135
Dontir yaŋ
1 Pakin Yennu man.
Yimm nba tee Yennu toontunna na,
2 yimm nba see Yennu ŋasaakak ni,
ki li tee jiantu ŋasaakak na, ii dont u sann.
3 Pakin Yennu man, kimaan u ŋan,
ii yin yanii ki pak u sann, kimaan u ŋan.
4 U gann Jakɔb yaaboonae ki teemm u yab,
ki jii Israel teeb maŋ ki teemm u niib.
5 N mi nan Yennu tee Yenjaanne,
u tee Yenjaann ki gar yennii kur.
6 U tuun linba kur ki u loone,
li sanpaapo nan tingbouŋ na ni,
li mɔkgbeŋa nan li mɔkgbeŋa tiŋ po.
7 Ŋɔɔe te ki sayuŋ nyi durinya kpiŋ po ki tikii,
ki te ki sanyikintii be sayuŋ ni, ki te wouŋ nyi u boor ki da.
8 Ijipt tiŋ nie ki u din kpii nisaarii nan bonkobit bonjakperii
kur yomm.
9 Leŋe ki u din tun bakitnauŋ toona,
ki dat Ijipt kpanbar nan u saakab tuba.
10 U din biir digbana bonchiann,
ki kpii kpanbara nba mɔk yiikoo:
11 Amor teeb bat Sihonn, nan Basann teeb bat Og,
nan Keenann batnba kur.
12 U din jii bi tinii ki tur u niib Israel teebe.
13 Yennu, bi sii yɔɔ mɔɔntir a sanne, ki a tee Yennu,
ki maaru kur saa tiar a po.
14 Yennu saa kɔn ki tur u niib,
u saa tin u toontunna maŋ ninbaauk.
15 Digbana yenbis na ŋarin,
bi jii salimmɔna nan salimpeenae ki namm,
niibe jii bi nii ki namm.
16 Bi yenbis maŋ mɔk mɔi ŋaan kan fit pak,
ki bia mɔk ninbina ŋaan ki laati.
17 Bi mɔk tuba ŋaan kan fit gbat, bi poŋ ki foi kaawa.
18 Binba maa yenbis maŋ nan binba teen yenbis maŋ yada,
bi mɔŋ sii tee nan yenbis maŋ nae.
19 Israel teeb, pakin Yennu man;
yimm nba tee Yennu mannteeb na, pakin Yennu man,
20 yimm Liifai teeb, pakin Yennu man;
yimm nba kur jiantirɔ na, pakimɔ man.
21 Pakin Yennu, Sayɔnn kunkonn paak,
pakin ŋɔɔ nba be Jerusalem na.
Pakin Yennu man.