 Piisin be wunba baat Yennu sann ni na paak.
Ti be Yennu ŋasaakak nie ki tee piisin i paak.
27 Yennu-e tee ti Yomdaanɔ, u tun ŋane ki turit.
Ii dia faat i nii ni, ki piin jaamm na,
kii somm kii lintir maruŋ binbintir na.
28 Fine tee n Yennu, ki n teena niipoouk.
Fine tee n Yennu, ki n saa mɔɔnt a yabint.
29 Turin Yennu niipoouk, kimaan u ŋan,
ki u lomm kaa gbennu.