8
1 N sunman ki a bo tee n naa bik nba mɔɔr n naa biime,
ki mi-i cheta sɔnjouk ni, ki n saa fit mɔɔt a tankpinn,* 8.1 Bi binbeŋ ni, bi din tuu mɔɔtir leeb tankpinn nae ki li want lomm.
ki sɔɔ baka sii kaa li po.
2 N saa jiia, ki saan nana n naa ŋaak,
ki li sii tee siaminba ki a saa tumiin lomm.
N saa tura damanin nba ki n jii tilɔɔna nyun ki ŋaa na ki a nyu.
3 N yur kpaak a niigaŋ paake, ŋaan ki a niidiitu barimin.
4 Jerusalem poob, satir mɔb nanin nan i kan te lomm n baar,
ŋaan ki li yoo daa ki baari.
Yaŋ nba pukin munloob
Poob lomm yaŋ
5 Ŋma poe nyii kunkoouk po, ki lɔn u yɔɔk nii ki baat na?
Poo lomm yaŋ
N fiina, tilontik na nyakire, siaminba ki bi din mara na.
6 A daa jikit a par ki teen sɔɔ, see min kuukɔɔ;
a daa lor sɔɔ see min kuukɔɔ.
Lomm mantik paar ki tee nan kuun nae;
ki niɔŋ mɔk paŋ ki tee nan kuun mɔŋ nba tee biaŋinba na.
Li tuu tan yit ki tee muyeruko,
ki di nan muu nba tuu yabit ki di biaŋinba na.
7 Ki nyun ki fit kpeent, nyunmɔnn ki be ki saa fit kpeeniri.
Ŋaan li-i tee ki sɔɔ koor a wun daa lomm nan u mɔkinti,
li joontu tan sii tee feie ki u saa la.
Poo maŋ ninjamm yaŋ
8 Ti waarɔ be, ki tee sapaanbik, ki u biaa daa waar.
Ti saa teenɔ nlee, li-i tee ki naasinbik baat ki daakɔ?
9 Ti waarɔ na-i bonni tee dikpinn,
ti bo saa maa salimpeena difoouko u paak.
Ki u bonni biaki tee gann, ti bo saa chaan kpek taabiie ki kɔrɔ.
Poo lomm yaŋ
10 N tee dikpinne, ki n biaa na tee li ditɔɔtii.
N yɔɔk mi nan mi-i be u boor, n tuu mɔk parmaasire.
Jɔɔ lomm yaŋ
11 Solomonn mɔk sarwaauk siaminba ki bi yi Baal Hamonn na ni.
Kpaara be leŋ maŋ, ki u jikit u sarwaauk na ki teemm,
ŋaan gaan salimpeenbina tusir tusir.
12 Ki Solomonn tuu gaar salimpeenbina tusire,
ki kpaara na mun tuu biar nan salimpeenbina kobii ŋanlee-lee,
ki li tee bi tora; ki n baka kaa. N mɔk n tiɔŋ sarwaauko.
13 N yɔɔk, a te man gbat a kunkɔr kpaab na ni;
n kɔɔnanleeb na guua, a fan pak.
Poo lomm yaŋ
14 N yɔɔk, baat n boor; a tee nan kɔɔk
koo pajak nba tuu be kunkona nba ki bonnunubit be leŋ nae.